Македонија
Маричиќ од Брисел: Северна Македонија се соочува со голема важна битка за усвојување на уставните измени
Вицепремиерот задолжен за европски прашања Бојан Маричиќ, вечерва се обрати во Европскиот Парламент во Брисел, Белгија на семинарот организиран од пратеничката група Социјалисти и демократи, S&D на темата „Обликување на прогресивната агенда за проширување“.
Маричиќ на панелот ги рефлектираше најпрогресивните вредности на Европската Унија од каде што доаѓаат најнапредните и разумно базирани визии за иднината на оваа наша европска заедница.
Ова е движечката определба на групата на социјалистите и демократите во Европскиот Парламент од којашто во една исклучително сложена геостратешка ситуација произлегоа препораките кои што се преточија во Резолуција на Европскиот Парламент за сеопфатни реформи на Договорот за ЕУ.
„Резолуцијата за проширување е заснована на препораките од Конференцијата за иднината на Европа имајќи ги предвид и постоечкиот контекст, предизвиците и повеќекратните кризи со кои се соочуваат Унијата и светот како целина.
Во таа насока, Резолуцијата и во овој геостратешки момент ги потврдува политиките за проширувањето на ЕУ и потврдува дека проширувањето е најуспешен инструмент за затворање на отворените геостратешки прашања.
Вицепремиерот во своето обраќање истакна дека оваа политика се покажува како мотор на мирот, демократијата, владеењето на правото и благосостојбата во Европа за сите земји кои беа опфатени со претходните проширувања
„Резолуцијата истакнува дека ако ЕУ сака да биде геополитички играч, таа мора да остане отворен проект, а исто така предлага јасен рок: Пристапните преговори со земјите кандидати за следното проширување треба да завршат до крајот на 2030 година.“
Маричиќ истакна дека новиот пристап ја редефинира улогата на ЕУ како заедница на народи која презема иновации и лидерство во меѓународните односи и особено во политиката на проширување.
„Кога станува збор за Западен Балкан и за тоа колку е реална 2030 година како година за следно проширување на ЕУ со земјите од овој регион, тоа зависи само од секоја земја кандидат за членство во регионот и од Европската Унија.“
Со Планот за раст како составен инструмент на Пакетот за проширување Западен Балкан доби брза лента на патот за евроинтеграција на земјите од регионот со временска одредница во која што треба да се завршат домашните задачи.
Вицепремиерот пред парламентарната група истакна дека сега сме исправени пред момент кој претставува посебна шанса за земјите од Западен Балкан којашто треба да се искористи. Додавајќи дека лидерите на земјите од Западен Балкан е да ја прифатат одговорноста за да ја заокружат европската интеграција на својата земја како единствен пат кон просперитетна иднина.
Понатаму Вицепремиерот додаде дека за оваа Влада и неговата мисија како Вицепремиер е да се создадат услови граѓаните од регионот да се почувствуваат како е да се биде дел од Европската Унија многу порано од предвиденото, со фокус на реализација на Планот за раст и 2030 како индикативна година за приклучување.
За крај Маричиќ заклучи дека Северна Македонија се соочува со голема важна битка за усвојување на уставните измени, но не само за уставните измени, туку и борбата за победа на проевропскиот блок воден од социјалдемократите и прогресивните политички сили наспроти антиевропскиот блок кој има за цел да ја врати државата во тунелот во кој се наоѓаше државата 11 години во која општеството беше комплетно задушено.
„Во Северна Македонија следат најважните избори во последните 15 години. Ние се бориме да ја спасиме нашата држава од популизам и корупцијата, за што сум убеден дека ќе ја понесеме победата“
Убедени сме дека социјадемократите во Северна Македонија ќе се обединат со проевроспките сили во државата и ќе победиме на следните избори“
На семинарот „Обликување на прогресивната агенда за проширување“ организирана од Социјалистите и Демократите воведно обраќање имаше претседателката на S&D Ираче Гарсија Перез, по што се обратија преставници на социјал-демократските политички опции од Косово, Украина и Грузија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Центар наскоро ќе стане првата општина во земјава со систем за мерење на бучава, рече Герасимовски
Општина Центар наскоро ќе стане првата општина во земјава со систем за мерење на бучава во реално време, најави градоначалникот Горан Герасимовски. Според него, јавната набавка е завршена, а веднаш по изборите ќе бидат поставени 30 мерни единици на различни локации.
„Заврши јавната набавка, чекаме да поминат изборите за да ги поставиме мерните единици – првично 30. Преку мобилна апликација, секој граѓанин ќе може да провери каква е фреквенцијата на бучава на одредена локација“, изјави Герасимовски.
Системот, како што објасни, ќе им овозможи на граѓаните докази при пријавување во Министерството за внатрешни работи или до општинските инспекциски служби. Целта е брза и ефикасна реакција на прекршителите, особено во зони каде што постојат проблеми со прекумерна бучава од угостителски објекти и сообраќај.
Во вториот дел од изјавата, Герасимовски зборуваше за следниот голем проект на општината – постепено затворање на Дебар Маало за моторен сообраќај, со што ќе се намали хаосот со паркирањето и ќе се создаде подобар квалитет на живот за жителите.
„Имаме ревидиран проект за затворање на Дебар Маало. Тој е доставен до Министерството за внатрешни работи и веќе имавме два состанока со МВР за да го подобриме и да добиеме одобрување. Така и беше договорено на последниот состанок“, рече Герасимовски.
Планот е Дебар Маало да се затвора дел по дел, почнувајќи веднаш по завршувањето на изборниот процес, а првата рампа веќе е поставена.
„Веќе поставивме рампа на почетокот на Боемска улица. Разговараме за начинот на кој таа зона ќе функционира, и тоа ќе биде пример за затворање и на други населби каде што сообраќајот и паркирањето се хаотични“, додаде градоначалникот.
Македонија
Николоски го претстави планот за Николиќ во Дојран: Уредена плажа, патека и подобро електроснабдување
Потпретседателот на ВМРО-ДПМНЕ, Александар Николоски, при посетата на дојранското место Николиќ, најави повеќе инфраструктурни и развојни проекти за локалното население и туристите.
Николоски посочи дека приоритет е решавањето на проблемот со снабдувањето со електрична енергија, бидејќи местото брзо се шири со нови куќи и викендици.
Како втор проект го најави уредувањето и осветлувањето на пешачката патека што ќе води од населбата до плажата, која, според него, ќе стане туристичка атракција.
Трет приоритет е уредувањето на плажата Николиќ, која ќе добие концесионер со обврска да ја трансформира во современо туристичко место.
Николоски додаде дека се разговара и за изградба на културен дом и решенија за предучилишно згрижување на децата.
„Убеден сум дека Илија Николиќ ќе биде новиот градоначалник на Дојран и дека заедно ќе ги реализираме овие проекти со поддршка од Владата“, изјави Николоски.
Македонија
Мицкоски од Пробиштип повика на масовна излезност во вториот круг
Во првиот круг коалицијата којашто ја предводи ВМРО-ДПМНЕ освои 33 градоначалници. Двајца во меѓу време, помеѓу првиот и вториот круг, против кандидати на нашите кандидати се откажаа, што значи дека сега веќе се 35 градоначалници и во уште 24 општини сме во вториот круг. Во недела ќе се одлучува кој ќе биде градоначалник во тие 24 општини. Во 6 од тие 26 општини сме второпласирани, со тенденција и со голема шанса, бидејќи разликата е премногу мала, да бидеме првопласирани, рече претседателот на ВМРО-ДПМНЕ, Христијан Мицкоски на вечерашниот мини митинг во Пробиштип во рамките на изборната кампања под слоган „Вистинскиот избор! Твојот човек! Твоето место! За твојата иднина!“ за вториот круг од локалните избори во недела на 2 ноември.
Мицкоски изрази убедување дека коалицијата предводена од ВМРО-ДПМНЕ, после овие локални избори ќе има 59 градоначалници.
„Истовремено, дозволете ми да информирам дека во 58 општини советничките листи ан коалицијата предводена од ВМРО-ДПМНЕ победија и имаат убедливо мнозинство во Советот. Кога на сето тоа ќе се додаде и резултатот во Градот Скопје, односно убедливото водство на идниот градоначалник на Градот Скопје, Орце Ѓорѓиевски, 90 илјади наспроти 30 илјади, отприлика нешто повеќе од 3 спрема 1, очекуваме во вториот круг таа бројка да дојде до 120 можеби 125 илјади гласа. И убедливата победа на советничката листа на коалицијата предводена од ВМРО-ДПМНЕ за Град Скопје, доаѓаме до фантастична бројка од 60 општини во кои што се состои и Градот Скопје, нешто што до сега на ниту една политичка коалиција во независна Македонија не и се случило“, истакна Мицкоски.
Втората крупна политичка порака, вели Мицкоски, која сакам денес од Пробиштип да ја испратам, е дека конечно, партијата која повеќе од 20 години беше дел од сите влади во Македонија, Демократската унија за интеграција, на овие локални избори е поразена.
„Ние велевме на парламентарните избори пред година и половина ги развластивме и дека ќе дојде време, кога на локалните избори, тие ќе бидат поразени. И тие практично се поразени на овие локални избори“, рече Мицкоски.
Додаде дека во вториот круг имаме три опции, од кои првата е да се гласа за коалицијата која ја претставува ВМРО-ДПМНЕ, која е победничката коалиција, додека втората опција е поранешната владина коалиција предводена од СДСМ, која е опција која не враќа назад во времето и која ја ограбуваше, понижуваше и распродаваше Македонија.
„И третата опција, по мене, најкатастрофални е да останеме дома и да не излеземе на изборите и да дозволиме некој друг да одлучува во наше име“, дециден беше Мицкоски додавајќи дека со седењето дома никој не се казнува, туку со тоа се казнуваат самите граѓани кои не излегле на гласање.
Затоа, Мицкоски ги повика граѓаните на Пробиштип, но и на цела Македонија во недела на 2 ноември да излезат на гласање што е можно помасовно и да го дадат својот глас онака како што тие мислат дека е најдобро.
„Но, убеден сум дека кога ќе застанете позади параванот, со пенкалото во рака и со гласачкото ливче пред вас, ако го слушате разумот и вашето срце, и длабоко погледате во вашата душа, ќе видите и ќе препознаете дека таму извира бројот 9 и името на Тони Тоневски. И јас сум убеден дека тоа ќе биде вашата опција за следните четири години“, посочи Мицкоски.

