Советот за етика во медиумите на Македонија (СЕММ) со загриженост реагира на зачестените случаи на ширење шпекулации, еднострано известување и невистини преку некои медиуми, особено во контекст на сегашната политичка ситуација и по потпишувањето на договорот за името со Грција.

„Загрижува фактот што се забележуваат случаи на известување што содржат повици за мобилизација на граѓаните во одбрана на одредени интереси, кои често се пренесувани и од социјалните мрежи.
Потсетуваме дека медиумите не смеат да бидат злоупотребени за пренесување повици за обединување поединци и групи за радикално однесување и постапки што го загрозуваат јавниот ред и мир во општеството, а особено на член 10 од Кодексот, кој вели „новинарот нема да поттикнува на насилство и дискриминација по која било основа“. Медиумите мора да го почитуваат Етичкиот кодекс бидејќи во спротивно последиците од непридржувањето кон неговите одредби би можеле да бидат фатални“, се вели во соопштението на Советот за етика.

СЕММ апелира на воздржаност и смирени реакции на какви било провокации од кој и да е центар на моќ, групации или поединци.

„Медиумите имаат особено важна улога во заштитата на граѓаните од појавата на нетолеранција и недоверба и нивна изложеност на ризик од насилство. Тие не треба да дозволат да бидат манипулирани од страна на политичарите и други поединци и групи бидејќи тоа значи директна штета врз јавноста и граѓаните на Република Македонија“, апелира СЕММ.

Советот за етика очекува од медиумите да не поттикнуваат разлики и поделеност меѓу луѓето, туку да бидат посредник и платформа за активен дијалог за прашања од јавен интерес, а во тоа да се предводат од принципите на професионално известување.

СЕММ потсетува дека потребата од професионално однесување на сите медиумски фактори се нотира и во годинашниот извештај на Европската комисија за напредокот на земјата, а истовремено апелира и до институциите на системот да обезбедат максимална заштита на новинарите и безбедност при известувањето.