Македонија
МВР распиша меѓународна потерница по Шеваљ Муареми

Министерството за внатрешни работи распиша меѓународна потерница по Шеваљ Муареми, водачот на криминална група „Дуќанџик“ од Грчец.
„МУАРЕМИ ШЕВАЉ, татко Азби, мајка Азбије, роден 18.11.1977 година во Скопје, живее на улицата 5 бр. 1, с. Грчец општина Сарај. Се бара по распишана меѓународна потерница од ОЈО за ГОКК – Скопје со наредба КО БР. 15/24 од 30.1.2024 година. Лицето е под истрага за сторено кривично дело по чл. 123 ст. 2, чл. 394 ст. 3 и чл. 215 ст. 3 од КЗ на РСМ“, пишува на веб-страницата на МВР.
Пред да настапи техничката влада во јануари, тогашниот министер на МВР, Оливер Спасовски, на последната прес-конференција од својот мандат објави дека полицијата извршила голема полициска акција на повеќе локации, при што уапсиле шет лица во Македoнија и уште во Шпанија поради дрога и убиства, поврзани со криминалната група на Муареми.
„Пријавениот Ш. М. заедно со уште две лица, О. Б. и Ј. К., формирале група за вршење убиства. Организаторите создавале планови и носеле одлуки, а ги спроведувале лично или преку припадници“, рече тогаш Спасовски. Како што објави, групата стоела и зад организацијата и обидот за убиство на лице од селото Бардовци, албански државјанин, чие тело било најдено на 15 мај 2020 година на Матка во Скопје, како и двојното убиство на 5 март 2021 кога во Скопје беа убиени А. Б. и Б. В.
Спасовски на оваа прес-конференција изнесе и податок дека лица од институции, судови и обвинителства им оддавале информации на криминалците додавајќи дека јавноста би се зачудила кога ќе дознае кој сè соработувал со нив.
Водачот Шеваљ Муареми остана недостапен за органите на прогонот, а според непотврдени информации, престојувал во Шпанија по што заминал за Дубаи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Левица: Стан во Центар од 1 денар, куќа од 28 денари, еве што пријавиле функционери од ВМРО-ДПМНЕ

Левица најостро ја осудува праксата на непрофесионално и паушално пополнување на анкетните листови за имотна состојба од страна на функционерите на ВМРО-ДПМНЕ, нарекувајќи го тоа флагрантно потценување на законските обврски и грубо поткопување на транспарентноста и интегритетот на јавните функции.
Согласно Законот за спречување на корупцијата и судирот на интереси, функционерите се должни до Државната комисија за спречување на корупција (ДКСК) да достават анкетни листови, односно детално да го пријават својот имот и имотот на нивните семејства, како и секоја промена која ќе настане за време на нивниот мандат. Сепак, и без да се познаваат личните финансиски прилики на функционерите на ДПМНЕ, јасно се забележуваат бројни паушални податоци, неправилности и несоодветно исполнување на законската обврска.
Според јавно достапните податоци, министерот за култура и туризам, Зоран Љутков, има пријавено пет недвижнини. Помеѓу нив се издвојува неговиот стан во Банско, како и: стан во Карпош од 38 квадратни метри со вкупна вредност од 2,39 денари; куќа во Габрово со површина од 315 квадратни метри со вкупна вредност од 28 денари и двор од 44 квадратни метри со вкупна вредност од 1,5 денари, сето тоа на име на неговиот брачен другар. Дополнително, брачниот другар поседува и стан во Карпош од 55 квадратни метри вреден 3,5 денари.
Пратеничката од ДПМНЕ, Бети Стаменкоска – Трајкоска, и покрај тоа што пријавила кредит, како сопственик се јавува само на акции стекнати уште во 2005 година во Стопанска банка, Макстил и ЗК Пелагонија. Следејќи го примерот на нејзините родители кои исто така поседуваат голем имот во акции, таа има пријавено три моторни возила, сите на име на нејзиниот брачен другар. Недвижниот имот е на име на нејзините родители, а пријавила и градежно земјиште од 134 квадратни метри во вредност од 0 денари. Иако според законите е должна да пријави целиот имот на нејзиното семејство, нема податоци за банкарски сметки.
Пратеничката Иванка Василевска, пак, во својот анкетен лист навела дека поседува стан во Центар со површина од 99 квадратни метри и вредност од само 1 денар.
Во вакви услови се поставува логично прашање: зошто ДКСК го толерира ова флагрантно непочитување на законските обврски? Отсуството на сериозна проверка и адекватно постапување од страна на ДКСК не само што ја поткопува довербата во институциите, туку ја охрабрува и понатамошната пракса на прикривање на реалниот имот на носителите на јавни функции. Корупцијата не се спречува со затворање на очи пред ваквите манипулации, потенцира Левица.
Партијата најавува дека во наредниот период јавно ќе ги објавува сите неправилности и забелешки поврзани со пријавениот имот на носителите на јавни функции, со цел да ја поттикне ДКСК на соодветно постапување.
„Бараме итна ревизија на анкетните листови на сите функционери и процесуирање на сите кои со неточни или лажни податоци ја изигруваат законската обврска!“, се наведува во реакцијата на Левица.
Македонија
Муцунски: Дипломатскиот пасош не ѝ дава имунитет на претседателката на ДКСК

Актуелната претседателка на Државната комисија за спречување на корупцијата (ДКСК), Татјана Димитровска, која е осомничена за оддавање службена тајна во случајот „Адитив“, не смее да има контакт со предмети, пошта и друга документација поврзана со работењето на Антикорупциска. Дополнително, таа нема право да гласа или да врши распределба на предмети.
Димитровска завчера беше изведена пред Судија на претходна постапка во Основниот кривичен суд во Скопје. Судијата, постапувајќи по предлогот на Обвинителството, ѝ определи мерки за претпазливост, вклучително и забрана за преземање на одредени работни активности.
Минатата година, Татјана Димитровска доби дипломатски пасош од Министерството за надворешни работи, со што ѝ беше овозможено да патува без чекање на пасошка контрола при влез и излез од државата. Иако и останатите шест члена на Комисијата побарале ваква привилегија, не им била одобрена.
Министерот за надворешни работи, Тимчо Муцунски, во изјава за „Сител“ во емисијата „Тема на денот“, појасни дека поседувањето дипломатски пасош не носи автоматски имунитет и не може да влијае врз истрагата.
„Самиот дипломатски пасош на наш граѓанин не значи дека тој ужива било какви права поврзани со некоја форма на имунитет. Што значи дека истиот не може да влијае на самата постапка која се спроведува од нашите органи и во моментот кога ќе престане функцијата на таа поединечна личност, секако МНР ќе го одземе тој дипломатски пасош“, изјави Муцунски.
Тој додаде дека, иако постои презумпција на невиност, од морални и етички причини Димитровска треба да поднесе оставка.
„Логично е кога сте опфатени со ваков тип на постапка, почитувајќи ја и презумпцијата на невиност, ова го велам пред сѐ како човек, не како министер – логично е да дадете оставка. Тоа не треба, според мене, да влијае на кредибилитетот на сите останати членови на таа комисија“, истакна Муцунски.
Македонија
АМСМ препорачува: Возачите да бидат внимателни по влажните коловози

Сообраќајот на сите државни патишта во земјава утринава се одвива непречено, информираат од Автомотосојузот на Македонија (АМСМ). Според нивните податоци, коловозите на одредени места се влажни, а интензитетот на сообраќај на патните правци надвор од градските средини е умерен.
На граничните премини од македонска страна нема подолги задржувања за влез и излез од државата.
Од АМСМ препорачуваат на возачите прилагодување на брзината според условите на патот, строго почитување на поставената сообраќајна сигнализација и зголемено внимание при управување со возилата. Особено внимателно треба да се вози низ котлините, речните долини и клисурите, каде постои можност за појава на одрони.
Најризични за одрони се делниците Катланово – Велес, Маврово – Дебар – Струга, Виница – Берово и Кочани – Делчево.
АМСМ дополнително информира дека мостот на реката Вардар, на регионалниот пат Р1312 кај Башино село, останува затворен за секаков вид на сообраќај.