Македонија
Марли – прегазен од камион во Радишани, пристигна во новиот дом во Англија

Кучето Марли, кое со неговиот тажен поглед, а откако беше прегазено од камион, ги освои срцата на многу љубители на животни во земјава, пристигна во новиот дом во Велика Британија.
Пред само четири месеци, социјалните мрежи беа преполни со фотографии од бездомното куче, удрено од камион и оставено да искрвари на улица во населбата Радишани. Неговиот живот беше на конец, се собираа донации од хумани граѓани и конечно, по четиримесечна голгота и со помош на посветени активисти за заштита на животните, Марли, кој поради ударот го загуби видот на едното око, си го најде својот дом.

Марли во новиот дом
За приказната да биде уште потрогателна а во исто време и посреќна, сведочи и фактот што Марли беше посвоен од семејство кое веќе има згрижено друго куче, од Охрид.
„Хелен и Тони веќе ја посвоија Матеа, која беше родена со едно око. Тие живеат во Спалдинг, во мало рурално гратче со огромна градина каде што кучињата можат слободно да си играат. Хелен и Тони работат од дома, па имаат доволно време да им се посветат на своите миленици. Марли во неделата попладнето пристигна во својот нов дом и се запозна со новите членови на семејството“, изјави за „Макфакс“ Џеки Браун, координатор на организацијата Блајнд дог рескју (Blind Dog Rescue UK), која помага и посредува да им се најде дом на слепи животни и на кучиња и мачиња со оштетен вид да најдат соодветен дом.
Од ноември 2017 година до сега, благодарение на оваа организација од земјава најден им е дом на повеќе од 35 мачиња и 10 кучиња, сите слепи или со оштетен вид.
На истиот начин својот дом во Велика Британија го најде и Марли, кучето кое едвај преживувало на скопските улици, настрада од несовесен возач, го изгуби видот на едното око, а сега вториот живот му започнува на 2.000 километри подалеку од земјава.
Редакцијата на „Макфакс“ му посакува среќен живот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Минчев на конференција на ЕК во Црна Гора: Извештаите за нас не се формалност туку алатка за реформи во јавната администрација

Министерот за јавна администрација, Горан Минчев, учествуваше на министерска конференција „Капацитети на јавните администрации за интеграција во ЕУ“ во Подгорица, Црна Гора, организирана од Европската комисија со поддршка на СИГМА.
На настанот учествуваа министри и претставници од земјите на Западен Балкан, Молдавија и Ерменија, како и од регионалните и меѓународните организации како ReSPA, RCC, OECD, WeBER и SIGMA.
Во излагањето во рамки на првиот дел на конференцијата, министерот Минчев изјави дека силата на јавната администрација не се одразува во бројки, туку во нејзиниот квалитет и капацитет да испорачува резултати, односно таа треба да биде двигател на реформите, гарант на правната држава и партнер во процесот на интеграцијата во Европската Унија.
Тој потенцираше дека препораките од Извештајот на СИГМА не останаа само на хартија, туку истите беа преточени во конкретни мерки и активности, интегрирани во акциски план кој веќе се спроведува, дополнително вградени и во ревизијата на Стратегијата за реформа на јавната администрација.
„Ние не гледаме на извештаите само како формалност, тие се алатка за реални промени. Реформите мора да имаат практичен ефект врз институциите и граѓаните, а не да останат декларативни“, рече министерот Минчев.
Тој смета дека е клучна улогата на меѓународната поддршка, со посебен акцент на ReSPA и SIGMA, како партнери во процесот на реформите преку обуки, експертска помош и размена на искуства со земјите-членки на ЕУ.
„Визијата на Министерството за јавна администрација е да изградиме администрација која активно ќе придонесува во креирањето и имплементацијата на европските политики. Македонија не гледа на процесот на интеграција како еднонасочен пат – нашата цел е да бидеме препознаени како сериозен партнер во Унијата и пример за лидерство во регионот“, рече министерот Минчев.
Од Министерството за јавна администрација велат дека остануваат целосно посветено на реформите кои ја носат Македонија поблиску до европското семејство, со силна заложба за создавање на модерна, ефикасна и транспарентна администрација, која ќе обезбеди институциите да бидат сервис на јавниот интерес.
Македонија
Локалната власт е одговорна за одржување на депонијата во Струга, порача Министерството за животна средина

Министерството за животна средина и просторно планирање потсетува дека управувањето со комуналниот отпад е законска обврска на општините.
Од таму додаваат дека согласно Националниот план за управување со отпад 2021–2031 и регионалните планови, општините се должни да обезбедуваат собирање, транспортирање, селекција и расчистување на отпадот на нивната територија.
„Во моментот се работи на воспоставување на регионален центар за обработка и систематизирање на отпад, кој ќе обезбеди трајно и системско решение за управување со отпадот во регионот.
Сепак, додека овој центар не биде изграден и ставен во функција, општина Струга има должност редовно да ја одржува и исчисти постојната депонија, со цел да се спречат дополнителни еколошки и здравствени ризици и да се обезбеди минимален стандард на заштита на животната средина и здравјето на граѓаните“.
Министерството за животна средина и просторно планирање останува достапно за поддршка во рамки на своите надлежности, но одговорноста за редовното управување и одржување на депонијата е на локалната самоуправа, потенцираат во соопштението.
Македонија
Алиу во Липково: Ќе ги разгледаме можностите за воведување ургентна стоматологија во Здравствениот дом

Министерот за здравство, Азир Алиу, денеска го посети Здравствениот дом во Липково, каде одржа средба со директорото, Евзи Исуфи.
– Раководството на оваа установа, предводено од директорот Евзи Исуфи, има визија за долгорочно унапредување на здравствениот дом, што е во интерес на пациентите и на самите здравствени работници. Токму во таа насока, информиран сум дека со новиот буџет раководството на оваа установа има предвидено реновирање на целиот прв кат каде се сместени амбулантите и лабораторијата, рече министерот Алиу во рамки на посетата.
Беше појасенто дека во делот на унапредување на кадарот, во моментот тројца доктори од Здравствен дом Липково се упатени на специјализација, во областите педијатрија, медицина на труд и клиничка биохемија.
– По завршување на изборниот процес, со оглед на законските процедури, веднаш заедно со раководството и со нашата правна служба ќе ги разгледаме можностите за воведување ургентна стоматологија, односно итна стоматолошка помош, истакна Алиу.