Во Брисел денеска продолжува објаснувачкиот скрининг за Поглавјето 21, „Трансевропски мрежи“, заедно со Поглавјето 15, „Енергетика“. На почетокот на објаснувачкиот скрининг за Кластерот 4, „Зелена агенда и одржлива поврзаност“, кое почна вчера, со Поглавјето 21 и Поглавјето 14, „Транспортна политика“, вицепремиерот Маричиќ рече дека македонските власти го знаат значењето на транспортниот сектор и дека со финансиска поддршка на ЕУ ќе продолжат да се спроведуваат значајни инфраструктурни проекти.

„Она што е битно да се каже е дека Европската Унија полага многу значење на овие области бидејќи се од суштинска важност за развојот на цела Европска Унија и за развојот на нашиот регион. Не може да има развој без развиена инфраструктура. Не може да има развиена инфраструктура без вложување во транспортната мрежа и без ефикасна транспортна мрежа. И како што видовте и на скринингот, целта на оваа политика е да се намали метежот, да се зголеми ефикасноста на транспортниот бизнис и да функционира инфраструктура беспрекорно и без пречки или со минимум неопходни пречки“, додаде вицепремиерот Маричиќ во изјавата за медиумите.

Пред претставниците на Европската комисија вицепремиерот и главен преговарач со ЕУ рече дека Северна Македонија е држава што е вклучена во транспортната заедница и дека учествува и во енергетската и во транспортната заедница преку иницијативата на Берлинскиот процес.

Вицепремиерот ја поздрави намерата на Европската комисија да вложи дополнителни напори во развојот на новиот европски транспортен коридор за Западен Балкан и напомена дека тоа практично е воведување на регионот во европските коридори потенцирајќи дека веќе учествуваме во два важни европски коридора, Коридорот 10, што е целосно комплетиран и кој може да биде и дополнет во наредниот период, како и Коридорот 8.

На крајот, Маричиќ изрази уверување дека Владата е посветена на подобрување на транспортната инфраструктура и има преземено активности, пред сè, во насока на изградба на алки што недостигаат и санација на постојната транспортна мрежа како дел од јадрото и сеопфатната мрежа на европските транспортни коридори.