Македонија
Меџити: Во Кавадарци инвестираме над еден милион евра во подобрување на водната инфраструктура

Првиот заменик претседател на Владата и министер за животна средина и просторно планирање Изет Меџити денес беше во посета на општина Кавадарци како дел од владината делагација предводена од премиерот Христијан Мицкоски која направи увид во реализацијата на повеќе проекти од различни области што се реализираат со државна помош.
Меџити најави дека во Кавадарци, заедно со општината, Владата преку Министерството за животна средина и просторно планирање се финансираат три проекти во делот на подобрување на водната инфраструктура со вкупна вредност од 1 милион и 300 илјади евра, од кои околу 1 милион евра се неповратни грант средства државна помош, а 300 илјади евра е сопствена контрибуција на општината. Овие средства се обезбедени преку кредитната линија од Европската инвестициска банка наменета за сите општини во државата.
„Во село Моклиште градиме на водоводна и канализациона мрежа во должина од 6.4 километри и резервоар со капацитет од 150 метри кубни. Во самиот град Кавадарци ја градиме водоводната и канализационата мрежа во блок 5.9 ул. „Вељко Влаховиќ“ со што за оваа новоизградена населба ќе обезбедиме поврзување на станбените објекти со постоечката водоводна и канализациона мрежа за 400 домаќинства и набавуваме водомери со далечинско отчитување за замена или поставување на нови мерни инструменти за над 2000 домаќинства“ изјави Меџити.
Според него, со овие проекти Владата и Министерството за животна средина вложуваат во подобрувањето на животниот стандард на кавадарчани и социо-економскиот развој на општината. Од друга страна државата ја помага општината и со имплементација на нова современа технологија за точно отчитување на потрошената вода со што ќе се намалат загубите на вода на територија на Oпштината и ќе се овозможи одржливо и економично управување со водните ресурси, со што се заштитува и животната средина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Филипче: Владата првин си потпишува договор, а потоа ќе нè информира за камати и трошоци

„Да се задолжи земјата 6 милијарди евра и да не се каже кои се условите за заемот, колкава е каматата, кои се роковите е ненормално“, рече претседателот на СДСМ Венко Филипче во синоќешната средба со членството во Гостивар.
„ Владата прво си потпишува договор, а после ќе не информира за камати и трошоци и сето тоа се крие со еден стратешки договор со Велика Британија. Ја слушав министерката за финансии она кажува британски фирми ќе работат па се збуни кажа после Закон за јавни набавки, ние проверивме не е така“, рече Филипче.
Филипче оценува дека целиот овој процес ја одалечува државата од патот кон Европска унија.
“Позајмуваме огромни суми на пари, а притоа е закочен процесот на интеграција во ЕУ. За вакви проекти како што најавуваат тоа е пругата ЕУ дава грантови. Зошто ваков заем со кој ќе задолжиме следни генерации, кога можеме да добиваме грантови и далеку поповолни услови“, праша Филипче.
Македонија
Општина Центар објави јавен повик за финансиска поддршка на културниот проект „Центарски приказни“

Општина Центар денеска објави Јавен повик за финансиска поддршка на културниот проект „Центарски приказни“, кој има за цел да ги зачува колективните спомени и духот на центарските маала преку поставување урбани топоними – ознаки на значајни места со кратки приказни за нивното значење.
Градоначалникот Горан Герасимовски потенцира дека преку визуелна интерпретација и поставување на симболични обележја, проектот ќе придонесе за зачувување на урбаното наследство и културниот идентитет на општината.
„Право на учество имаат здруженија, организации и правни субјекти од областа на културата со седиште во Општина Центар, а вкупниот фонд за поддршка на проектот изнесува 200.000 денари. Со проектот ‘Центарски приказни’ сакаме да создадеме мапа на сеќавања, каде што урбаните маала и нивните приказни ќе оживеат преку уметност и културна меморија. Овие микролокации се дел од нашето секојдневие, но и од нашата историја. Време е да ги вреднуваме и раскажуваме на генерациите што доаѓаат“, вели Герасимовски.
За пријавување, заинтересираните субјекти треба да поднесат пополнета пријава со краток опис на проектот, портфолио на организацијата, биографии на сите вклучени изведувачи, како и референтна листа на досегашни проекти. Дополнително, потребно е да се достави финансиска конструкција за потребните средства за реализација, доказ за активна трансакциска сметка и важечко Решение за регистрација или тековна состојба од Централниот регистар на Република Северна Македонија, не постаро од шест месеци.
Целокупната документација може да се достави преку пошта на адреса: Општина Центар – Скопје, Сектор за јавни дејности / Одделение за култура, ул. „Михаил Цоков“ бр.1, 1000 Скопје или лично во Архивата на Општината (барака 6) секој работен ден од 9 до 15 часот. При поднесувањето потребно е да се наведе: „Јавен повик за финансиска поддршка за реализација на проектот ‘Центарски приказни’“.
Рокот за пријавување е пет (5) дена од денот на објавување на повикот на веб-страницата на Општина Центар.
Македонија
Даниловски за мајмунските сипаници: Болеста не се пренесува лесно, претпазливост, но не и паника

Откога Институтот за јавно здравје вчера потврди два случаја на monkeypox – мајмунски сипаници во Македонија, епидемиологот Драган Даниловски на социјалните мрежи објаснува за какво заболување станува збор.
„Мајмунските сипаници се вирусна болест предизвикана од monkeypox-вирусот, кој припаѓа на истото семејство како и вирусот на големите сипаници (variola vera). Симптомите обично вклучуваат: треска, главоболка, болки во мускулите и грбот, зголемени лимфни жлезди, исцрпеност, кожен исип, кој може да се појави на лицето, рацете, стапалата, гениталната област или на други делови од телото. Инкубацискиот период е обично од 6 до 13 дена, но може да варира од 5 до 21 ден. Болеста трае од 2 до 4 недели и во повеќето случаи се повлекува без потреба од специфичен третман. Сепак, кај лица со ослабен имунитет, деца и бремени жени може да се развијат посериозни компликации“.
Даниловски објаснува како се пренесува болеста.
„Директен контакт со кожни лезии или телесни течности на заразено лице; близок физички контакт, вклучувајќи сексуален однос; контакт со контаминирани предмети, како облека, постелнина или прибор; респираторни капки при продолжен близок контакт лице в лице“.
Важно е, како што напоменува, дека болеста не се пренесува лесно.
„Потребен е близок, продолжен контакт“.
Според него, ризикот за епидемија е многу низок, а состојбата се следи од здравствените власти.
Даниловски советува и што да направите за сопствена заштита.
„Одржувајте хигиена (миење раце со сапун и вода), избегнувајте близок контакт со симптоматски лица и споделување лични предмети, консултирајте лекар при сомнителен осип. Информирајте се од релевантни извори – не од шпекулации“.
Мајмунските сипаници, како што вели, не се нова, ниту неконтролирана закана. Ситуацијата, според него, бара информираност и претпазливост, но не и паника.
Од Институтот за јавно здравје најавија дека ќе продолжат да ја следат состојбата.
„Во моментот нема простор за паника бидејќи бргу и навремено институционално се преземаат сите потребни мерки. Вечерва се мобилизирани сите институционални капацитети за надминување на последиците од ваквата појава и се преземаат сите превентивни мерки“, беше нагласено во официјалната информација од ИЈЗ.
Тие најавија подетаљни информации во текот на денешниот ден.