Министерот за здравство, Фатмир Меџити, и заменик-министерката за здравство, Маја Манолева, денеска беа во посета на Поликлиниката „Железара“ по повод набавка на нова медицинска опрема – дигитален мамограф со стереотакса и ултразвучен ЕХО-апарат со две сонди набавен од Министерството за здравство.

Меџити информира дека овој дигитален мамограф претставува најсофистицирана опрема што се користи во сите здравствени установи насекаде во светот и важи за современа метода за скрининг на рак на дојката во рана фаза. Со набавката на апаратот ќе се подигне и забрза квалитетот на здравствената заштита за пациентите.

„За наредната година се планира зголемување на бројот на кабинети за скрининг на рак на дојката во согласност со утврдените правила и протоколи донесени од страна на националната комисија за скрининг и рана детекција на рак на дојката. Се креира скрининг-амбуланта на торакална хирургија за пациентки од скрининг, кои имаат направено ЕХО-мамографија, биопсија и потврден хистопатолошки наод и тие дирекно од специјалист радиолог се упатуваат во амбуланта на торакална за одредување термин за операција. Досега оваа можност други специјалисти радиолози ја немаа ниту во дијагностички процедури“, истакна Меџити.

Заменик -инистерката Манолева потенцира дека Министерството ќе продолжи со инвестирање во нова медицинска опрема, како и во унапредување на инфраструктурата и зајакнување на кадарот во јавните здравствени установи.

„Во оваа пригода сакам да апелирам за важноста на редовните превентивни прегледи за заштита на женското здравје. Навремениот преглед, особено кога станува збор за рак на дојката, може да спаси живот. Со скрининг-програмата се опфатени жените во возрасната група од 45 до 69 години, кои не направиле мамографија последниве две години, а исто така и жените на возраст од 40 до 44 години, кои имаат член во семејството со рак на дојката или друг дополнителен ризик-фактор, имаат можност самоиницијативно да се пријават за скрининг-мамографија. Пријавувањето се врши на веб страницата: www.skrining.zdravstvo.gov.mk или на телефонскиот број 15444. Скрининг-мамографијата е бесплатна за жените во програмата, односно партиципацијата ја покрива Министерството за здравство“, рече Манолева.

Директорот на Поликлиниката „Железара“, Александар Велјановски, упати благодарност до Министерството за здравство што излезе во пресрет за набавка на дигиталниот мамограф.

„На територијата на општина Гази Баба друг мамограф нема и пациентите ќе имат можност тука да ги завршат своите прегледи. Поликлиника ‘Железара’ во вредност од 3 милиони денари во тековната 2023 година набави дополнителна медицина опрема, која ни беше неопходна во работата. За 2024 година имаме планирано неколку новитети, тоа е набавка на алерго-тестови. Втора работа што ја планираме е еден од докторите по трудова медицина да биде пратен на супспецијализација, да отвориме пулмоалерголошка амбуланта и третата работа е дека сме во преговори за набавка на декса-скен и за ова дополнително ќе разговараме со Министерство за здравство, каде што е потребен за рано откривање остеопороза кај пациентите“, изјави Велјановски.