Владата има демократски и политички капацитет да ги решава проблемите внатре во владината коалиција, рече денес министерот за животна средина и прв вицепремиер, Изет Меџити, откога во јавноста владините партнери покажаа спротивни ставови за предложениот закон за бранителите. Министерот Меџити смета дека не е во прашање законот за бранителите, туку дилемата како СДСМ, партнерот на ДУИ, која осум години промовира граѓански концепт врз основа на кој собираше и албански гласови и имаше високи функционери во своите редови, преку ноќ предлага закон за бранителите.

„Дилемата се поставува дали не беа искрени кога промовираа граѓански концепт или тоа беа истите тие што преку ноќ станаа националисти и предлагаат ваков закон. Не им е грижа ни за бранителите ни за УЧК, ним им е грижа како да се спасат од одговорноста. Нема потреба за загриженост бидејќи тој закон нема да помине“, рече министерот Меџити.

Тој нагласи дека оваа Влада има историски најстабилно мнозинство од деведесеттата година навака и со 78 пратеници има капацитет да ги решава проблемите во владината коалиција.

Владината коалиција за која Меџити вели дека е досега најстабилната кај нас покажа разни ставови за законот за бранителите поднесен од СДСМ. Потпретседателот на „Вреди“, Халил Снопче, изјави дека ќе ја напуштат коалицијата доколку законот биде изгласан, а премиерот Христијан Мицкоски, кој недвосмилено рече дека ги поддржува бранителите, посочи дека нема да толерира уцени и кусо му порача „со среќа“.