Македонија
Маричиќ од Атина: Со визија, лидерство и работа сме блиску до членство и обединување на ЕУ со регионот

Вицепремиерот за европски прашања Бојан Маричиќ денеска во Атина учествуваше на меѓународната конференција, организирана од грчката фондација за надворешна и европска политика ЕЛИАМЕП на тема: „Перспективите за пристапување кон ЕУ на Западен Балкан во контекст на руската агресивна војна против Украина“.
На прашањето кое беше и тема на панелот: „Нов моментум за проширување: Како може Западен Балкан да не ја пропушти можноста?“, вицепремиерот одговори дека се потребни визија, лидерство и многу работа, додавајќи дека тоа не зависи само од регионот, туку и од самата ЕУ и следните чекори кои ќе преземе.
– Прво ќе почнам со визијата, ЕУ е унија на мирот и вредностите, ако не беше тогаш немаше да разговараме околу тоа дали Украина би требало да стане членка на ЕУ и ова е визијата којашто земјите од Западен Балкан треба да ја следат. Мислам дека сè уште се натпреваруваме со двата концепта, тој на национални држави кој е присутен кај земјите на Западен Балкан и концептот на вредностите на ЕУ, соработката, и што е можно помалку отворени билатерални прашања меѓу земјите. Ако го следиме концептот на вредности на ЕУ, тогаш треба да бидеме по солидарни и да работиме заедно, рече Маричиќ.
Вицепремиерот продолжи дека е потребно и лидерство повикувајќи се на прашањето која е цената на проширувањето, но исто така рече дека треба да се одговори и прашањето која е цената на непроширувањето, односно колку ќе ја чини ЕУ ако не се прошири.
– Ние сме опкружени со земји членки ма ЕУ, не сме некаде далеку, туку се наоѓаме на самиот двор на ЕУ, и бараме да станеме полноправни членки на Унијата. И нашата популација, на Западен Балкан, не е повеќе од 18 милиони луѓе, што не е повеќе од вкупната популација на Романија, затоа не веруваме во тезата дека проширувањето е тешко за апсорпција од страна на ЕУ, особено не што се однесува до заедничкиот пазар на ЕУ и економијата, додаде вицепремиерот Маричиќ.
Во таа насока Маричиќ објасни дека за нас не е важно и не ни пречело ако првите десет години откако ќе станете членка на ЕУ да немаме ваши комесари во ЕУ, укажувајќи на важноста да сме членки и да ја обезбедиме стабилноста и европскиот терк по кој ќе продолжи да се движи и развива државата.
– За нас воопшто не е важен бројот на комесари во Европската Комисија, за нас е важно да бидеме политички застапени во Европскиот Парламент и Судот на правдата. Но прво и основно за нас е приоритет нашите граѓани да ги почувствуваат реалните придобивки од членството во ЕУ. Затоа мислам дека ни е потребно лидерство и визија за да ги направиме овие тешки одлуки, укажа Маричиќ.
Како трет услов за да успееме Маричиќ рече дека треба многу да работиме, и тоа на две нивоа, на политичко ниво за да успееме да ја ставиме политичката волја во функција на донесување на храбри одлуки, а не тоа да остане само на убави зборови, што е случај во Северна Македонија каде ако ги прашате сите се за ЕУ, сите политички партии сите граѓански организации, сите експерти, буквално сите, но кога станува збор за донесување на важни одлуки повеќе од половината ќе ви кажат, знаете што, можеби ова е премногу, да почекаме уште 10 години, и во тоа е проблемот.
– Донесувањето на тешки и храбри одлуки е дел од интеграцискиот процес и земјите на Западен Балкан тоа треба да го направат. Колку е поголема политичката волја работите да ги придвижиме напред се по видливи и очигледни ќе бидат и резултатите, рече Маричиќ.
– Затоа мораме да направиме се за 2030 да не остане само една убава приказна, и 2030 треба да се гледа како можност а не како ветување. И никако ме треба да помислиме дека сега ќе почекаме уште 7 години за да станеме земја членка на ЕУ, туку напротив треба да работиме со посветеност и мотивација до нашата цел. Да биде 2030 дупла успешна приказна за земјите на Западен Балкан, кој после толку време ќе станат членки на ЕУ, но истовремено и за самата ЕУ која ќе се прошири со нови земји членки, порача Маричиќ.
Соговорници на Маричиќ беа Мирослав Гачевиќ, помошник министер, Сектор за политички и економски критериуми во процесот на пристапување во Европската унија, Република Србија Одета Барбулуши, советник на премиерот и национален Координатор за регионална економска област, Република Албанија, Јована Маровиќ, поранешен вицепремиер и министер за Европски прашања, Република Црна Гора и Срѓан Мајсторовиќ, Центар за европска политика (ЦЕП), Република Србија, а под модераторство на Симонида Кацарска, директорка на Институт за европска политика (ЕПИ).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски : Љубљана ќе биде град-партнер за развојот на Скопје

Остваривме извонредна и пријателска средба со долгогодишниот градоначалник на Љубљана, господинот Зоран Јанковиќ, објави актуелниот градоначалник на Општина Кисела Вода и кандидат за градоначалник на Скопје, Орце Ѓорѓиевски.
Средбата, додава тој, поминала во пријателска атмосфера, при што биле разменети значајни искуства и визии за идната соработка помеѓу Скопје и Љубљана.
„Добив драгоцени совети и поддршка од градоначалникот Јанковиќ, со јасна определба Љубљана да биде град-партнер и вистински пример за развојот и модернизацијата на Скопје.
Посебен акцент ставивме на најголемите предизвици со кои се соочува нашиот град – јавниот превоз и чистотата.
Градоначалникот Јанковиќ ни даде ветување дека експертски тимови од Љубљана ќе бидат континуирана поддршка за Скопје, но не само во овие сфери, туку и во секоја област во која ќе побараме помош.
Договоривме интензивна соработка и зајакнување на капацитетите на градот Скопје во насока на креирање, планирање и спроведување европски проекти.
Верувам дека преку ова партнерство ќе изградиме поефикасен и поевропски град Скопје, достоен за своите граѓани.
Со задоволство го потврдивме статусот на побратимени градови и во таа насока упатив срдечна покана до господинот Јанковиќ за негова официјална посета на Скопје, град кој сака да учи од најдобрите“, вели Ѓорѓиевски.
Македонија
Божиновска: Секој рудар мора да се врати дома безбеден и горд, инспекциите се засилени, а казните построги од кога било

Министерката за енергетика, рударство и минерални суровини Сања Божиновска денеска по повод Денот на рударите присуствуваше на свечената манифестација во РЕК Битола, заедно со претседателот на Владата, Христијан Мицкоски, и раководството на АД ЕСМ. Настанот беше можност да се оддаде почит кон рударите и да се нагласи нивното значење за економијата на државата.
Во своето обраќање, Божиновска истакна дека рударите се економски столб кои секојдневно се соочуваат со предизвици за да обезбедат стабилност и иднина за државата.
„Секојдневна битка со длабочината и темнината за ресурси кои ја движат економијата. Наша цел е секој рудар да се враќа дома безбеден и горд. Министерството стои цврсто зад секој рудар – со современа опрема, безбедни услови за работа и фер стандарди за сите,“ порача министерката.
Таа испрати и јасна порака кон компаниите што работат во секторот:
„За оние што вложуваат во безбедноста на рударите и заштитата на животната средина, поддршката е целосна. Но за оние што мислат дека можат да ја заобиколат законската регулатива – нема компромиси. Инспекциите се засилени, контролите се редовни, а казните построги од кога било. Законот важи за сите – без исклучок“, нагласи Божиновска.
Македонија
Шаќири: Албанците во Македонија се одлучувачки и државотворен фактор

Албанците во Северна Македонија се одлучувачки и државотворен фактор, и затоа оваа улога мора да се гарантира и почитува во секоја институција и на секое ниво на одлучување, велат од Алијанса за Албанците.
„Нашата политичка платформа се раководи од три основни принципи: Традиција, Одговорност и Развој. Овие принципи се столбовите врз кои го градиме нашиот визион за функционална, ефикасна и правична држава, каде Албанците и Македонците заедно ја градат подобрата иднина.
Убедени сме дека дојде време за нов политички договор меѓу Македонците и Албанците, кој ќе се темели врз реална еднаквост, заемна почит и стратешко партнерство. Само така може да се изгради стабилно општество и модерна, европска држава еднаква за сите“.
Алијанса за Албанците, како што нагласи Њомза Шаќири, портпарол на партијата, е политичка сила, позиционирана десно од центарот, која го брани албанскиот идентитет, јазикот и националните традиции, промовирајќи како што велат, истовремено индивидуална слобода, приватна сопственост, пазарна економија и одржлив развој.
„Наш приоритет е локалниот економски развој и зајакнување на општините преку реална децентрализација. Поддршката за младите, семејствата и локалните бизниси е во центарот на нашето политичко ангажирање, бидејќи само така се гарантира еднаков развој и долгорочна стабилност.
Ќе се залагаме за активна вклученост на граѓаните во одлучувањето и за тесна соработка со албанската дијаспора, која останува драгоцено национално и економско богатство“.
Според неа, Алијанса за Албанците, е решена да биде гласот на вистинската еднаквост и гарант на албанскиот национален интерес.
„Со нашата платформа и со нов договор меѓу Македонците и Албанците, ја отвораме патеката кон еднаква, функционална и европска држава“.