Македонија
Министерката за труд и социјална политика во Женева на Меѓународната конференција на трудот

Министерката за труд и социјална политика, Јованка Тренчевска, денеска отпатува за Женева, Швајцарија, каде што ќе учествува на 110-тата Меѓународна конференција на трудот, која е највисокото тело за одлучување на Меѓународната организација на трудот, чија членка е и Република Северна Македонија.
Секоја година во јуни оваа конференција ги собира трипартитните делегации од 187 земји – членки на Организацијата. Делегацијата на Република Северна Македонија ја предводи министерката Тренчевска и во согласност со правилата на МОТ делегацијата е составена од два делегата на Владата и по еден претставник од репрезентативниот синдикат на национално ниво и претставник на репрезентативното здружение на работодавци на национално ниво. Годинава тоа се претставникот од Сојузот на синдикатите на Македонија и Организацијата на работодавците на Македонија, кои се и членови на Економско-социјалниот совет.
Делегацијата на Република Северна Македонија на оваа конференција учествува на втората пленарна недела на Конференцијата.
Покрај обраќањето на министерката на Меѓународната конференција на трудот, планирани се и средби со претставници на делегации од други земји членки на Меѓународната организација на трудот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Петрушевски: Ако на некого не му е јасно зошто истрагата за Кочани е таму каде што е, нека ги праша СДС и Коцевски

СДС и ДУИ се соголија. Паднаа маските. Покажаа дека тие стојат зад главниот обвинител Љупчо Коцевски, зошто во него гледаат единствена сламка за спас од кривична одговорност за сторените криминали, вели Бране Петрушевски, пратеник на ВМРО-ДПМНЕ на денешната прес-конференција.
СДС и ДУИ, како што рече, се единствениот спас за главниот обвинител Коцевски, и сега на секој му е совршено јасно зошто обвинителството нема еден случај против висок функционер од минатата власт.
„Со гумата за спасување која СДС и ДУИ му ја фрлија на главниот обвинител Коцевски паѓаат во вода сите оние тиради од прес конференции за Кочани, лажните повици, хушкања за Кочани каде лажно велеа дека бараат правда.
Кога следен пат ќе сакаат да држат прес-конференција за Кочани, треба да се потсетат дека истиот предмет го води главниот обвинител Коцевски и нема потреба да повикуваат јавно, нека си го прашаат лично него. А ако мислат дека ќе ја манипулираат јавноста после ова, им порачуваме дека дебело се лажат. Прочитани сте“, порача Петрушевски.
Главниот обвинител Коцевски, како што додаде, треба да знае дека со секој ден поминат без легитимитет му се урнисува и така урнисаниот углед. Очекува истиот да покаже доблест и да се поднесе оставка.
Македонија
(Видео) Стојчевски: Лефков е симбол на сѐ погрешно во ВМРО-ДПМНЕ, сее лаги, а молчи за Кочани

Додека Македонија гори, прва во Европа по изгорена територија Миле Лефков и ВМРО-ДПМНЕ лажат, манипулираат и спинуваат за да ја покријат својата непособност. Човекот кој месеци молчеше и се криеше од сопствените сограѓани во Кочани, сега повторно излегува да сее лаги, да манипулира и да спинува, кажа на прес-конференција Трајче Стојчевски претседател на СДММ.
Тој праша, со кое лице и зошто Миле Лефков денес се појавува а после трагедијата во дискотеката „Пулс“ го снема.
„Дали затоа што бил чест гостин? Дали си правел прослави, забави, а не плаќал? Или како што јавно се зборува затоа што наводно бил на платен список кај еден од сопствениците? Како член на локалниот Совет за превенција во Кочани, Миле Лефков знаел што се случува во дискотеката во Пулс. Ама молчел. Нека излезе пред граѓаните и нека каже зошто молчел и кого штител“, повика Стојчевски.
Како што кажа, Лефков не донирал ниту денар за настраданите во Кочани. Напротив, вели тој, јавно тврдеше дека со Законот за помош на семејствата се „рушел правниот поредок“.
„И сега, истиот тој Лефков, лажно обвинува од прес-сала, покажува монтирани фотографии и се надева дека граѓаните забораваат.
Наместо да се крие зад фабрикувани лаги на партиски прес-конференции, Миле Лефков нека излезе пред граѓаните и нека одговори. Нека се соочи со вистината. Ова не се прашања на СДСМ. Ова се прашања на народот. Прашања на совеста“.
Според него, Лефков е симбол на сѐ што не смее да биде македонскиот пратеник: бегство, ароганција, молк за вистината и партиска лојалност пред човечка совест.
„Но Лефков има еден голем проблем – граѓаните не забораваат“.
Македонија
(Видео) Лефков: Самиот Зоран Заев призна дека потпалувачот на пожари бил шофер кај него во Општината, СДС да се извини и да се огради од Заев

Самиот Зоран Заев призна дека потпалувачот на пожари бил шофер кај него во општината, СДС да се извини и огради од Заев. Зоран Заев во изјава за еден пишан медиум кажа: ,,Александар Николов во тоа време, колку што се сеќавам, работеше на портирницата во општината и беше возач на општинско возило”, посочи Миле Лефков, пратеник на ВМРО-ДПМНЕ на денешната прес-конференција.
„Лицето А.Н. кое било шофер кај Заев е потпалувач на пожар, кое е уапсено од полицијата. Кој може да верува дека шоферот на Заев потпалувал пожар на своја рака, без нечија насока“, прашува Лефков.
Дел од пожарите, според него, се потпалуваат од лица блиски до опозицијата, а затоа има и уапсени.
„И додека овие пиромани како шоферот на Заев ги палат пожарите, СДС и нивните апологети креваат паника и шират лаги во јавноста.
СДС се притиснати до ѕид. Наместо да држат прес-конференции и сеат магла, да се извинат за шоферот на Заев и оградат од него“, додаде Лефков.