Македонија
„Мајскиот договор“ е противуставен – ДПМНЕ зад затворени врати го факторизира владеењето на ДУИ од сенка, вели партијата Левица

„Врската помеѓу ДПМНЕ и ДУИ никогаш не била прекината! Таа повторно излезе на површина откако доцна во ноќта зад затворени врати од јавноста, пратениците од т.н. Европски фронт ѝ помогнаа на коалицијата ДПМНЕ-ЗНАМ-ВРЕДИ на шверцерски начин да го донесе Законот за реорганизација на министерствата. Со помош на ДУИ, беше овозможено отворање на 4 нови министерства, чија примарна цел е ухлебување на партиска војска на ДПМНЕ и задоволување на апетитите на олигархијата што ја спонзорира Партијата, како и полесно распределување на колачот помеѓу Широката коалиција“, велат од партијата Левица.
„Неформално во јавноста протече информација дека на полноќните средби на кои се пазарело уредувањето на државниот апарат, условот за обезбедување на 2/3 мнозинство од ДУИ било барањето за озаконување на т.н. „Мајски договор“, односно – во иднина Влада да се формира со Бадентерово мнозинство помеѓу победниците од двата наметнати етнички политички блока.
Ваквиот законски услов за формирање на Влада би бил целосно спротивен на Уставот на Република Македонија, кој во член 51 предвидува дека законите во Републиката мора да бидат во согласност со Уставот! Уставот не предвидува никакво посебно мнозинство за избор на Влада, ниту пак Бадентер, туку јасно определува во член 90 дека Владата на предлог на мандаторот и врз основа на програмата, ја избира Собранието само со мнозинство гласови од вкупниот број пратеници.
Прифаќањето на овој предлог на ДУИ би значело официјализирање на противуставниот и антимакедонски концепт на бинационална држава и озаконување на етнотрибалистичката антиевропска политика која сè повеќе ја загрозува унитарноста и демократијата во Република Македонија!
Левица цврсто стои на ставот дека за тенденциозните балистички барања кои го нарушуваат унитарниот карактер на државата и државниот суверенитет, без разлика од која партија доаѓаат, ДУИ или ВЛЕН треба да бидат одбиени! Воедно, Левица во својата програма предвидува забрана за етнички партии, бидејќи пракса во сите демократски земји е партиите да се формираат врз основа на идеолошки определби, а не според етнички или религиски групирања!
Заради избегнување на ваквите националистички уценувања и тенденции, и покрај огромните идеолошки и програмски разлики, имајќи го предвид државниот и национален интерес, вклучително и интересите на сите македонски граѓани, Левица понуди бланко поддршка до ДПМНЕ за да не изгласаат балист од партија со освоени два пратенички мандати да раководи со Собранието, како и условна поддршка за реорганизацијата на Владата со воведување на една изборна единица, која при ваквите етноблоковски поделби, ќе овозможи закрепнување и дополнително обезбедување на унитарниот карактер на државата“, се наведува во соопштението на партијата Левица.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
„Ве чекам во 20 часот, на плочникот кај Градски ѕид“, Герасимовски повика на концерт

Градоначалникот на Општина Центар, Горан Герасимовски, ги повика сите скопјани, вечерва да бидат дел од културната манифестација „Центарска симфонија“ што ќе се одржи на плочникот кај Градски ѕид (Клуб на новинари, зади Соборниот храм) со почеток во 20:00 часот.
Александар Тарабунов и камерниот оркестар вечерва ќе ги интерпретираат најпознатите мелодии од македонската и светската кинематографија, специјално аранжирани во ново, симфониско руво. Меѓу нив се и култните музики од „Исправи се Делфина“, „До Балчак“, како и новата песна на музичката ѕвезда Тарабунов „Заедно“, која за првпат ќе биде изведена со камерен оркестар.
„Оваа вечер ја посветуваме на музиката која нè обединува, Центар повторно станува сцена на културното доживување. Повелете сите, со пријателите, со семејствата, заедно да уживаме во спојот на класичното и модерното, на звуците што раскажуваат приказни. Музиката е најубавиот начин да се сплотиме, Ве поканувам на добра музика и убава летна саботна вечер. Ве чекам во 20 часот, на плочникот кај Градски ѕид“, вели Герасимовски.
Влезот е слободен за сите граѓани. Настанот е во организација на Општина Центар, во партнерство со МГ Мјузик продукција.
Македонија
Филипче на конгрес на СПД во Берлин: Средба со германскиот вицеканцелар Клингбајл

Претседателот на Социјалдемократскиот сојуз на Македонија, Венко Филипче, денеска, ќе присуствува на конгресот на германската Социјалдемократска партија (СПД), кој под слоганот „Промената започнува со нас“ се одржува во Берлин, Сојузна Република Германија, соопшти утрово СДСМ.
Во рамки на конгресот претседателот Филипче ќе има средба со актуелниот вицеканцелар на Германија и сојузен министер за финансии, Ларс Клингбајл кој воедно е и ко-претседател на СПД. Предвидени се и билатерални средби со европски политичари и функционери присутни на конгресот.
На конгресот, на кој, меѓу другото, ќе се избира и новото раководство на СПД, ќе присуствуваат истакнати актуелни германски политичари и функционери, како и претседатели на социјалдемократски партии од Европа.
Поканата за присуство на Филипче на овој конгрес од СДСМ ја сметаат за израз на заедничката заложба за европска иднина, социјална правда и регионална соработка, засновани на вредностите на социјалдемократијата – еднаквост, солидарност и демократија.
Македонија
УХМР: Денес температури до 36 степени и ветер кој на места ќе дува и со над 70 километри на час

Управата за хидрометеоролшки работи за денес прогнозира сончево време со мала до умерена локална облачност. Ќе дува умерен до засилен ветер од северен правец кој локално може да достигне и над 70 километри на час.
Максималната температура ќе биде во интервал од 27 до 36 степени.
Во Скопје, сончево со мала до умерена облачност и со умерен до засилен северен ветер. Максималната температура ќе достигне до 34 степени.