Македонија
Маричиќ: Улогата на парламентот во пристапните преговори ја дефинираме со меморандум за соработка
Заменик-претседателот на Владата задолжен за европски прашања и главен преговарач со Европската Унија, Бојан Маричиќ, во своето обраќање на 20-тиот состанок на Мешовитиот парламентарен комитет помеѓу Северна Македонија и ЕУ ја истакна важноста за вклучување и соработка со разни општествени фактори ставајќи акцент на парламентот како клучна институција за напредокот на преговорите и нивната динамика.
„Парламентот е значаен партнер во пристапувањето во Европската Унија и затоа улогата на неговите тела – Комисијата за европски прашања и Националниот совет за евроинтеграции, ќе ги дефинираме преку меморандум за соработка. Согледувајќи ја важноста да се има национален консензус, ќе ги направиме сите напори опозицијата да се вклучи во процесот“, рече Маричиќ.
Тој рече дека Северна Македонија ја има предвидено својата динамика во однос на полноправното членство во Европската Унија и конкретно во однос на нашите подготовки за скрининг-процесот и последователните активности давајќи краток осврт на усвоената преговарачка структура, која моментно се операционализира, а се заснова на долготрајните механизми за координација на ЕУ, но ги одразува и новитетите на ревидираната методологија на ЕУ за пристапни преговори.
Маричиќ во Европскиот парламент ги истакна своето задоволство за поддршката што ја добиваме преку активностите во рамките на дијалогот „Жан Моне“ и изрази верување дека соработката ќе се интензивира и дека искуството на европратениците и редовната комуникација со пратениците од Собранието на Северна Македонија ќе бидат од исклучителна помош за тоа како дополнително да ја подобриме улогата на парламентот како форум за конструктивен политички дијалог.
Вицепремиерот и главен преговарач со Европската Унија ја искористи можноста и накусо ги информира европратениците за текот на скрининг-процесот, за успешно завршените преговори за договорот за статус со ФРОНТЕКС и го најави потпишувањето на договорот за неколку недели.
„Со гордост можам да кажам дека Северна Македонија е првата земја од регионот што го има договорот според регулативата за европска гранична и крајбрежна стража од 2019 година. Во делот на владеењето на правото, во тек се активностите за подготовка на нова судска стратегија, како и процесот на дигитализација на судството“, информира Маричиќ додавајќи дека финансиските истраги продолжуваат, а се очекува предлог-законот за Управата за наплата на имотот да влезе во собраниска процедура.
Денеска, во Стразбур продолжува вториот ден од седницата на Мешовитиот парламентарен комитет помеѓу Северна Македонија и ЕУ, со важни точки на дневен ред за развивање дебата, како енергетската криза и животна средина, добрососедските односи и регионалната соработка и извештајот на дијалогот „Жан Моне“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерството за животна средина отстапи движни ствари на повеќе општини, за потребите на училиштата вклучени во ГЛОБЕ програмата
Владата, на предлог на Министерството за животна средина и просторно планирање, донесе одлука со којашто движни ствари во сопственост на министертството, се даваат на трајно на повеќе општини во државата, за потребите на повеќе основни училишта и тоа во Гевгелија, Неготино, Валандово, Битола, Прилеп, Тетово, Куманово, Пробиштип, Ранковце, Велес, како и на училишта во скопските општини: Центар и Карпош.
Целта е спроведување на ГЛОБЕ програмата во Република Северна Македонија, а Министерството за животна средина и просторно планирање, како што е посочено, е носител на активностите на ГЛОБЕ програмата и со владина одлука е задолжено да обезбеди хемикалии и инструменти за вршење на мерењата и да ги пренесе на користење на вклучените училишта во програмата.
Станува збор за движни ствари што ќе им бидат од полза на училиштата во спроведувањето на проектот, а коишто, по пат на јавна набавка ги обезбедило ресорното министерство.
Македонија
Одлука за учество на Армијата во НАТО операцијата „КФОР“ во Косово
Владата, на предлог на Министерството за одбрана, донесе Одлука за определување на бројот на кандидати кои се запишуваат на Воената академија „Генерал Михаило Апостолски“- Скопје, во студиската учебна 2024/2025 година, чие образование се финансира од Буџетот на Република Северна Македонија.
Со одлуката е определено, во студиската учебна 2024/2025 година да се запишат 44-ца студенти/питомци како редовни студенти, од кои 25-мина студенти/питомци за потребите на Министерството за одбрана – Армијата на Република Северна Македонија; како и тројца студенти/питомци за потребите на Војската на Црна Гора; шестмина студенти/питомци за потребите на вооружените сили на Босна и Херцеговина; петмина студенти за потребите на управување со кризи и петмина студенти за потребите на заштита и спасување.
Согласно Законот за Воената академија, како што е образложено од ресорното министерство, на Академијата можат да студираат и припадници на вооружените сили на странски држави и странски државјани.
Владата, на предлог на Министерството за одбрана, донесе и Одлука за испраќање припадници на Армијата на Република Северна Македонија за учество во НАТО операцијата „КФОР“ во Република Косово.
Македонија
Заклучоци на Владата по случувањата со новиот стадион во Тетово: да се прекине со работите на теренот, додека нема правна разврска на случајот
Владата на Република Северна Македонија, по побарано мислење од Уставниот суд, го разгледа случајот со користењето и случувањата околу Новиот стадион во Тетово и донесе неколку заклучоци.
Владата, во разгледувањето, ја имаше предвид иницијативата до Уставниот суд, за оценување на уставноста и законитоста на постапките поврзани со Стадионот, а каде е посочено дека Новиот фудбалски стадион, со владина одлука во 2015 година, е даден на трајно користење, без надомест на Општина Тетово. Општината, како што е наведено, без законски основ, го дала Стадионот на трајно користење на ЈП „Тетово транспорт“. Дури, градоначалникот на Општина Тетово, Општина Тетово и ЈП „Тетово транспорт“, на јавен настан промовирале проект за рушење и изградба нов градски стадион.
Владата при носењето на заклучоците на денешната седница ги зеде предвид и одредбите на Законот за користење и располагање со стварите во државна сопственост и со стварите во општинска сопственост, според коишто, надлежност да дава на трајно користење и да утврдува престанок на корисничко право, има само Владата на Република Северна Македонија.
Заклучено е, Генералниот секретаријат на Владата да подготви комплетна информација во врска со статусот на објектот Нов фудбалски стадион – Тетово, КП бр. 11476. Во меѓувреме, да се испрати укажување до Општина Тетово, да се прекине со работите на теренот, додека нема правна разврска на случајот. Исто така, Владата одлучи да се обрати со препорака до Уставниот суд, да ја земе предвид итноста на овој случај и да се произнесе во врска со поднесената Иницијатива за оценување на уставноста и законитоста на постапувањето во него. Владата заклучи и да се разгледаат правни основи, согласно Кривичниот законик, за покренување соодветна пријава до надлежните органи, во врска со овој случај.