Македонија
Маричиќ: Преговорите со ЕУ го прават поквалитетно и побезбедно македонското рибарство според европски стандарди

Денеска, во Брисел, продолжува билатералната скрининг-агенда со состаноците за Поглавјето 13, „Рибарство“, од Кластерот 5, „Ресурси, земјоделство и кохезија“.
Билатералниот состанок со кратко обраќање го отвори вицепремиерот за европски прашања и главен преговарач со ЕУ, Бојан Маричиќ, потенцирајќи дека за Северна Македонија е важно да ги усвоиме стандардите поврзани со оваа област и на тој начин да ја отвориме можноста за граѓаните што се занимаваат со риболов, на вистински начин да станат поконкурентни за извоз на европскиот, но и на регионалниот пазар.
„Капацитетите се поставени, а остануваат предизвиците во однос на натамошното зајакнување на административните капацитети за управување со ресурси, инспекции и контрола на политиката за рибарство. Ќе се зајакне и капацитетот за контрола на нелегалниот, непријавен и нерегулиран риболов во согласност со барањата на ЕУ“, рече Маричиќ пред претставниците на Европската комисија.
Република Северна Македонија е земја без излез на море и има само внатрешен езерски риболов и аквакултура, затоа голем дел од правото на ЕУ за рибарство не е применливо и во тој контекст главниот преговарач со ЕУ, Маричиќ, нагласи дека немаме намера да бараме никакви отстапувања или преодни периоди во ова Поглавје, односно дека целосно го прифаќаме соодветното ЕУ-законодавство.
„Во однос на правната рамка, нивото на усогласеност дополнително ќе се подобри со усвојувањето на новиот закон за финансиска поддршка во рибарството и новиот закон за рибарство и аквакултура. Овие два закона, кои се во владина процедура, ќе обезбедат рамка за мерки на структурна политика и државна помош во рибарството и аквакултурата, како и организација на пазарот за риба и рибни производи“, посочи Маричиќ.
Заедничката политика за рибарство на Европската Унија вклучува прашања за експлоатација и управување со рибните ресурси, прашања за регулирање на пазарот на рибни производи, прашања за структурна политика, надзор и контрола, како и меѓународна соработка во рибарството.
Со достигнување на стандардите во ова поглавје ќе бидеме подготвени да повлекуваме пари од структурните фондови на ЕУ наменети за рибарство. Иако риболовот не е значајна стопанска гранка кај нас, треба да ја искористиме можноста што ја нуди членството во ЕУ и системски да ја регулираме оваа област за да обезбедиме економско, еколошко и социјално одржливо рибарство по европски стандарди и прописи.
Дел од македонската делегација беа и заменик-преговарачката со ЕУ и државна секретарка во СЕП, Дрита Абдиу-Халили, и шефот на Мисијата на Северна Македонија при ЕУ во Брисел, Зулфи Исмаили. Презентери се претставниците од работната група за Поглавјето 13, „Рибарство“, од Министерството за земјоделство, шумарство и водостопанство, Агенцијата за храна и ветеринарство, Државниот земјоделски инспекторат, Државниот завод за статистика, Агенцијата за финансиска поддршка во земјоделството и руралниот развој, како и Секретаријатот за европски прашања.
Билатералниот скрининг е за завршна фаза. Од Кластерот 5, „Ресурси, земјоделие и кохезија“, останува уште Поглавјето 13, „Безбедност на храна, ветерина и фитосанитарна политика“, кое ќе се одржи од 27 ноември до 1 декември. За целосно комплетирање на скрининг-процесот ни останува уште Кластерот 6, „Надворешни односи“, со двете поглавја 30 и 31, „Надворешни односи“ и „Надворешна, безбедносна и одбранбена политика“, кои се предвидени за првата недела од декември.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Во потрага по храна, мечка се качи на тераса од семејна куќа во Тетовско

Мечка се качила на тераса од семејна куќа во тетовското село Отуње.
Членовите на семејството биле во внатрешноста на куќата, па со мобилен телефон ја снимиле мечката качена на маса каде имало оставено храна, пишува „Тетово инфо“.
Според објавеното и во другите блиски села како Сетоле и Једоарце летово биле забележани слични примери на камери за видеонадзор.
„Мечките во потрага по храна, се движат низ селото, уништуваат сандаци со пчели и слично“.
Македонија
ОЈО со детали за големата акција: 13 лица под истрага за даночно затајување, перење пари и даночна измама, тргувале со горива

Денешната акција спроведена на повеќе локации низ државата е резултат на двегодишна предистражна постапка што ја водеше Основното јавно обвинителство за гонење на организиран криминал и корупција во тесна соработка со Управата за финансиска полиција, соопшти обвинителството.
Постапувајќи по кривичната пријава, надлежен обвинител од ОЈО ГОКК донел Наредба за спроведување на истражна постапка против 13 лица, меѓу кои се и четворица косовски државјани и една државјанка на Република Хрватска.
Осомничените се товарaт дека од 2014 до 2023 година организирале и учествувале во криминална група со цел стекнување противправна имотна корист преку даночно затајување, даночна измама и перење пари со што осомничените го оштетиле Буџетот на државата во големи размери. Групата креирала мрежа од правни субјекти преку кои се вршела продажба и фиктивна трговија со нафтени деривати, се изготвувале фактури со невистинита содржина, со цел да се избегне плаќањето на даночни обврски и да се оствари незаконски поврат на ДДВ. Преку правни лица што не поседуваат дозволи за трговија со нафтени деривати се вршела набавка, транспорт и продажба на Еуросупер, Еуродизел и Екстралесно гориво, со намера да избегнат целосно или делумно плаќање на законски предвидените даночни обврски. Продажбата во поголем број случаи се одвивала без издавање на фискални сметки и фактури, а средствата прибрани во готово не биле евидентирани во сметководствената документација. Осомничените странски државјани, кои формално биле назначени за одговорни лица во повеќе осомничени правни субјекти, немале регулиран престој во земјава, што организаторите на групата го користеле како начин за прикривање на нивната поврзаност со криминалното дејствување.
Воедно, организаторите на групата, од продадените нафтени деривати во готово пуштиле во оптек, примиле пари и извршиле пренос на паричните средства со намера да го прикријат нивното движење, со што се стекнале со противправна имотна корист во големи размери, а за која знаеле дека е прибавена со кривичното дело Даночно затајување, при што сториле и кривично дело Перење пари и други приноси од казниво дело.
Јавниот обвинител ценејќи дека се исполнети условите до судијата на претходна постапка при Основниот кривичен суд Скопје достави предлог за определување на мерка притвор за сите осомничени. До сега се обезбедени седум лица за кои е прифатен предлогот на обвинителството и судот со Решение им определи мерка притвор во траење од 30 дена, за останатите – петмината странски државјани и еден македонски државјанин мерката притвор ќе биде определена во отсуство.
Македонија
Муцунски-Јан Копман: разменети мислења за спроведувањето на реформската агенда, во фокусот и иницијативата „Роаминг како дома со ЕУ“

Министерот за надворешни работи и надворешна трговија, Тимчо Муцунски, денес и утре престојува во работна посета на Брисел, Кралството Белгија. Во рамки на посетата, денеска оствари средба со генералниот директор на Директоратот на Европската комисија за проширување и источно соседство, Герт Јан Копман.
На средбата беа разменети мислења за спроведувањето на реформската агенда, посветеноста на Владата да испорачува видливи резултати од реформските процеси, како и за Планот за раст како дел од пошироката европска поддршка за регионот. Муцунски нагласи дека Владата во изминатата година демонстрираше сериозна посветеност во исполнувањето на обврските од реформската агенда, постигнувајќи значителен напредок, особено во областите на дигитализацијата, владеењето на правото и борбата против корупцијата, при што истакна дека овие приоритети остануваат во фокусот на Владата и во наредниот период.
Се разговараше и за регионалната соработка, при што беше нагласена активната улога и придонесот на Република Северна Македонија во рамките на регионалните иницијативи, како и кон стабилноста и безбедноста на целиот регион.
Соговорниците се осврнаа и на актуелните геополитички и безбедносни предизвици во Европа. Во таа насока беше потенцирана важноста од продолжување на поддршката за Украина и потребата од заеднички, координиран пристап во справувањето со последиците од руската агресија.
Во фокусот на разговорот беше и иницијативата „Роаминг како дома со ЕУ“, насочена кон постепено укинување на трошоците за роаминг помеѓу земјите од Западен Балкан и Европската Унија. Одлуката за оваа иницијатива се очекува да биде донесена на почетокот на следната година.
Муцунски уште еднаш ја потврди цврстата посветеност на Република Северна Македонија кон процесот на европска интеграција како еден од стратешките приоритети во надворешната политика. Тој ја истакна и целосната усогласеност на државата со Заедничката надворешна и безбедносна политика на ЕУ, како и значењето на стратешкото партнерство со Европската Унија во областа на безбедноста и одбраната.