Македонија
Меџити: Пренамена на буџетски средства од Министерството за здравство за реконструкција на амбуланта во Илинден

Министерството за здравство информира дека министерот за здравство, Фатмир Меџити, и градоначалникот на општина Илинден, Александар Георгиевски, склучија договор за пренамена на средства од Министерството кон Општината за реконструкција на амбулантата во Илинден при ЈЗУ Здравствен дом Скопје.
Станува збор за инвестиција во вредност од 16 милиони денари, од кои 8 милиони денари се обезбедени од Министерството за здравство, а другите 8 милиони денари од Владата на Република Северна Македонија.
Меџити истакнува дека со подобрувањето на инфраструктурата на амбулантата во Илинден вработените ќе добијат помодерни и посовремени услови за работа, а пациентите подобар квалитет на здравствена заштита.
„Би сакал да истакнам дека во изминатиот период вложуваме и правиме позитивни промени во јавното здравство. Покрај инфраструктурното зајакнување, како никогаш досега вложуваме во набавка на нова медицинска опрема, едукација и мотивација на здравствениот персонал, како и во набавка на нови лекови. И во следниот период ќе продолжиме неуморно со истото темпо, со крајна цел задоволни здравствени работници и задоволни пациенти. На крајот, упатувам благодарност до Владата за одлуката за пренамена на буџетски средства на институциите што ќе бидат насочени за реализација на 66 проекти во најголем дел општини во целата држава“, рече Меџити.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Земјотрес рано утринава ги разбуди граѓаните на Валандово и на околината

Утрово во 5:54 часот, земјотрес со јачина од 3,3 степени според Рихтеровата скала го стресе регионот околу Валандово, информира Сеизмолошката опсерваторија при Природно-математичкиот факултет во Скопје.
Телеметриската сеизмолошка мрежа на Македонија го регистрирала потресот на неколку сеизмолошки станици ширум државата, при што е утврдено дека епицентарот се наоѓа во епицентралното подрачје Валандово, оддалечено околу 120 километри југоисточно од главниот град.
Според првичните информации од Сеизмолошката опсерваторија, земјотресот бил почувствуван во Валандово и околните населени места со интензитет од IV степени според Европската макросеизмичка скала (EMS).
Засега нема информации за причинета материјална штета или повредени лица, но локалното население на социјалните мрежи известува дека потресот бил „краток, но силен“, и ги разбудил во раните утрински часови.
Сеизмолозите продолжуваат да ја следат ситуацијата и ги повикуваат граѓаните на смиреност, посочувајќи дека ваквите потреси се честа појава во сеизмички активниот регион на југоисточна Македонија.
Македонија
Колони на границите, на „Богородица“ се чека до 40 минути, на „Табановце“ до 30 минути

Сообраќајот на државните патишта се одвива непречено и по суви коловози, но фреквенцијата на возила, особено кон граничните премини, денеска е значително зголемена, информира Автомотосојузот на Македонија (АМСМ).
Најголема гужва има на Граничниот премин Табановце, каде времето на чекање за влез и излез од државата е од 15 до 30 минути. На Богородица ситуацијата е уште поинтензивна – за излез од државата се чека до 40 минути, додека на ГП Дојран времето на задржување е 20 до 30 минути.
„Состојбата на патиштата е стабилна и коловозите се суви, но фреквенцијата е зголемена. Апелираме до сите учесници во сообраќајот да возат внимателно, со прилагодена брзина и да ја почитуваат сигнализацијата, особено на делниците каде што има опасност од одрони“, велат од АМСМ.
Посебна претпазливост се препорачува на патните правци низ котлините, речните долини и клисурите – Катланово – Велес, Маврово – Дебар – Струга, Виница – Берово и Кочани – Делчево – каде што постои ризик од појава на одрони.
На останатите гранични премини од македонска страна, нема подолги задржувања за влез и излез од државата.
Македонија
Денес сончево со ветер, од утре повторно температурата во постепен пораст

Управата за хидрометеорологија (УХМР) за денес прогнозира претежно сончево време со умерен до засилен ветер од северен правец, кој наместа ќе достигнува брзина од 60км/ч.
Минималната температура ќе биде во интервал од 11 до 20, а максималната ќе достигне од 27 до 36 степени.
Во Скопје, сончево со умерен до засилен северен ветер. Минималната температура ќе се спушти до 19, а максималната ќе достигне до 35 степени.
Од понеделник следува период на стабилно и потопло време со постепен пораст на дневнaтa температура.