Македонија
Миграции, безбедност и хибридни закони на тинк-тенк форумот во рамки на Берлинскиот процес

Миграции, безбедност и хибридни закони, владеење на правото и иднината на Европа се теми кои ќе бидат дебатирани денеска на панелите на тинк-тенк форумот што се одржува во Скопје во рамки на заедничкото претседателство со Берлинскиот процес за 2020 година.
Заедничкото претседателство на Република Бугарија и Република Северна Македонија со Берлинскиот процес е силен сигнал за регионално сопствеништво и можност за претставување важни регионални теми во поширок европски контекст. За време на состанокот ќе биде најавена приоритетната агенда на Заедничкото претседателство која цели кон зајакната интеграција и конвергенција меѓу ЕУ и земјите од Западен Балкан на политички, правен и социо-економски план.
Состанокот ќе го отворат министерот за надворешни работи на Република Северна Македонија – Никола Димитров, министерката за надворешни работи на Република Бугарија – Екатерина Захариева и министерот за надворешни работи на Сојузна Република Германија – Хајко Мас. Предвидено е поздравно обраќање од страна на претседателот на Владата на Република Северна Македонија – Оливер Спасовски.
„Министерскиот состанок е првиот настан во рамките на заедничкото претседателство со Берлинскиот процес од страна на Република Северна Македонија и Република Бугарија. Воедно, ова е и прво заедничко претседателство на Берлинскиот процес меѓу земја членка и земја кандидат за членство во ЕУ, што е потврда и поттик за зајакнатата регионална соработка во контекст на европските интеграции. Состанокот претставува одлична можност да се демонстрира силна политичка визија и да се упатат јасни, заеднички пораки во однос на регионалната соработка и европските перспективи на регионот пред претстојниот Европски совет и Самитот во Загреб“, изјави Димитров.
„Како ко-претседател заедно со Република Северна Македонија со Берлинскиот процес за Западен Балкан за 2020 година, Република Бугарија е одлучна да продолжи да работи на зголемувањето на позитивните примери на добрососедски односи помеѓу државите во регионот. Ова е начинот за да се загарантира регионалната стабилност и да се разрешат какви било отворени прашања. Состанокот на министрите за надворешни работи од Берлинскиот процес за Западен Балкан во Скопје е првиот од серијата на важни форуми кои ги планираме во рамките на нашето заедничко претседателство. Кулминацијата на нашите заеднички напори под оваа регионална иницијатива за поддршка на Европската перспектива на Западниот Балкан ќе биде Самитот во Софија, кој ќе се одржи оваа есен“, изјави Захариева.
Во рамки на заедничкото претседателство, помеѓу 8 и 10 март во Скопје се одржува и тинк-тенк форум организиран од страна на Институтот за демократија Социетас Цивилис – Скопје во соработка со Европскиот совет за надворешна политика (ECFR), од Софија. Во рамки на тинк-тенк форумот е предвидено поздравно обраќање од страна на претседателот на Република Северна Македонија, Стево Пендаровски. Согласно агендата, на 9 март на затворањето на настанот ќе говорат министрите Димитров и Захариева. На 10 март, на заедничките тематски панели ќе учествуваат министри за надворешни работи, претставници на Европската Унија, Советот за регионална соработка и тинк-тенк заедницата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Нека се препелкаат во национализмот, во лажниот патриотизам и во својата неспособност, вели Филипче за ВМРО-ДПМНЕ

Претседателот на СДСМ Венко Филипче од вечерашнава граѓанска трибина во Центар порача дека ВМРО-ДПМНЕ зборува за загари и орли додека младите се селат. Филипче испрати порака дека жално е што зад црната кампања не се крие само неспособна власт, туку власт која не сака напредок, не сака дијалог и не сака компромиси. Тој исто така рече дека ВМРО-ДПМНЕ со ваквото владеење е непријател на државата.
„Тоа е власт која се храни и одржува од внатрешни поделби, од сиромаштија која ја контролира со корупција и од хаос во кој се создава апатија. Ова е целта. Но јас во нивната кал нема да влегувам, туку ќе продолжам да ги разобличувам. Нека се препелкаат во национализмот, во лажниот патриотизам и во својата неспособност самите тие. Ги слушам, едните биле загари и орли, другите за врапчиња и што уште не. Театар за деца“, рече Филипче.
Филипче на трибината исто така рече дека подмолните обиди на ВМРО-ДПМНЕ за поделба на граѓаните, секојдневните етикетирања на опозицијата како „предавници“, режимските практики се доблестите кои и оваа влада ги носи се едни од најлошите времиња на груевизмот.
„Не е времето кратко да се види дека имаме власт отуѓена од народот, власт која партизира, узурпира и одбива да го слушне крикот на граѓаните за подобар живот и за напредок. Сведоци сме на одвратна лажна и црна кампања против СДСМ која ја водат од првиот ден власт. Оваа мизерна и ниска кампања на ВМРО-ДПМНЕ е одраз на нивната немоќ и неспобност. Но суштина е уште поболна, а тоа е дека зад кампања се кријат нивните лоши намери за иднината на оваа земја“, рече Филипче.
Македонија
Герасимовски: Центар е нова приказна, целосно реновирани сите училишта, учениците добиваат два затворени базени

Кандидатот за Градоначалник на Општина Центар од СДСМ, Горан Герасимовски, вечерва пред центарци истакна дека во изминатите четири години постигнато е многу за развој на општината.
Тој, информираше дека е изградена најдобрата градинка во Македонија, и подготвена е изградба на уште една нова.
„Ги реновиравме целосно сите училишта. На две училишта веќе поставивме фотоволтаици. Нашиот План е сите училишта и градински да имаат фотоволтаици на крововите. Нашите ученици добиваа ранци и прибори, сигурност и најдобро образование, добија униформи, а од сега ќе имаат и бесплатни здрави оброци и национална екскурзија за да ги сакаат уште повеќе и Центар и Македонија. Нашите ученици добиваат и два затворени базени и нови внатрешни и надворешни спортски терени“, рече Герасимовски.
Потенцираше дека во ова, како што рече, невреме за Скопје, кога граѓаните се дават во ѓубре и ефтини политички битки, решил да работи поинаку, не заради себе, туку заради граѓаните, затоа што тие не сакаат јалови кавги.
„Граѓаните не сакаат докажувања кој е полош. Од такви кавги не се живее подобро, од такви политичари нема резултати. Во овие четири години се водев од основните човечки вредности и принципи, да работам без пардон, и да не мислам на себе. Да работам чесно. Да работам одговорно. Да давам отчет цело време. Да работам за сите. Да ги слушам сите. Да обединувам. Да не ги делам луѓето. Да мислам за сите искрено, да помагам на сите. Да бидам достапен за сите. Така почнав од самиот почеток, така живеев и работев секој ден. Сакав Центар да стане подобро место за живеење за сите, и уверен сум дека во тоа и успеавме“, изјави Герасимовски.
Македонија
По изборите ресет на системот, да изградиме правна држава и непристрасно правосудство, порача Мицкоски

Христијан Мицкоски, претседателот на ВМРО-ДПМНЕ, се обрати на денешниот народен митинг во Македонски Брод, во рамки на изборната кампања за локалните избори 2025 година, со слоган ,,Вистинскиот избор! Твојот човек! Твоето место! За твојата иднина! Мицкоски зборуваше дека се неопходни реформи, ресет на системот кој ќе донесе подобар живот и владеење на правото.
Истакна дека судството мора да биде непристрасно и непокорливо, судиите да судат според законот, а не според влијанија.
„Моментот што го чекале генерации е пред нас, време за ресет на системот, време да ги скршиме ланците на неправдата и да изградиме држава на правда, слобода и грижа за секого. Судството мора да биде непристрасно и непокорливо, судии кои судат според законот, а не според влијанија; институции кои штитат, а не кои молчат; процедури кои враќаат доверба, а не кои создаваат сомнеж. Правдата не смее да биде привилегија на малкумина, туку право на секој граѓанин брза, достапна и ефективна. Слободата не е само збор во уставот, туку жив начин на живот: слобода на мислење, слобода на говор, слобода од страв и притисок. Здравствениот систем ќе биде столб на оваа држава модерни болници, достапни лекови, стручен кадар и превенција што штити семејства, наместо да ги остави ранливите сами да се борат. Ќе поставиме јасни правила, транспарентни процеси и нулта толеранција кон корупцијата која тоне животи и ја кочи промената. Овој ресет ќе биде праведен, но безмилосен кон оние што го злоупотребувале народот ќе вратиме одговорност, ќе го вратиме достоинството и ќе изградиме систем на кој гордо ќе му служиме. На сите нивоа, од најмалите служби до поголемите структури, постојат елементи кои функционираат како дел од една „длабока држава“ не само во едно Министерство или една партија, туку во мрежи кои понекогаш се шират низ партии, институции и, жално, понекогаш и низ етничките заедници“, истакна Мицкоски.
Додаде дека најавениот ресет не е реванш, туку враќање на довербата во институциите и владеење на правото.
„Ова не е напад врз народот, ова е повик на одговорност: каде што имало злоупотреба, ќе има истрага; каде што имало влијание, ќе има транспарентност; каде што имало корупција, ќе се воведе сила на правото. Ние нема да дозволиме никој да се крие зад статуси или мандати додека ги краде шансите на граѓаните. Реформите што ги најавуваме судска реформа, реформа на правосудството, реформа на администрацијата и целосна дигитализација на услугите ќе ги исечат вкоренетите врски и ќе ги вратат институциите кај граѓаните. Овој ресет не е реванш, туку вразумување: чесноста ќе биде мерило, отчетноста ќе биде правило, а слободата и правдата повторно ќе станат неприкосновени вредности. Јас и оваа Влада ќе работиме со цела сила, рамо до рамо со граѓаните и со партнерите кои веруваат во правото, за да изградиме држава каде што институциите служат на народот а не на сопствени интереси. Заедно ќе го направиме тој ресет; заедно ќе ја вратиме довербата“ истакна Мицкоски.
Ги повика граѓаните да излезат на 19 октомври и да гласаат за број 9.
„Мене ми е јасна состојбата со опозицијата на трикови, подземни коалиции но тоа нема да го коментирам. Затоа е многу е важно да излезете на избори и да гласате. Македонија е исправена и подготвена да оди напред! Нема поголема сила од народот кој верува, од народот кој знае што сака и кој знае дека иднината е во негови раце. Нашата борба не е само за една општина, не е само за еден град. Нашата борба е за секое семејство, за секое дете што сака подобро училиште, за секој млад човек што сака работа и останува тука, дома, во Македонија“, нагласи Мицкоски.