Во Собранието се одржа Инаугуративната седница за Интерпартиската парламентарна група за следење на Националната развојна стратегија.

Со седницата претседаваше претседателот на Собранието на Република Северна Македонија, Африм Гаши, кој е иницијатор за формирање на Групата. На седницата, покрај членовите, учествуваа копретседавачите на Групата и координатори на пратеничките групи на ВМРО-ДПМНЕ И СДСМ, Никола Мицевски и Оливер Спасовски, и генералниот секретар на Владата, Игор Јанушев и постојаниот претставник на УНДП, Арменд Григоријан.

Во своето обраќање, претседателот Гаши подвлече дека иницијативата за формирање на оваа Интерпартиска група ја поднел воден од значењето на Националната развојна стратегија за Република Северна Македонија, обемноста на реформите кои се очекува да бидат имплементирани преку нејзина примена, клучната улога на Собранието во процесот на донесување одлуки и неговата активна вклученост во координација на процесите на државно ниво, како и надзорната улога на Собранието врз извршната власт.

Нагласи дека Националната развојна стратегија е клучен стратешки документ што ја дефинира визијата за развој на државата и се темели на три национални развојни цели: зајакнување на конкурентноста на економијата, отворени модели на управување и социјална инклузија. Оваа стратегија обезбедува кохезија; демографска ревитализација, социјален и културен развој; сигурно, безбедно и отпорно општество; владеење на правото и добро управување и зелена трансформација.

Копретседавачот Мицевски укажа дека во време на глобални геополитички, климатски и политички предизвици, брзи технолошки промени и зголемени социјални нееднаквости, на земјава ѝ е потребна јасна, инклузивна и долгорочна визија.

„Националната развојна стратегија е државен документ кој многу тесно е поврзан со нашата стратешка цел – интеграција во Европската Унија. Многу од приоритетите содржани во Стратегијата — владеење на правото, еколошка трансформација, дигитализација, социјална инклузија, се европски вредности и стандарди. Со оваа стратегија нашата земја покажува дека е подготвена не само да се приближи до ЕУ, туку и суштински да ги имплементира европските вредности“, рече Мицевски.

Копретседавачот Спасовски подвлече дека Националната развојна стратегија е водилка за клучните приоритети на државата во следните 20 години.

„Нејзиното усвојување и имплементација покажува голема политичка зрелост, но и одговорност за заедничките, национални и долгорочни цели на државата. Се фокусираше на инклузивните политики, особено за младите, не само како корисници, туку и како креатори на Стратегијата, но и на ранливите групи, маргинализираните групи, лицата со попреченост и сите групи кои се соочуваат со било какви бариери“, рече тој.

Присутните се осврнаа и на воспоставениот систем за следење на НРС преку дигитална Контролна табла на www.nrs.mk , а во соработка со МАНУ и Универзитетот од Денвер се развиваат сценарија и индикатори за оценка на напредокот. Со поддршка на партнерите УНДП и Министерството за финансии на Словачка имплементацијата на Националната развојна стратегија ќе биде имплементирана во периодот кој следи со активно учество на сите заинтересирани страни.

Премиерот, Христијан Мицкоски, денеска се сретна со албанскиот премиер, Еди Рама, во Тирана.

„Секогаш е посебно задоволство кога со нашите соседи градиме разбирање и заедничка визија. Денеска со премиерот Рама во Тирана имавме исклучително конструктивен и пријателски разговор, исполнет со заемна почит и желба за напредок. Заедно, цврсто чекориме по патот кон Европската Унија, посветени на иднината што ја градиме со партнерство, дијалог и заеднички вредности“, објави Мицкоски на „Фејсбук“.

Мицкоски присуствува на Самитот на Европската политичка заедница, заедно со лидерите и претставниците на земјите од Западен Балкан.

Самитот е посветен на унапредување на регионалната соработка, стабилноста и приближувањето кон ЕУ, при што се потенцираше важноста од заедничко дејствување пред предизвиците со кои се соочува нашиот континент.

„Во отворената дискусија се разменија ставови за клучни теми за зајакнување на поврзаноста на регионот со остатокот од Европа. Нашето присуство и учество на овој Самит е потврда за нашата заложба за активно учество во европските процеси и градење стабилно и просперитетно соседство“, рече Мицкоски.

Иницијативата „Кој е следен“ со герила акција побара правда за жртвите од катастрофалниот пожар кој се случи на 16 март во Кочани.

Пред зградата на Обвинителството беше поставено платно со имињата на жртвите од пожарот, но и имињата на луѓе кои го загубија животот во големи трагедии.

„Поминаа 2 месеци од најголемата трагедија во нашата историјата. Најголемата трагедија која се случи пред наши очи. Денес го потсетуваме Основното јавно обвинителство, го потсетуваме системот, ја потсетуваме јавноста дека зад бројките стојат човечки животи”, соопшти иницијативата.

Утре „Кој е следен“ одат во Кочани, на „Маршот за ангелите“ кој е закажан за во 16 и 5 часот на градскиот плоштад во Кочани.