Македонија
МВР го истражува хакерскиот напад на веб-страницата на ДИК

„Се случи хакерски напад на веб-страницата на ДИК за што го известивме МВР за сајбер-криминал. Тие денеска беа тука и се надевам дека бргу ќе откријат за што се работи. Тоа беше надворешен напад“, информира денеска претседателот на ДИК, Оливер Дерковски.
Според него, станува збор за хакерски напад, кој предизвикал мало одложување на оперативната активност.
„Притоа се појавија разни лажни вести, кои ги демантирам. ДИК работи во согласност со Законикот и има постапка со која ги добиваме сите материјали. Во текот на ноќта постојано работевме, овој пат тоа беше подолго, но е поради разбирливи причини, бидејќи беше пролонгирано заворањето на избирачките места. Ниту од серверот не може да се појават вести со изборни резултати. Се обидовме да ги забрзаме резултатите со софтверски систем, но бевме цел на хакерски напад и не можевме да ги презентираме. Ве уверувам дека апликацијата беше во функција. Со ова сакам да се извинам за можеби малото доцнење бидејќи мора да се обработат сите записници, број 16, од секое избирачко место“, рече Дерковски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Аеродром изрече прекршочна казна од 88.000 евра на ЈП „Комунална хигиена – Скопје“

Општина Аеродром изрече прекршочна казна во износ од 88.000 евра на ЈП „Комунална хигиена – Скопје“ поради, како што велат, континуирано нефункционирање, несоодветно собирање отпад и негрижа за јавната хигиена на нејзината територија.
„По долг период на трпение и многубројни укажувања, Општина Аеродром изрече прекршочна казна во износ од 88.000 евра на ЈП „Комунална хигиена – Скопје“ поради континуирано нефункционирање, несоодветно собирање отпад и негрижа за јавната хигиена на нејзината територија. Оваа санкција не е политичка, туку институционална како резултат на утврдени пропусти во работата на претпријатието. Дополнително, жителите на Аеродром секојдневно се обраќаат до Општината со поплаки за преполни контејнери, неподнослива нечистотија на улиците во сите населби, иако редовно и уредно ги плаќаат комуналните давачки секој месец“, велат од Општината.
„Како градоначалник, сметам дека ова не е нормална и прифатлива состојба“, изјави в. д. градоначалникот Дејан Митески и додаде дека Општина Аеродром нема да дозволи да биде заложник на нечија неспособност и неодговорност.
Тој ги повика надлежните од „Комунална хигиена“ да ги преземат сите неопходни мерки за чиста животна средина и конечно да почнат да работат во интерес на граѓаните.
Митески најави дека Општината ќе продолжи со засилен надзор и санкции за секој што не ја извршува својата работа.
✅ Остануваме транспарентни и на страната на граѓаните!
Македонија
Санацијата на поранешното кино „Партизан“ во Битола, вредна 94 милиони денари, ќе почне месецов

Министерот за култура и туризам, Зоран Љутков, денеска оствари работна посета на дел од институциите од областа на културата во Битола. На средбите со директорите на Центарот за култура, на Народниот театар и на Заводот и музеј – Битола се разговараше за текот на реализацијата на проектите и тековните предизвици со кои се соочуваат овие установи.
Љутков информираше дека во Заводот и музеј – Битола е реализиран проектот за реставрација на предната фасада во вредност од 1,2 милиони денари, а во текот на годината ќе се реализира и партерно уредување на лапидариумот со дополнителни 1,4 милиони денари. Реновирана е и сувенирницата со сопствени средства на институцијата, што придонесува за туристичката понуда на градот.
Посебен акцент е ставен на капиталниот проект за реновирање на постојаната музејска поставка, за кој се издвоени 2 милиони денари. Во рамките на новиот концепт ќе биде вклучена и спомен-собата на познатиот битолски музичар Кирил Македонски, по повод 100-годишнината од неговото раѓање.
Министерот истакна дека археолошките истражувања, кои во изминатите години беа сведени на минимум, сега добиваат поддршка и нова динамика со што доживуваат вистинска ренесанса.
„Издвоивме еден милион денари за археолошките истражувања на локалитетот Градиште во с. Црнобуки, обезбедивме 12 милиони денари за тригодишниот проект за конзерваторски и реставраторски работи на ентериерот на Јени џамија, што подразбира ѕидно сликарство, дрвени, метални, мермерни, гипсени и фајансни декоративни елементи, како и мобилијар. Претходно, пак, со 2 милиони и со 2,5 милиони денари се реализираа и проектите за конзервација и реставрација на фасадите на спомен-куќите на македонските револуционери Гоце Делчев и Стив Наумов“, информираше Љутков.
Министерот го најави и капиталниот проект за реконструкција, санација и адаптација на објектот на поранешното кино „Партизан“, вреден 94 милиони денари. Договорот е веќе потпишан, а реализација треба да започне до крајот на месецов.
Македонија
(Фото) Хеликоптер на МВР спаси повредено лице од непристапен терен на Јабланица

Денеска полициски службеници од Хеликоптерската единица при МВР, а по претходно добиено барање за преземање на активности во врска со спасување на повредено лице на падините на планината Јабланица, струшко, заедно со тим од САЕ „Тигар“, со хеликоптер се упатија на одредената локација за спасување на лицето.
„По пристигнување на посочениот терен и прецизно лоцирање на повреденото лице истото беше безбедно евакуирано од страна на полициските службеници и транспортирано до Меѓународниот аеродром „Св. апостол Павле“ во Охрид, од каде што беше преземено од Итна медицинска помош и транспортирано за натамошно укажување на лекарска помош“, соопшти МВР.
Претходно од Црвен крст Охрид известија дека утрово добиле аларм за интервенција на планината Јабланица, каде женска особа од Струга, се здобила со сериозна повреда на скочен зглоб.