Македонија
Министерката Петровска во посета на македонските војници во Романија, високи оценки за нивниот придонес во овие мултинационалните сили на НАТО
Министерката за одбрана, Славјанка Петровска, во рамките на официјалната посета на Романија во касарната „Отопени“ ги посети војниците од македонскиот контингент, кои се дел од мултинационалните сили на НАТО сместени во оваа сојузничка земја.
„Ги слушнав оценките на вашите претпоставени дека вашиот ангажман и посветеноста се на навистина највисоко ниво. Заедно со другите нации секој ден работите и учествувате во сите вежби и во сите активности и давате позитивен пример и вие и колегите од претходната ротација“, рече министерката на средбата со војниците и додаде дека припадниците на Армијата, кои ќе пристигнат со следната ротација, ќе имаат сериозен предизвик да остават исто така добар впечаток.

„Секој од вас дава свој личен придонес за колективната безбедност и за успехот на Северна Македонија како членка на НАТО“, рече министерката Петровска заблагодарувајќи им се војниците од македонскиот контингент во мултинационалните сили на НАТО во Романија.
Таа рече дека високите оценки за секој од 35-темина македонски војници во овие НАТО-сили ја оправдуваат довербата што ја добиле од Министерството и Генералштабот и им порача да продолжат да бидат посветени како и досега, да даваат сè од себе, да создадат пријателства и познанства што ќе траат вечно и да се вратат назад во својата земја, кај своите семејства, побогати за едно големо искуство.

Петровска во базата „Отопени“ го посети павилјонот во кој се сместени македонските војници по што беше организиран и ручек со сите припадници на Армијата.
Пред командантот на мултинационалните сили, бригадниот генерал Константин Николаеску, и членовите на штабот, министерката Петровска се заблагодари за топлиот пречек и за несебичниот придонес на сите НАТО-војници во оваа мисија, кој, како што рече таа, е потврда дека НАТО заштитува, обединува и зацврстува.

„Исклучително сум благодарна за силната поддршка што му ја давате на македонскиот контингент. Уверена сум дека секој припадник на Армијата дава свој придонес и дека нераскинливите врски што ги создадовте ќе траат вечно“, порача министерката.

Северна Македонија својот придонес во рамките на мултинационалните сили на НАТО во Романија го почна во ноември 2022 година со испраќање единица во јачина од еден вод, односно 35 припадници во рамките на овие НАТО-сили. Целта на мултинационалните сили на НАТО во источното крило на алијансата е да ја зацврстат колективната безбедност и да го демонстрираат единството на земјите членки во заштита на секоја педа сојузничка територија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Герасимовски: Воведуваме „Центарска картичка“ со попусти за културни, спортски настани, локали и продавници
Кандидатот за градоначалник на Општина Центар, Горан Герасимовски, денеска најави дека се воведува „Центарска картичка“ со попусти за културни и спортски настани, локали и продавници.
„Секој центарец добива еднаш годишно бесплатна карта за театарска претстава, а за секоја следна купена карта добива 20% попуст. Со картичката, овоможуваме и 20% попуст за натпреварите на нашиот најтрофеен клуб „Работнички“, како и попусти за влез на базен. На нашите центарци, на децата и возрасните им овозможуваме подобри услови и поволности“, рече Герасимовски.
Македонија
Почина Агим Јонуз
Политичкиот анлитичар, Агим Јонуз, почина во Скопје на 63 години по боледување.
Јонуз беше активен во политичкиот живот во Македонија не само како аналитичар и колумнист, туку и како поранешен советник и портпарол на поранешниот претседател на Собранието, Лупчо Јордановски и на поранешниот премиер Бучковски.
Во 2021 година Јонуз беше носител на листа на советници за Град Скопје предложен од „Твоја Партија“.
Јавноста го познаваше како чест гостин во политичките дебатни емисии на телевизиите.
Погребот на Агим Јонуз ќе се одржи утре, 26 октомври 2025 година, на гробиштата во Бутел.
Македонија
ВМРО-ДПМНЕ веќе има 35 градоначалници, рече Мицкоски по повлекувањето на опонентите од Могила и Македонски Брод, очекува 59
Премиерот и претседател на ВМРО-ДПМНЕ, Христијан Мицкоски од денешниот митинг во Неготино изрази увереност дека кандидатката од ВМРО-ДПМНЕ која има предност пред нејзиниот опонент од СДСМ, ќе биде следниот градоначалник на општината.
Мицкоски нагласи дека граѓаните јасно ја изразиле својата волја и доверба кон ВМРО-ДПМНЕ и Коалицијата, која во првиот круг освоила 33 градоначалници, наспроти тројца од СДСМ, а во вториот круг влегла во 26 општини.
„Веќе во две општини противниците на нашите кандидати се откажаа – Македонски Брод и Могила – така што во овој момент коалицијата има 35 градоначалници и уште во 24 општини е во втор круг. Тоа се 59 потенцијални градоначалници“, рече Мицкоски, додавајќи дека тоа ќе биде историски најголем триумф на македонската политичка сцена.
Тој посочи дека ВМРО-ДПМНЕ е апсолутен победник на овие избори, имајќи мнозинство и во 58 општински совети, а го истакна и водството на кандидатот за градоначалник на Град Скопје, со предност од над три спрема еден во однос на противкандидатот.
Мицкоски ги повика граѓаните масовно да излезат на гласање на 2 ноември и да го заокружат бројот 9, за, како што рече, да се потврди „најголемата победа во историјата на Македонија“.

