Македонија
Меџити: Овозможуваме ран скрининг кај трудниците, што значи и намалување на смртноста на новороденчињата

Промоцијата на новиот оддел на Универзитетската клиника за гинекологија и акушерство, опремен со современи апарати за дијагностика и фетална терапија, кои ќе овозможат ран скрининг кај трудниците, беше повод, денес, министерот за здравство, д-р Фатмир Меџити, да ја посети оваа јавна здравствена установа.
На настанот присуствуваше и грчката амбасадорка во земјата, Софија Филипиду, со чија поддршка беше набавена опремата, која ќе значи и редуцирање и намалување на перинаталниот морталитет и морбидитет.
„Апаратите овозможуваат следење на плодот во текот на неговиот развој, како и детекција на сите можни показатели што може да доведат до несакани последици. Ова е пионерски чекор во нашето здравство за што од голема важност се поддршката и соработката од нашите грчки пријатели, Министерството за надворешни работи на Грција, како и Фондацијата за фетална медицина, со чија помош ја реализираме програмата за фетална медицина. Во оваа пригода сакам да им се заблагодарам на амбасадорката на Грција и на грчкиот народ за подадената рака во усовршување на нашиот здравствен систем“, истакна Меџити.
Меџити објасни дека сите наши граѓанки ќе може бесплатно да ги користат придобивките во рамките на оваа програма и најави дека дополнително преку програмата ќе се основаат и стручни усовршувања, односно ќе се отворат магистерски студии во областа на феталната медицина, што ќе се реализираат во соработка со Медицинскиот факултет во рамките на скопскиот Универзитет „Св. Кирил и Методиј“ и Асоцијацијата за фетална медицина во Северна Македонија.
„Нашите кадри ќе бидат обучувани од врвни експерти, кои ќе ги обезбеди Фондацијата за фетална медицина. Фондацијата ќе ја обезбеди и неопходната опрема за реализирање на целата програма, што вклучува и два апарата за ултразвук, кревети, компјутери, софтвер и сè што е потребно за опремување на Одделот за фетална медицина“, нагласи Меџити.
Министерот за здравство, Меџити, истакна дека токму поради развитокот на феталната медицина на оваа клиника имаме значителен пад на бројот на мртвородени посочувајќи дека во иднина со помошта на овој центар уште поубедливо овој тренд ќе продолжи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски објави нови информации за имотот на Левицата: Во т.н. подрум регистриран е локал

На седницата на Собранието посветена на пратенички прашања, премиерот на Владата, Христијан Мицкоски одговараше на прашање посветено на имотот на политичката партија Левица.
„Јас би сакал на денешната седница да одиме чекор понатаму да ја информираме јавноста за т.н. подрум, кој не ќе да е само подрум, туку има и приземје“, рече премиерот надополнувајќи ја информацијата за имотот на партијата Левица која ја обзнани на претходната седница за пратенички прашања.
Тој на говорницата покажа и фотографии од објектот и посочи дека во истиот тој локал е регистрирано и друштво за угостителство и услуги.
„На ова место, кое не ќе да е подрум, над земја три-четири метри е регистриран локал, односно друштво за угостителство и услуги „Павилјон 36“ ДООЕЛ Скопје. Регистриран е на истата адреса каде што се наоѓа подрумот или сутеренот. Дури и си направиле профили по социјалните медиуми, прилично слични на профилот на една политичка партија. Кога малку ќе истражите и ќе ја извадите тековната состојба, покрај тоа што уплатиле 5000 евра во кеш за регистрирање на ова друштво за угостителство и услуги, се јавува како сопственик лицето Зоран Ивановски. Тој се јавува како управител, како менаџер и ја регистрирал оваа фирма, која се занимава со дејност ресторани, но и дејности на интернетски портали. Тоа е подружницата од ова друштво“, истакна премиерот.
Мицкоски дополни дека лицето Зоран Ивановски е дел од претседателството од Левица и е дел од управниот одбор на „Скопски водовод“, а на интернет има и негови фотографии со претседателот на политичката партија Левица.
„Еве како се трошат парите на членовите на политичката партија Левица. Но тоа не е сѐ. Ако ги слушате последните искази од случајот поврзан со Палевски и сведочењата таму, ќе слушнете дека тие се среќавале во штабот на партијата Десна, кој што бил во објектот Опера Хаус, а објектот Опера Хаус е токму овој објект“, рече премиерот Мицкоски и продолжи: „за другите детали нема да зборувам. Се надевам ќе има и други пратенички прашања и се надевам ќе ме почестат со нивното присуство. Јас сум подготвен на македонската јавност и на поддржувачите на Левица да им разоткријам дека не е баш така како што некој сака да ги прикаже работите“.
Премиерот Мицкоски од говорницата истакна дека овие работи ги кажува и да ги разоткрие неколкумина скапо платени таканаречени левичари кои со дејствувањето нанесуваат трајна штета на ткивото на македонскиот идентитет.
„Од сега па натаму, сум подготвен да разговараме и за тоа, да видиме кој, што, како и каде, и за мене. Па ќе се вратиме малце и на патните трошоци, ама ќе се вратиме и на патните трошоци од партијата кои што ги земале и кога ги земале и колку земале и кои земале“, заклучи премиерот Мицкоски.
Македонија
(Видео) Костадиновска-Стојчевска до Љутков: Зошто навреме не ги пресметавте платите за вработените?

Пратеничката на СДСМ, Бисера Костадиновска-Стојчевска, на денешната собраниска седница посветена на пратенички прашања, упати прашање до министерот за култура Зоран Љутков, кое се однесуваше на неисплатените плати, непочитувањето на колективниот договор за исплата на платите на културните работници .
„МКажавте дека сте биле член на СКРМ во време на потпишувањето на колективниот договор, и јас очекувам – бидејќи вие секогаш сакате правда и исправување на криминал – дека, ако нешто било незаконско во тој колективен договор, требало да реагирате и да укажете, како што денес тврдите. Сакам да знам дали и зошто сега го напаѓате колективниот договор. Дали планирате да го промените членот 65 од истиот колективен договор?“, праша Костадиновска-Стојчевска.
Во завршната одредба на овој колективен договор, додаде таа, стои дека тој останува во важност до моментот на потпишување на нов колективен договор.
„Значи, тој е важечки според сите одредби. И вие знаете дека секогаш со мартовската плата во културата се прави усогласување со минималната плата, откако таа започна да расте. И токму моето прашање до вас: зошто не ги направивте новите решенија на време? Зошто урнек-решенијата се испратени на 10 април до установите, знаејќи дека имате безмалку околу 100 културни установи – 49 под Министерство за култура и 49 под локална самоуправа?И зошто дури на 10 април се добиени тие урнек-решенија и не се потпишани од тој што ги изработува? Дали не бевте во државата? Дали во Министерството за култура ова е времето кога се користат ланските одмори, па сега немате таму помош? Или имавте некоја друга намера?“, праша таа.
Македонија
Реконструкција на паркот „Бановина“ во Лисиче

Општина Аеродром започна целосна реконструкција на паркот Бановина што се наоѓа во Лисиче.
Реконструкцијата на Бановина опфаќа целосна обнова на фонтаната, како на хидрауличниот систем, така и на нејзиниот надворешен изглед.
„Во нов сјај ќе блеснат и летниковците во паркот коишто претставуваат места за одмор во текот на целата година, а отсега ќе бидат надополнети со шаховски маси за заедничко дружење на сите генерации. За уште попријатен престој на жителите, паркот Бановина ќе добие и ново хортикултурно уредување“, соопштија од Општината.
Целосно нови елементи се поставуваат и во детското катче, а заменети ќе бидат и клупите и кантите за отпадоци кои се веќе дотраеини и нефункционални.
Во наредниот период ќе се уреди и црквата што се наоѓа во рамките на паркот, која исто така ќе биде осветена и ставена во функција за верниците.
Општина Аеродром најавува дека во периодот што следува ќе ги реконструира сите паркови.