Изминатото деноноќие во општините Дебар и Центар Жупа, каде што е прогласена кризна состојба, помина мирно, а безбедносната состојба е стабилна. Во полициската станица во Дебар и во полициската канцеларија во Центар Жупа не се регистрирани собирања на граѓани на јавни места, нема нарушувања на јавниот ред и мир, кражби или други имотни деликти и не се регистрирани сообраќајни незгоди.

Активностите на полициските службеници се во согласност со оперативниот план за работа и во координација со локалната самоуправа, со кризниот штаб, со Центарот за управување со кризи и се во насока на контрола на целото подрачје, еособно на угостителските и другите јавни објекти (маркети, ноќни клубови, фитнес-салони, обложувачници). Целта е доследно спроведување на мерките за спречување внесување, ширење и за сузбивање на коронавирусот.

„На терен без проблеми и застои се спроведуваат мерките за контрола на патнички и други моторни возила за влез во Дебар и Центар Жупа. Непречено се одвива дотурот на храна, лекови, средства за лична хигиена и други потреби за граѓаните во двете општини. Сите правни лица што вршат дотур треба да се најават во Кризниот штаб на фиксниот телефон 046/831 051 по што нивните возила со полициска придружба ќе бидат спроведени до трговските објекти во двете општини. Потсетуваме дека влезот им е дозволен само на лица што се жители на општините, а истовремено оневозможен е, односно строго им е забранет излезот на сите граѓани затекнати на подрачјето на двете општини“, соопшти МВР.

Од МВР апелираат до граѓаните на Дебар и Центар Жупа, но и до сите граѓаните во државата, строго да се придржуваат до препорачаните мерки и насоки усвоени од Владата во врска со спречувањето на ширењето на коронавирусот (Ковид-19), а сите правни и физички лица строго да се придржуваат до насоките на полициските службеници. Сите оние што ги прекршуваат дадените препораки, ќе бидат санкционирани во согласност со член 205 и 206 од Кривичниот законик.