Македонија
Милевски: Со паметни еко зони до ублажување на климатските промени

Нова иновативна еко зона е отворена преку проектот одржлив и инклузивен рамномерен регионален развој.
Министерството за локална самоуправа поддржува проекти за ублажување на климатските промени во земјава во осум плански региони, информираше ресорниот министер Горан Милевски.
Целта на проектот, како што рече е создавање инспиративни јавни површини со еколошки иновации кои користат обновлива енергија и го прочистуваат воздухот, а со тоа ќе поттикнат и навики на еколошка одговорност кај граѓаните.
Проектот е со вкупен буџет од 3.360.600 денари од кои 2.160.000 денари се обезбедени преку министерство за локална управа и Швајцарската амбасада преку проектот Одржлив и инклузивен рамномерен регионален развој.
Милевски појасни дека овие иновативни еко-зони се наоѓаат на територија на три скопски општини, поточно првата е во рамки на Зоолошката градина која се наоѓа во општина Карпош, другата локација е дел од плоштадот „Јадран“ во општина Центар и детскиот Парк „Шопен“ во општина Кисела Вода.
На овие места се поставени смарт клупи кои имаат сензори за квалитет на воздух, се напојуваат од сончева енергија и имаат бесплатен бежичен интернет и се оплеменети со зеленило и заедно со кантите за селекција ја создаваат „Биди Зелен“ зоната.
Зоните како што информираат надлежните, се поставени на стратешки локации со можност да се едуцираат и најмладите за климатските промени, квалитетот на воздух, обновливи извори на енергија и рециклирањето на секундарни суровини. За промоција и едукација ќе се користи рециклирана садлива хартија која откако децата ќе прочитаат ќе ја засадат во саксија и ќе научат за циркуларната економија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сиљановска Давкова објави дека се фотографираше со Доналд и Меланија Трамп

Претседателката Гордана Сиљановска Давкова на својот Фејсбук-профил објави дека ѝ претставувало чест да присуствува на приемот што го приредија претседателот на Соединетите Американски Држави, Доналд Трамп, и неговата сопруга Меланија Трамп, по повод 80. Генерално собрание на Обединетите нации.
Во објавата таа истакна дека во овие турбулентни времиња е важно да не се отстапува од демократските вредности и да се работи заеднички на зачувување на глобалниот мир и безбедност, додавајќи дека САД остануваат искрен сојузник на Македонија.
„Благодарност за гостопримството!“, напиша Сиљановска Давкова.
Македонија
Филипче: Ѓубрето во Скопје е исклучиво одговорност на ВМРО-ДПМНЕ

Претседателот на Сoцијалдемократскиот сојуз на Македонија, Венко Филипче, во одговор на новинарски прашања поврзани со најновите анкети кои се појавија во јавноста, а кои наводно укажуваат на слаб резултат на СДСМ, остро ги отфрли ваквите наративи, оценувајќи ги како намерен обид да се искриви реалната слика во општеството.
„Прво, анкетите сметам дека се обид да се искриви вистинската слика во секојдневниот живот и реалноста, а тоа е дека ВМРО-ДПМНЕ според наши анализи губи огромен број на гласови. Сакаат да створат некаква перцепција дека се победници, меѓутоа вистината е дека граѓаните воопшто не се задоволни од начинот како тие ги раководат општините“, рече Филипче.
Во одговорот, Филипче посочи дека токму локалното владеење на ВМРО-ДПМНЕ во изминативе четири години е најсилниот аргумент против нив, особено во главниот град.
„Еве, 90% од општините во Скопје, вклучувајќи и градот Скопје, се раководени од ВМРО-ДПМНЕ во изминатите 4 години. Па гледајте во каков град, какви општини живееме. Така што сметам дека е тоа само еден таков обид“, рече Филипче.
На новинарско прашање за хаосот со ѓубрето, запуштените улици и урбаната запоставеност на градот, Филипче директно ја посочи одговорноста кон ВМРО ДПМНЕ.
„Исклучиво и ексклузивно вината е во ВМРО-ДПМНЕ, во блокадите на Советот во Град Скопје, во рамките на раководењето на нивните општини. Еве, видете како е несредено, неискосено, неисчистено и во Аеродром, и во Кисела Вода. И сега тие луѓе повторно претендираат да бидат градоначалници“, рече Филипче.
Тој додаде дека оваа очајна слика е резултат на неработење и неодговорност на ВМРО ДПМНЕ, а дека пуштањето на анкети со однапред нарачани резултати е обид за одбрана од вистината.
„И во една таква ситуација, кога луѓето се свесни дека тие луѓе немале никаков перформанс, и сега се повторно кандидати, сè што можат во овој предизборен период е да пуштат такви лажни анкети“, рече претседателот на СДСМ, Венко Филипче.
Македонија
Пожарите стивнаа, остана само еден активен

На територијата на државата денеска до 18:00 часот има два пожари на отворен простор, од кои еден пожар е активен и еден е изгаснат, информираат до ЦУК.
Активен е пожарот во Општина Демир Капија, кај м.в. Јаворица каде гори нискостеблеста деградирана шума.
Изгаснат е пожарот во село Дедели, во Општина Валандово, каде гореше депонија.