Македонија
АО Траума курс – Основни принципи на оперативното лекување на скршениците
Викендов на 22-23 октомври во хотелот „Александар Палас“ во Скопје, по четврти пат во земјава се одржува меѓународен семинар за хирурзи-трауматолози и ортопеди според програмата за едукација на меѓународната АО фондација.
Курсот се одржува под наслов АО Траума – “Поврeди на скочниот зглоб и стапалото”, а претседавач на курсот е професор д-р Игор Кафтанџиев од Клиниката за трауматологија при Медицинскиот факултет во Скопје.
На курсот ќе се одржат предавања од страна на реномирани хирурзи и предавачи од Австрија, Хрватска, Словенија, Грција и Северна Македонија. Учесници на курсот ќе бидат триесетина млади хирурзи, трауматолози и ортопеди и специјализанти од истите области од земјата кои со предавачите ќе имаат можност да водат дискусии за предавањата, но и за медицинските случаи кои ќе бидат презентирани во тек на семинарот. АО Траума семинарот како што е вообичаено ќе биде следен и од делегација на АО Фондацијата.
АО Фондацијата е непрофитна организација предводена од интернационална група на хирурзи специјалисти од областа на траума и ортопедија. AO фондацијата е формирана 1958 година со седиште во Давос, Швајцарија, а во тек на последните децении ги дефинира стандардите во лекувањето на повредените. Во неа членуваат над 16.000 хирурзи и научници од повеќе од 100 земји во светот. Фондацијата е посветена на едукација, истражувања и развој од областа на трауматологија и ортопедија, но и практичната примена на сите тие искуства, оперативни техники и импланти, сè со цел да се постигне најдобра здравствена грижа за пациентите. Одржувањето на различни курсеви и семинари на кои хирурзите ги учат најсовремените принципи во лекувањето на повредите на мускуло-скелетниот систем е една од основните активности на фондацијата. Особено е важно да се истакне дека системот на едукација е идентичен на ниво на целата АО фондација, што значи насекаде во светот се применуваа ист систем на учење и практична едукација.
Сите досега одржани настани, како настанот кој претстои се подржани од локалниот дистрибутер на светската компанија „Де Пју Синтес“, која е официјален индустриски партнер на АО фондацијата. Со тоа практично се продолжува практиката за постојано вложување во едукацијата на трауматолозите и ортопедите.
Одржувањето на овие меѓународни настани во Северна Македонија е резултат на повеќегодишна и богата соработка на македонските трауматолози со АО фондацијата, преку нивно учество на различни АО курсеви во странство, но и активноста на претседавачот на курсот, Проф. Др. Игор Кафтанџиев како предавач на многубројни вакви курсеви во странство, како и ентузијазмот и посветеноста на Ас. Д-р Марко Спасов во организацијата на овие настани во нашата држава.
Одржувањето едукативни настани според програмата на АО фондацијата во нашата држава веќе станува традиција. Имено, во 2017 година беше одржан првиот ваков семинар и истиот беше посветен на повредите на горниот екстремитет. Истовремено со одржувањето на првиот семинар, беше формиран и македонскиот огранок на АО фондацијата, а за претседател беше избран професор д-р Игор Кафтанџиев. Со формирањето на овој огранок, нашата држава стана дел оваа светска организација, единствена од ваков вид. На овој начин, се отвориа бројни можности за едукација на младите хирурзи од нашата држава и во странство, со учество на семинари и курсеви, како и стипендии за посета на реномирани болници во други држави. На формирањето на огранокот му претходеше повеќегодишна соработка со странски колеги кои се дел од фондацијата и учество на едукативни настани во странски држави.
Во 2018 година следеше семинар посветен на повредите на долниот екстремитет, а во 2019 година за прв пат во нашата држава беше одржан тридневен курс на тема „Основни принципи на оперативното лекување на скршениците“, според чија програма, покрај предавањата и дискусиите на случаи, беа одржани и повеќе сесии на кои учесниците имаа можност на пластични модели на коски, со употреба на вистински инструменти и импланти (сретства за фиксација, остеосинтеза на скршениците) практично да ги применат принципите на остеосинтеза. На овие настани, посетеноста на учесници и предавачи од странство беше на завидно ниво. Во 2017 година учествуваа предавачи од 6 држави, а учесници од 3 држави; во 2018 година имаше предавачи од 3 држави и 46 учесници од 5 држави; во 2019 година предавачите беа од 3 странски држави и имаше 45 учесници од дури 13 различни држави, со што може да се каже дека овие едукативни настани што се одржуваат во нашата земја стануваат препознатливи во Европа.
Во 2020 година беше планирано да се одржи курс за напреднатите принципи на оперативното лекување на скршениците, но поради КОВИД -19 пандемијата истиот не можеше да се одржи.
Оваа година, сепак беше одлучено да се направи напор и да се одржи предвидениот едукативен настан, но бројот на учесници и предавачи мораше да се ограничи во согласност со препораките за спречување на пандемијата со КОВИД-19 и важечките протоколи. Според плановите, во 2022 година треба да се одржи курсот за напредните принципи на оперативно лекување на скршениците, а во 2023 година во нашата држава треба да се одржи мастер семинар и собрание на претставници на АО траума од МИД регионот ( 23 земји од средна Европа, членки на АО Траума Европа).
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
ЕСМ го одбележува 60-годишниот јубилеј на хидроелектраната „Глобочица“ – шест децении енергија, традиција и напредок
АД ЕСМ и подружницата ХЕС „Црн Дрим“ денеска свечено го одбележаа големиот јубилеј – 60 години од пуштањето во употреба на хидроелектраната „Глобочица“, капитален проект од непроценливо значење за македонскиот електроенергетски систем.
Хидроелектраната „Глобочица“, дел од хидросистемот „Црн Дрим“, е пуштена во работа на 4 ноември 1965 година. Со инсталирана моќност од 42,5 MW, таа во изминативе шест децении произведе повеќе од 10.367 GWh електрична енергија, Средното годишно производство изнесува 175 GWh, а максималното е забележано во 2010 година – 292 GWh.
Во рамките на развојните програми на компанијата, „Глобочица“ претрпе повеќе ревитализации, со што нејзината првична инсталирана моќност е зголемена за дополнителни 9 MW. Денес, електраната претставува пример за успешно спојување на инженерската визија и одржливиот развој, обезбедувајќи чиста, обновлива енергија и намалување на јаглеродниот отпечаток.

Во рамките на Свечената академија, генералниот директор на АД ЕСМ Лазо Узунчев најави капитален проект кој ги опфаќа хидроелектраните Глобочица и Шпилје.
„До крајот на годинава очекуваме почеток со реализација на капиталниот проект „Ревитализација на хидроелектраните“ – Фаза 3, од кои една од главните придобивки ќе биде зголемување на вкупното производство од хидроенергија за 50 GWh, годишно. Од реализацијата на овој проект, најголема придобивка ќе имаат токму ХЕ „Глобочица“ и ХЕ „Шпилје“. Со овој зафат, гарантираме продолжување на нивниот животен век за најмалку уште три децении“ нагласи Узунчев.
Директорот на Подружницата ХЕС „Црн Дрим“, Гоце Божиновски, во своето обраќање пред присутните нагласи:
„Денес славиме 60 години од првите киловат-часови произведени во ХЕ „Глобочица“ – електрана која не е само инженерско чудо, туку и симбол на визија, истрајност и иновативен дух. „Глобочица“ е животна лекција дека човечката визија и природата можат хармонично да соработуваат. Оваа електрана останува трајно сведоштво за силата на знаењето, посветеноста и трудот на генерациите што ја создадоа и ја одржуваат.“, рече Божиновски.
АД ЕСМ и ХЕС „Црн Дрим“ изразуваат искрена благодарност до сите поранешни и сегашни вработени, инженери и техничари кои во изминатите шест децении го вложиле своето знаење и труд во развојот и одржувањето на хидроелектраната „Глобочица“.
Компанијата останува целосно посветена на својата зелена агенда – модернизација и изградба на нови обновливи извори на енергија, кои ќе обезбедат стабилна и одржлива енергетска иднина за Македонија.
Македонија
Беким Сали ќе го наследи Изет Меџити како прв вицепремиер
Портпаролот на коалицијата ВРЕДИ, Дритон Сулејмани, денеска потврди дека Беким Сали ќе биде новиот прв вицепремиер, на местото на Изет Меџити кој стана градоначалник на Општина Чаир.
За нов министер за животна средина и просторно планирање, на местото на Меџити, сè уште се одлучува.
Беким Сали претходно беше министер за здравство од 2022 до 2023 година.
Сулејмани истакна дека ВРЕДИ ќе продолжи да функционира како единствен политички субјект, без поделби по партии, како и досега.
Во осврт на изборните резултати, тој оцени дека локалните избори ја потврдиле новата политичка реалност во земјата и дека ВРЕДИ станува втора политичка сила на државно ниво, со доминација во албанскиот политички блок.
Како примери на успех, Сулејмани ги посочи победите на Билал Касами во Тетово, Фети Абази во Боговиње и Даут Мемиши во Теарце, а резултатот во Чаир го нарече јасна порака од граѓаните против старите политики.
Македонија
Утре променливо облачно време, од четврток до понеделник дожд, најавува УХМР
Времето утре ќе биде променливо облачно со сончеви периоди. Ќе дува слаб до умерен ветер од северен правец. Минималната температура ќе биде во интервал од 5 до 8, а максималната ќе достигне од 12 до 17 степени.
Во Скопје, променливо облачно претпладне со повремен слаб дожд. Ќе дува умерен, северен ветер. Минималната температура ќе се спушти до 7, а максималната ќе достигне до 15 степени.
Во среда и четврток во утринските часови има услови за појава на магла. Под влијание на влажна воздушна маса, од четврток од вечерните часови па се до понеделник, следува период на променливо облачно време со повремени локални врнежи од дожд, наместа пообилни.

