Македонија
Мерко тужел сограѓанин оти го нарекол „корумпиран“ и доживеал душевна болка – не кажува дали истото ќе го стори за Стејт департментот

Струшкиот градоначалник Рамиз Мерко имал душевна болка бидејќи бил наречен „најкорумпиран и најнеморален“ и лице кое ја дели партијата ДУИ, сведочи тужениот стружанец Беќим Ќоку. Мерко, погоден од зборовите на сограѓанинот, правдата ја барал пред струшкиот суд, во кој сега се прави вонреден надзор бидејќи Стејт депарментот посочи дека градоначалникот влијаел врз судски предмети.

Тужбата поднесена од Мерко
Градоначалникот минатиот месец бил во контакт со психијатарот Изабела Филов, која на девет страници пишува за вознемиреноста, немирот, стресот и притисокот по написот за неговата корумпираност. Еден месец по психијатриското вештачење за Мерко, стигна одлуката со која тој се најде на т.н. црна листа на САД поради корумпираност. „Макфакс“ го контактираше со прашања дали одлуката на Стејт департментот со обвинувања за корумпираност влијаела на исти начин како зборовите од сограѓанинот. Мерко, како и претходно, не одговори на пораката. Струшкиот градоначалник го тужи Ќоку за клевета и навреда.

Дел од тужбата на Мерко против сограѓанинот
„На ден 10.03.2023 година, тужениот, преку објавување на текст на интернет порталот „Вокс Струга“, спрема тужителот сторил груби клевети и навреда…. Видно од јавно објавениот текст, упатените зборови од страна на тужителот (нз) испишани со недоличен речник, а кои ќе ги цитираме подолу во рефератот на оваа тужба претставува клевета и навреда со кои се нарушува честа и угледот на тужителот“, стои во поднесената тужба преку битолскиот адвокат Игор Петковски.
Во тужбата се издвојува: „Тужениот Беким Ќоку од Струга во јавно објавениот напис тужениот го издвојува како корумпиран и ненормален“, па се додава: „Со оглед на тој факт, а како напоменавме погоре во оваа тужба имајќи предвид дека тужителот преживеа стрес по читањето на предметниот текст, истот пред поднесувањето на оваа тужба се обрати до вешто лице од медицинска струка – спцијалист по психијатрија, со цел да биде утврдена душевната болка кај него, а која настанала како последица на изнесените клевети и навреда од страна на тужениот“.
Во психијатриското вештачење, состојбата на Мерко е елаборирана на девет страници.
„После две недели, вознемиреноста и постојаните навраќања на јавно искажаните квалификации се смириле, но секојдневието, потпрашувањата од страна на познати за содржините на текстот, сомнежот како што вели, го гледал во очите на некои луѓе, се уште било причина за немир и постојана потреба да докажува дека тоа не е така….“, стои во вештачењето од психијатарот Изабела Филов направено во мај 2023 година.

Психијатарот за состојбата на Мерко има изработено и наод
„Макфакс“ по вторпат неделава се обиде да стапи во контакт со Мерко. Му испративме и прашања дали е потресен од искажаните ставови на Стејт департментот кој го стави на црната листа и дали ќе обезбеди судско-психијатриски наод за тоа – на што не добивме одговор. Прашавме и дали е потресен што САД го обвинува за корупција, како што претходно тоа го кажал неговиот тужен сограѓанин – но Мерко не даде свој став.

Потпишаниот наод од психијатарот
Минатата недела, Стејт департментот донесе одлука Мерко да се најде на црната листа. Градоначалникот побарал од ДУИ да му се замрзне членството во централните органи на партијата, што било одобрено. Барање за негово разрешување дојде од граѓани и политички партии, но не и од Али Ахмети и владините претставници.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.