Македонија
МВР: До 12 часот 39 отсто помалку настани за нарушување на изборниот процес споредено со ланските избори
До сега Министерството за внатрешни работи нема регистрирано посериозни нарушувања на јавниот ред и мир во текот на гласањето, кое, генерално, се одвива мирно, без проблеми. До 12.00 часот, денес, има за 39% вкупно намалување на бројот на настани во споредба со изборите во јули 2020 година. Покрај настаните за кои претходно информиравме, регистрирани се и следниве настани:
„ Денеска (17 октомври) во 13.15 часот во СВР Тетово било пријавено дека бил нарушен јавниот ред и мир со физичка пресметка помеѓу две лица во дворот на основното училиште „Лирија“ во гостиварското село Рачане, а во кој објект било сместено избирачкото место број 528. Двете лица се идентификувани и се преземаат мерки за расчистување на случајот.
– По добиена пријава дека непознати лица со две патнички возила вршат изборен поткуп во Топанско Поле и Шуто Оризари, полициски службеници од Полициското одделение Шуто Оризари на ул.„Х.Ј.Шишков“ извршиле преглед на патничко возило „форд“, управувано од И.Х.(45). Се преземаат мерки за расчистување на случајот.
– Во 11.55 часот во СВР Скопје, Д.З. пријавил дека во основно училиште во Добри Дол, општина Сопиште, О.Ц. и С.Н. позади училиштето агитирале и вршеле притисок врз гласачите. Според пријавеното, претходно О.Ц. била отстранета од местото од полицискиот службеник кој го обезбедува гласачкото место. Се работи на расчистување на случајот.
– Во СВР Скопје, Љ.Ј. пријавила дека на избирачко место основното училиште „Гоце Делчев“, Љ.А. стои на гласачкото место и врши притисок врз гласачите. Полициски службеници излегле на местото и Љ.А. е повикан во полициска станица за расчистување на случајот.
-Во ОВР Кочани, член на избирачкиот одбор од гласачко место бр.0883 во с.Теранци, општина Чешиново-Облешево, пријавил дека на гласачко место дошол Г.К. и со лажни документи се претставувал дека е претставник од Државната изборна комисија. Се преземаат мерки за расчистување на случајот.
-Во 12.05 часот во ОВР Кавадарци, претседател на избирачки одбор на избирачко место 0661 во основното училиште „Киро Спанџов“ во Кавадарци пријавил дека едно лице со телефон ја снимало просторијата каде се врши гласање. Се преземаат мерки за расчистување на случајот.
-Околу 11 часот во СВР Куманово, М.П. пријавил дека во близина на избирачки места на ул.„Панче Пешев“, на градскиот плоштад во Куманово и на ул.„Тоде Мендол“ имало отворен штаб на политичка партија со залепени плакати на кандидат за градоначалник, поставен билборд и залепени плакати од политички партии. Се работи на расчистување на случајот.
– Во СВР Скопје, претседател на избирачкиот одбор на гласачкото место 2801 пријавил дека на гласачкото место Д.С. кај себе имал повеќе летоци од различни политички партии. Д.С. е приведен и против него ќе биде поднесен соодветен поднесок.
– Во 10.50 час во Полициското одделение Зајас – СВР Охрид, претседател на избирачки одбор на избирачко место бр.0823 во с.Букојчани пријавил дека лице што гласало го фотографирало гласачкото ливче. Се преземаат мерки за расчистување на случајот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Лабудовиќ: Четири дена пред гласање, Герасимовски се слика со ракавици на рацете како чисти контејнери
Кандидатот за градоначалник на Центар, Мирослав Лабудовиќ, упати повик до жителите на неговата општина да му ја дадат довeрбата на 2 ноември да ја води општината во следните четири години.
„Време е за промена во Центар. Резултатите од гласањето во првиот круг недвосмислено покажаа опозициско расположение во општината. Близу 2/3 од тие што излегоа на изборните места, гласаа против актуелниот градоначалник Горан Герасимовски. Затоа што сакаат промена на нештата, сакаат нешто ново, поинакво – а тоа значи нова визија, нова енергија, непресушна река на идеи и проекти за подобрување на секојдневниот живот на граѓаните. Но, и нивно активно учество во носењето на сите одлуки што во надлежност на општината, а значат суштинска промена – промена кон подобро за нив“, порача Лабудовиќ.
Актуелниот градоначалник, според него, ако имаше што да понуди, ќе го правеше тоа во континуитет за сите претходни четири години.
„А, не на еден месец пред изборите да поправа реквизити од детски игралишта, на четири дена пред гласање да се слика со ракавици на рацете како чисти контејнери и други слично популистички активности – допадливи за око, но со кои не се решава ништо“, рече тој.
Спротивно на тоа, Лабудовиќ нагласува дека припаѓа на нова генерација политичари кои кога ќе дадат збор – истиот и го исполнуваат. Верува дека искуството од работење во реномирани меѓународни компании ќе биде пресудно во имплементација на вистински системски и одржливи решенија со кои ќе се надминуваат сите проблеми во Центар, не кампањски, туку долгорочно.
Тој упати повик до поддржувачите на кандидатките кои испаднаа во првиот круг, Билјана Ивановска и Марија Среброва, но и до сите граѓани кои се уште се мислат дали да гласаат во вториот круг.
„Ги повикувам граѓаните да излезат што помасовно и да гласаат. Да го заокружат бројот 2. Само така ќе ја донесеме вистинската промена во Центар. Промена која ќе значи Центар да биде целосна спротивност од сегашната слика. Почиста, еколошки ефикасна, побезбедна, урбано и плански средена општина. Општина со светли улици, слободни тротоари, со нови катни гаражи и повеќе паркинг места. Општина која ќе биде шампион во транспарентност, нон-стоп достапна и отворена за граѓаните. Општина во која ќе „царуваат“ културата и спортот, во која од училиштата ќе направиме образовни оази, а на младите ќе им понудиме перспективност“, повика Лабудовиќ.
Македонија
Независниот кандидат во Могила се откажа од изборната трка, ВМРО-ДПМНЕ доби уште еден градоначалник
Независниот кандидат за градоначалник на Општина Могила, Сашо Пивковски, објави дека се повлекува од изборната трка.
„Драги сограѓани, по внимателно размислување и бројни разговори со многумина од вас, одлучив да ја повлечам својата кандидатура од изборната трка. Ова не беше лесна одлука, но верувам дека е исправна и чесна во овој момент – во интерес на нашата општина и на сите граѓани што живеат во неа. Во изминатиот период слушнав различни мислења, совети и размислувања. Сфатив дека политиката не смее да создава поделби меѓу луѓето, особено не меѓу пријатели и семејства. Нашата сила е во заедништвото, не во поделбите. ВМРО-ДПМНЕ е мојата партија, мојот политички дом. Како нејзин член секогаш сум се водел од идејата за чест, работа и почит кон луѓето. Така било и ќе остане. Ќе продолжам да го поддржувам сето она што е во интерес на граѓаните и на вредностите за кои се залага оваа организација“, објави Пивковски.
Понекогаш, додава тој, вистинското лидерство не се покажува само кога чекориш напред, туку и кога знаеш кога треба достоинствено да застанеш на страна, за да не му наштетиш на она што го сакаш и почитуваш.
„Свесен сум дека оваа вест ќе изненади многумина, но ја носам со мирна совест и со чувство на одговорност. Убеден сум дека ова е најдоброто нешто што можев да го направам во овој момент. Ќе продолжам и понатаму да бидам тука – достапен, искрен и подготвен да помогнам секогаш кога ќе има потреба. Вашата поддршка, доверба и добри зборови ќе останат нешто што длабоко го ценам“, објави Пивковски.
Македонија
Герасимовски: Собрани три големи контејнери за кабаст отпад и 25 помали контејнери во Центар
Градоначалникот на Општина Центар, Горан Герасимовски, информира дека хигиеничарите на општината со целата механизација при денешното чистење собрале три големи контејнери за кабаст отпад и 25 помали контејнери.
„Интензивно чистиме во сите населби во Центар. Од рано изутрина, почнавме со чистење позади Капиштец, Водно, продолжуваме на повеќе локации во Дебар Маало, Кочо Рацин, Пролет позади Даре Џамбаз. Дел по дел, маало по маало, го расчистуваме целиот смет. Работиме во две смени, со активираност на целата механизација со која располагаме. Изминатава година постојано апелиравме за хигиената, но ги засукавме ракавите и чистиме и онаму кадешто општината нема надлежност, затоа што граѓаните заслужуваат чисти улици и празни контејнери без смет”, вели Герасимовски.
Тој информира дека ЈП „ПОЦ“ организира посебни пунктови и распоред за собирање на угостителски отпад.
„Реализираме нов начин на дистрибуција и депонирање на сметот. Викендов спроведуваме дератизација во училиштата и градинките. Во тек е вонредна дератизација, кадешто во сите 1980 шахти се фрла сертифициран препарат, но потребно е да се изврши и дератизација во сите згради. За тоа, организираме средба со сите управители на згради и куќни совети. Ја подигнуваме хигиената на повисоко ниво. Им благодарам на сите хигиеничари кои со натчовечки напори целиот овој период го чистат и хаосот на градската власт која го преплави Скопје во смет”, истакнува Герасимовски.
Тој ги повика компаниите да помогнат со механизација, камиони и логистика.

