Македонија
МВР и ЗНМ со протокол за безбедност на новинарите на интернет

Министерот за внатрешни работи, Оливер Спасовски, денеска оствари работна средба со работната група на Здружението на новинарите на Македонија, предводена од претседателот на ЗНМ, Младен Чадиковски, на која беше промовиран изработениот протокол за безбедност на новинарите на интернет, со фокус на новинарките.
„Како резултат на изработката на овој протокол, меѓу другото, во МВР е назначено лице – контакт-точка за интернет-заканите кон новинарите и, воопшто, медиумските работници. Протоколот нуди практични чекори како новинарите да постапат кога ќе бидат предмет на закана преку социјалните мрежи и воопшто на интернет преку поактивна вклученост на МВР во заштита на медиумските работници. Ова е една од низата активности што заеднички ги спроведуваат МВР и ЗНМ за подобрување на безбедноста на новинарите од 2017 година кога беше потпишан меморандум за соработка“, велат од таму.
На средбата се дискутирало и за други аспекти за безбедност на новинарите и медиумските работници при вршење на дејноста, заканите што се присутни во интернет-просторот, потребата од слободно и непречено известување од настани на терен, ефикасноста при заштитата на новинарите со целосна имплементација на правните инструменти што ги имаат институциите и беше потенцирана соработката меѓу МВР и ЗНМ.
„Јасна е нашата посветеност како министерство на новинарите да им се обезбедат сите услови за тие непречено да си ја вршат работата и тоа го покажавме од 2017 до сега. За тоа не смее да има дилема затоа што слободата на медиумите е еден од базичните столбови на кој се потпира демократијата. И овој протокол, во чие изработување учествуваа претставници од МВР, ЗНМ и експерти од академската заедница, нуди решенија што ќе придонесат секој новинар, особено новинарките, да се чувствуваат безбедно, но и да знаат како да постапат во случаи на закани преку интернет. За нас, слободата на новинарите е приоритет и во таа насока продолжуваме и со наредни активности во соработка со ЗНМ. Во претходниот период реализиравме многубројни обуки, заеднички со ЗНМ и Мисијата на ОБСЕ во Скопје го изработивме прирачникот за безбедност на новинарите за време на настани со висок ризик, а денеска можеме да констатираме и дека е изработен и протоколот за безбедност на новинарите на интернет“, потенцира Спасовски.
Претседателот на ЗНМ, Младен Чадиковски, рече дека овој протокол е чекор плус во градењето безбедна атмосфера за работа на новинарите. „Сметаме дека ова е позитивен исчекор во рамките на зголемување на безбедноста на колегите новинари и новинарки. Денес, не само што се соочуваме со загрозување на нашата безбедност туку се соочуваме и со опасноста од онлајн-закани, каде што, за жал, поголеми жртви се новинарките.
„На овој начин очекуваме нападите и опасноста од нив да се намали, а неказнивоста на сторителот да исчезне. Се надеваме дека препораките што се наоѓаат во овој протокол ќе го најдат своето место во градењето безбедна атмосфера за работа на новинарите“ , рече претседателот на ЗНМ, Младен Чадиковски.
Во процесот на подготовка на овој протокол беа направени широки анализи, искористена актуелната правна литература на темата, како и многубројни институционални практики, со цел да се најде најдобриот пристап за поголема заштита и безбедност на новинарките и новинарите на интернет. На овој начин ќе се намали можноста за самоцензура поради постоен страв од напад, а ќе се зголеми слободата на изразување и професионалните новинарски стандарди. Членови на работната група составена за подготовка на овој протокол од ЗНМ беа Младен Чадиковски и Драган Секуловски, Никола Дујовски, професор на Факултетот за безбедност Скопје при УКЛО – Битола, Јасна Бачовска-Недиќ, професор на Правниот факултет „Јустинијан Први“ – Скопје, Тони Ангеловски, помошник на министерот за односи со јавност и стратешко планирање при МВР, а од новинарките членови на работната група беа Сашка Цветковска, Еви Шкопи и Кристина Атовска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Не е вистина дека има цијанид стотици пати над дозволеното во Крива Река, рече директорката на инспекторатот, Гиновска

Директорката на Државниот инспекторат за животна средина, Ивана Гиновска, ги отфрла тврдењата на градоначалникот, Сашко Митовски, дека во Крива Река има цијанид стотици пати над дозволеното, по хаваријата во „Тораница“.
„Ги демантирам шпекулациите дека тој ден инспектори од Државниот инспекторат не излегле на терен. Ги отфрлам сите обвинувања дека јас имам изјавено оти се излеала само вода. Таква изјава не постои. Ги демантирам шпекулациите дека има помор на риби во Крива Река. Од 14.03 до денес не е забележан помор. Одговорно тврдам дека цијанид неколку стотици пати над дозволеното во Крива Река, нема, како што твдеше грдоначалникот на 28 март“, рече таа и додаде дека за ширење паника на населението кривично се одговара.
Сепак, дитекторката потврди дека инспекторите дента кога се случила хаваријата не зеле мостри. Инспекторите се самостојни во своите одлучувања, самите прават проценка, рече таа одговарајќи на новинарско прашање. На нејзино барање, потоа биле земени примероци од шест точки, меѓу кои и онаа на која градоначалникот утредента зел мостра. Резултатите, вели, не се такви какви што ги презентирал градоначалникот.
Прашана дали тоа значи дека се спорни резултатите на акредитираните лаборатории, Гиновска рече: „Не тврдам и не навлегувам во тоа дали се спорни, но резултатите кои беа прочитани од страна на градоначалникот не беа веројатно точно прочитани. Тој направи паника и рече дека неколку стотици пати над дозволеното има цијанид“. Според анализите на акредитираните лаборатории кои ги има таа, цијаниди во Крива Река има помалку од два.
„Како директор ги побарав сите досегашни испитувања и ми се доставени на увид. Ќе ги достави сите анализи до кумановското јавно обвинителство кое веќе отвори случај – и нивните, и на риболовното друштво „Мрена“ и на компанијата „Булмак“, и на градоначалникот“, додаде.
Директорката рече и дека „Екоцид“ не се докажува со земање на еден литар вода, од едно место, само еден примерок, туку со сеопфатна анализа.
Таа заклучи дека предметот со Крива Река е сензитивен и не смее да се користи за дневно политички препукувања.
На компанијата „Булмак“ 2016, додаде таа, изречена им е казна од 180.000-200.000 евра за правниот субјект и 10.000 евра за одговорното лице, која е најголема казна во законот за животна средина. Компанијата потпиша спогодба и предметот е предаден на Комисијата за спогодување, при Министерството за животна средина и просторно планирање.
Директорката на ДИЖС рече дека ќе ги превземе сите соодветни мерки во согласност со законот и ќе ја информира јавноста за следните чекори.
Митовски претходно откри дека во водата има десет пати поголема концентрација на олово и стотици пати повеќе цијанид, азот и фосфор по инцидентот на 14 март.
Македонија
90 отсто од дишните органи на 29-годишниот Карадакоски биле изгорени од пламенот што го вдишал, утврдиле лекарите во Литванија

Директна причина за смртта на 29-годишниот Александар Карадакоски, кој утрово почина во Литванија, се изгореници на дишното стебло, извести попладнево Небојша Настов, директор на Клиниката за хируршки болести „Св. Наум Охридски“, каде што Карадакоски бил згрижен пред за отпатува во Литванија. Во болницата бил примен околу 6 часот на 16 март. Во текот на денот му се влошила состојбата, па во попладневните часови бил ставен на вештачко дишење, а истовремено му ги лекувале и изгорениците.
„Вкупната површина на изгорениците е некаде околу 36 %, кои претежно се наоѓаа во пределот на главата, вратот и горните екстремитети со длабочина од втор и трет степен, што само за себе кажува за интензитетот на пламенот што го има зафатено. Поради делот од пламенот и чадот што ги вдишал, доаѓа до оштетување на внатрешните дишни органи, што е потврдено и од страна на колегите од Литванија во разговор со нашите анестезиолози при брифирањето за здравствената состојба на пациентите, што морам да кажам дека се одвиваше редовно, секој ден или на секои два дена. Утврдено е со бронхоскопско испитување дека е оштетен голем дел од дишното стебло и како последица на тоа доаѓа до влошување на состојбата, која на крајот резултирала со подлегнување на повредите на 29-годишниот Александар Карадакоски“, рече директорот Настов.
Карадакоски останал во „Св. Наум Охридски“ речиси 24 часа пред да биде транспортиран во Литванија со медицински санитетски авион.
Министерот за здравство Арбен Таравари рече дека Карадакоски бил во најкритична состојба од сите 193 лица повредени во пожарот во дискотеката.
„Тој беше најтешкиот пациент. Му откажа функцијата на бубрезите на 1 април, беше ставен на дијализа, практично имаше рани на 36 % од телото од втор и трет степен, што отвора простор за инфекции и тоа е таа компликација плус дишните патишта, изгореници на дишните патишта околу 90 %“, рече министерот Таравари.
Министерството за надворешни работи веќе го организира враќањето на телото на Карадакоски. Министерот Таравари рече дека обдукцијата ќе ја направи Судска медицина во Скопје, а сите трошоци ќе бидат покриени.
Карадакоски е еден од 116 пациенти испратени на лекување во странство по пожарот во дискотеката во Кочани. Денес, од лекување во странство треба да пристигнат уште шестмина пациенти, по двајца од Бугарија, Шпанија и Унгарија, па во странските болници ќе останат 69 пациенти. Од нив тројца се во критична состојба.
Во болниците во Скопје во овој момент се лекуваат 14 пациенти, а за петмина веќе е договорен испис.
Македонија
Филипче: Велеа дека лидерска е губење време, па обвинуваат за моноетничност, ги повикувам повторно

Јас повикав на средба со сите претседатели на политичките партии и, да ве потсетам, претседател на една албанска партија рече дека тоа би било губење време (се мисли на Таравари), а сега нè обвинуваат за некаква моноетничка средба. Ова го истакна претседателот на СДСМ, Венко Филипче, во одговор на новинарско прашање поврзано со обвинувањата од албанскиот блок на политичките партии дека вчерашната средба во Владата со премиерот Христијан Мицкоски е план за моноетничка соработка.
„Јас на тој состанок го претставував СДСМ, а премиерот Христијан Мицкоски ВМРО-ДПМНЕ, и ние се состанавме како лидери на двете најголеми партии во македонскиот блок. Притоа премиерот Мицкоски беше првиот што без забелешка и единствен што ја прифати поканата за средба“, истакна денеска Филипче од Струмица.
Тој уште еднаш упати јавен повик до сите политички партии за организирање лидерска средба.
„Апсолутно, сметам дека треба да продолжиме во следниот период во насока на организација на средба на лидерите на сите поголеми политички партии. Ова нека биде уште еден мој повик до сите партии бидејќи јас тука не гледам никаква потреба да се делиме на македонски или албански блок кога станува збор за интересите на државата“, потенцира претседателот на СДСМ.
Филипче истакна дека никој нема право да го обвинува Социјалдемократскиот сојуз на Македонија за етнички или националистички политики или пристап имајќи предвид дека во извршниот одбор на СДСМ има Албанец, Македонка муслиманка, а во следниот период ќе има и Ромка.
Претседателот на СДСМ повтори дека вчерашната средба со премиерот била конструктивна и на неа било договорено формирање заеднички тела или групи што ќе работат на подготовката на законите од реформската агенда, со фокус на правосудството, енергетиката и стратешките проекти во здравството, а кои треба да стигнат во Собранието.