Македонија
Министерот Тошковски во работна посета на СВР Куманово, ОВР Кратово и ОВР Крива Паланка

Министерот за внатрешни работи Панче Тошковски денес оствари работни средби со раководствата на Секторот за внатрешни работи Куманово, Одделението за внатрешни работи Кратово и Одделението за внатрешни работи Крива Паланка.
На состаноците со раководствата на овие организациски единици беше потенцирано дека безбедносната состојба на целосно подрачје е стабилна, а се разговараше и за тековните активности, движењето на криминалитетот, одржувањето на јавниот ред и мир и предизвиците со кои се соочени од аспект на недостаток на материјално-технички средства и недоволна пополнетост со човечки ресурси.
„Генерален заклучок е дека што поскоро треба да се направи набавка на возила и друг вид на опрема неопходна за ефикасно постапување на полицијата и да се направат сериозни реформи во делот на систематизацијата на работните места во министерството и полициските службеници да бидат соодветно вреднувани согласно тежината на работните задачи кои ги извршуваат“, подвлече министерот Тошковски на состаноците.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Петрушевски: Филипче, кажи што си договорил со Бугарите и кој бонбона бизнис им го нудиш, кога веќе еднаш подметна француски предлог

СДС и Венко Филипче деновиве од петни жили се трудат да испратат сигнали до Бугарија дека се спремни да направат се, да клекнат и да прифатат секоја позиција, па излегоа со наводна резолуција.
Резолуцијата не е за Венко не е за Македонија, таа е за Бугарија, знак и сигнал на што се е спремен да направи, договара, преговара и дополнително да ја понижува државата, истакна на прес-конференција Бране Петрушевски пратеник на ВМРО-ДПМНЕ.
„Венко Филипче, кажи што си договорил со Бугарите и кој бонбона бизнис им го нудиш, кога веќе еднаш подметна француски предлог?
Дали преку таквата резолуција се нудиш како Заев што се нудеше своевремено?
СДС и Филипче мислат дека тоа што поминало еднаш, ќе помине и втор пат. Забораваат една работа, народот е мудар и не можат да го прелажат“.
Од километар се гледа, додава тој, намерата на Филипче и минирањето на македонските позиции.
Ако Венко Филипче е искрен, оцени Петрушевски, тој ќе застане зад позициите на Владата, а не од национални теми да прави шибицарски фори.
Македонија
Членка на Судскиот совет користела патни трошоци иако немала право: МВР поднесе кривична пријава

На 15.09.2025 Единицата за корупција при Секторот за криминалистички истраги во Одделот за сузбивање на организиран и сериозен криминал и Одделот за криминалистичка полиција до ОЈО Скопје поднесоа кривична пријава против Л.Г. (57) од Струмица, за сторено кривично дело „измама во службата “ член 355 став 1 во врска со став 2 од КЗ.
Пријавената Л.Г., како службено лице – член на Судски совет на Република Северна Македонија, во временски период од 26.08.2022 до 15.01.2024 со намера за себе да прибави противправна имотна корист, со неприкажување на фактот дека има промени во имотната состојба на членовите на нејзиното потесно семејство, не поднела навремено известување до претседателот на Судски совет дека нема да користи патни трошоци за патување на релација од Струмица, како место на живеење, до Скопје, како место на извршување на работата и обратно, со што го довела во заблуда Судскиот совет да и исплаќа надоместок на трошоци за превоз согласно точка 4 од Одлуката за начинот на остварување на правата на судиите утврдени во Законот за платите на судиите бр.02-1425/12 од 13.10.2010, а донесена од страна на Судски буџетски совет, согласно одредбите од член 8 од Законот за платите на членовите на Судскиот совет.
Имено, пријавената Л.Г. во својство на судија од Основен суд Струмица во 2018 година била избрана за член на Судски совет, од редот на судии од апелационо подрачје Штип, при што, согласно член 8 од Законот за платите на членовите на Судскиот совет, членот на советот има право на надомест на трошоци за превоз во висина од вистинските трошоци за јавен сообраќај. Согласно тоа, пријавената Л.Г. поднела барање, кон кое доставила копија од лична карта, одлука за избор за судија и изјава заверена на нотар дека таа или член од нејзиното потесно семејство немаат стан или куќа во нивна сопственост во местото каде ја извршува функцијата.
Пријавената Л.Г. во 2022 година имала промена на имотна состојба, односно нејзината ќерка се стекнала со недвижен имот-стан во Скопје, но Л.Г. не поднела навремено известување до претседателот на Судски совет, за што од страна на Судски совет на пријавената за период од септември 2022 година (како месец по стекнувањето на имотот) до декември 2023 година (кога и престанало правото на надомест на трошоци за превоз по нејзино доставено известување на ден 15.01.2024) во вкупно 15 наврати и биле исплатени пари како надомест за патни трошоци во вкупен износ од 291.040 денари, за кој износ Л.Г. се стекнала со противправна имотна корист, а на штета на буџетот на Судски совет на РСМ.
Македонија
Лукровски: На Карпош му е доста од бетонизација, ќе се формира ЈП ,,Карпош план“ со цел ревизија на сите урбанистички планови

На Карпош му е доста од бетонизација. Нашата општина, која со години важеше за пример на хумано и квалитетно живеење, денес е под притисок на непланска градба, урбанистички решенија кои ја гушат секоја населба, вели Сотир Лукровски,кандидат за градоначалник на Карпош од редовите на ВМРО-ДПМНЕ.
На Карпош, додава тој, му е доста од градби кои го одземаат зеленилото и создаваат бетонски џунгли.
„На Карпош му е потребна хумана урбанизација, со рамнотежа меѓу домувањето зелените површини, инфраструктурата, јавниот интерес.
Јас велам не,за дуповите за мерка на урбаната мафија и не за пренатрупување на нашите населби.
Досега видовме како интересите на мал број инвеститори беа ставени пред интересот на граѓаните. Сведоци сме како паркови, игралишта исчезнуваа, а на нивно место никнуваа згради.
Луѓето од Карпош живеат во страв, дека паркот пред зградата, дека дрвото до нивниот влез, дека просторот за нивните деца, ќе стане само уште една нова градежна парцела.
Јас Сотир Лукровски, ви ветувам дека тоа ќе престане. Како идно раководство на Општина Карпош ќе направиме неколку клучни чекор“и.
Најави целосна ревизија на сите детални урбанистички планови, дупови.
Секој план што е донесен спротивно на јавниот интерес, како што рече, ќе биде вратен и преиспитан.
„Формирање на ЈП ,,Карпош план“ кое ќе биде по целосна контрола на општината и граѓаните и ќе изработува планови во интерес на хуманата урбанизација, а не по нарачка на некој.
Ви давам гаранција дека ќе го штитам јавниот интерес, граѓаните и нема повеќе да се плашат дека паркот пред нивната зграда, игралиштето или малото парче зеленило ќе прерасне во нова зграда.
Гарантирам, отворен процес на консултации со жителите, и ниту еден план нема да се носи без транспарентна дебата и директна вклученост на оние што живеат во таа населба.
Карпошани заслужуваат чист воздух, зеленило, простор за децата, и мирен живот на своите маала. Не заслужуваат хаос. Не заслужуваат бетони и уништување на се што е вредно околу нас“.