Македонија
Маричиќ: Романија е регионален партнер на Северна Македонија во реализацијата на патот кон ЕУ

Заменик претседателот на Владата задолжен за европски прашања, Бојан Маричиќ, денес одржа средба со министерката за надворешни работи на Романија Луминица Одобеску која е во работна посета во Северна Македонија.
Фокусот на средбата беа билатералните односи, постојаната поддршка на Романија за европската интеграција на Северна Македонија и други актуелни случувања во земјата.
Маричиќ ја истакна важноста на пријателската соработка и долгогодишната поддршка од страна на Романија која и ја дава на Северна Македонија на патот кон ЕУ. Поддршката е фокусирана во соработката која се реализира во повеќе сфери, меѓу кои борбата со корупцијата, правосудството, сајбер безбедноста, внатрешните работи и цивилната заштита.
На состанокот Маричиќ рече дека Владата е цврсто детерминирана во процесот на евроинтергација на државата, а пријателските односи на Северна Македонија со Романија влијаат позитивно во рамки на остварување на нашата стратешка цел.
„Соработката помеѓу нашите држави е од исклучителна важност на патот кон ЕУ, а позитивните искуства и пракса на Романија во евроинтегративниот процес се добар пример за спроведувањето на реформите кај нас. Романија е наш клучен партнер од регионот на Југоисточна Европа, со градење добри релации во регионот се реализира успешната регионална соработка и стабилен Западен Балкан и Југоисточна Европа“, рече Маричиќ на средбата.
На состанокот се разговараше и за искуството на Романија на нивниот пат кон ЕУ, како и предизвиците од сличен карактер кои со решавање и пристапувањето во унијата биле надминати со што се достигнал значаен развој за државата, а граѓаните стекнале поголема доверба во системот заради успешната транзиција.
Министерката за надворешни работи Луминица Одобеску изјави дека Романија близок пријател на Северна Македонија истакнувајќи ја поддршката за нашето приклучување во ЕУ. Одобеску рече дека ова е суштински момент за Северна Македонија, потенцирајќи дека се свесни за предизвиците со кои се соочуваме, од искуството на Романија на европскиот пат.
На крај на состанокот соговорниците потенцираа дека граѓаните на Северна Македонија ќе добијат многу поголема доверба штом ќе се надминат предизвиците, а процесот на реформи да продолжи на патот до ЕУ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
Тошковски – Поклукар: Одлична соработка на полето на безбедноста, Словенија ја дава својата поддршка во секој чекор

Денеска во Охрид, министерот за внатрешни работи Панче Тошковски, оствари работна средба со делегација на Министерството за внатрешни работи на Словенија, предводена од министерот Боштјан Поклукар.
На средбата фокусот беше ставен на унапредувањето на меѓусебната соработка и продлабочување на одличните пријателските врски меѓу двете министерства и полиции во борбата против организираниот криминал, ситуацијата со илегалната миграција, внатрешната контрола и соработката помеѓу центрите за обука на полициските службеници. Македонската делегација на средбата предложи потпишување на Меморандум за разбирање помеѓу Центарот за обука на МВР и словенечката полициска академија за зајакнување на соработката во областа на образованието и заедничките обуки на кадетите и полициските службеници од двете полиции.
Тошковски се заблагодари на министерот Поклукар за целата поддршка што Словенија и словенечкото министерство за внатрешни работи постојано ни ја даваат како министерство и држава, како во справување со пожарите минатата и оваа година така и целата поддршка што ни ја дадоа во справување со последиците од трагедијата која се случи во Кочани оваа година.
„Република Словенија и нивното министерство се едни од клучните партнери и поддржувачи во реформите кои ги правиме, преку користење на нивното знаење и искуство, како за новите закони за полиција и внатрешни работи. Отпочнуваме соработка и во нашата иницијатива за отворање на Регионална асоцијација на полициски академии, обуки за полициските службеници со цел професионализација, доедукација со цел креирање на ефикасна европска полиција“, образложи Тошковски.
ТПотенцираше дека преку министерот Поклукар, пријателската Словенија уште еднаш ја потврдува својата поддршка како еден од нашите најголеми поддржувачи во процесот на евроинтеграции, со тоа што се вложи со целиот негов тим да бидат на располагање на македонските полициски службеници и МВР во однос на исполнување на сите услови и критериуми зададени од Европската унија.
Словенечкиот министер за внатрешни работи Боштјан Поклукар го потенцираше пријателството и соработката што меѓу нашите народи и држави се пренесува и на министерствата за внатрешни работи и потенцираше дека и во иднина можеме да сметаме на нивната целосна поддршка како во искуство и знаење така и на конкретни проекти и ситуации со цел да придонесуваме кон поголема безбезбедност на регионот, нашите држави и нашите народи.
„Наша оценка е дека министерството за внатрешни работи и македонската полиција прават одлична работа и тоа секогаш сум го истакнувал и во Европа како член на советот на министри за внатрешни работи на Европа. Одличната идеја за Регионална асоцијација на полициски академии ќе ја поддржиме и учествуваме во неа за да креираме професионални полиции на Балканот за побезбеден регион за сите. Ние сме веќе сојузници заедно во НАТО и нашата поддршка ќе продолжи во секој ваш чекор кон приклучување во нашето европско друштво на нации каде е и вашето место“, потенцираше словенечкиот министер Поклукар.
Поклукар истакна дека Словенија целосно ја поддржува Македонија на интегративниот пат кон Европската Унија и ја изрази спремноста за помош на европскиот пат кој на крај носи огромни бенефити за граѓаните и функционирањето на институциите и изрази надеж дека заслуженото место на Македонија во ЕУ ќе дојде што поскоро.
Македонија
Меџити: Бит Пазар е економска и културна гордост на Чаир

Првиот вицепремиер и министер за животна средина и просторно планирање, воедно и кандидат за градоначалник на Општина Чаир, Изет Меџити, денеска оствари средба со трговците на Бит Пазар.
Во разговорот со нив, Меџити истакна дека Општина Чаир, иако нема индустриска зона и големи компании, се издвојува со голем број на мали и средни бизниси, со Старата Чаршија и со Бит Пазар, кои претставуваат економски и културен столб на нашата општина.
Тој нагласи дека Бит Пазар одиграл и продолжува да игра значајна улога во економската благосостојба на семејствата од Чаир и пошироко. Исто така, Старата чаршија, заедно со Скопското Кале и Бит Пазар, треба да функционираат како комплетна туристичка понуда за домашните и странските посетители.
Меџити се обврза дека трговците ќе бидат заштитени од нелојална конкуренција и дека ќе имаат институционална поддршка за развој на нивната дејност.
„Роден и израснат во Чаир, чувствувам дека Бит Пазар е вредност игордост за секој скопјанец. Затоа, мојата заложба е и институционално да помогнеме и да го развиеме овој историски, економски и културен капитал,“ нагласи Меџити.