Македонија
Министерството за здравство: Спасен пациент со мозочен удар со новата метода на лекување

На пациент што доживеал мозочен удар, поради затнување магистрален крвен сад во мозокот, завчера тим лекари од невролози, анестезиолози и радиолози, му го спасиле животот со помош на новата комбинирана метода на тромболиза и тромбектомија, соопшти Министерството за здравство. Од таму додаваат дека оваа метода се применува во сите сите современи клиники во Европа и Америка.
Од Министерството појаснуваат дека станува збор за зафат со кој во исто време со помош на тромболиза, која го омекнува тромбот заглавен во крвниот сад, и тромбектомија или механичко отстранување на тромбот, и тоа во најкус можен рок, на пациентот му е спасен животот, но и моторните функции на екстремитетите, кои често како последица од мозочен удар остануваат во состојба на одземеност.
Пациентот на кој му е извршен успешниот зафат го посети министерот за здравство, Венко Филипче.
„Пациентот се чувствува добро. Најважно е дека навреме се спасени сите витални функции кај него, непречено ги движи и нозете и рацете. Без примената на оваа нова метода, пациент со ваков мозочен удар или ќе починеше или ќе останеше со трајни инвалидни последици. Голем успех за тимот лекари што беа вклучени во овој за нас иновативен пристап, но кој покажува многу добри резултати при состојби на акутен мозочен удар. Им честитам на колегите, а на пациентот му посакувам побргу да закрепне и си оди дома кај семејството“, изјави министерот Филипче.
Зафатот го изведе тим од лекари и медицински сестри од универзитетските клиники за неврологија – д-р Анита Арсовска и д-р Бојан Бошковски, од клиниката за радиологија – д-р Петар Јаневски, д-р Менка Лазарова и д-р Дејан Даскалов и од КАРИЛ анестезиологот д-р Азби Агуши.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Параглајдинг несреќа на Галичица: државјанин на Германија доживеа тежок пад од поголема височина

Планинската спасителна служба Охрид извести дека вчера, околу 18:30 часот, добила повик од група параглајдеристи кои летале од падините на Галичица.
Тие пријавиле дека нивниот пријател, државјанин на Германија, од засега непознати причини доживеал тежок пад од поголема височина, на исклучително непристапен и карпест терен.
„За голема среќа, тројца спасители на ПСС во тој момент престојуваа во планинарската куќа „Спиридон“, каде е лоцирана и спасителната станица на ПСС, опремена со специјализирана техничка опрема за интервенции во овој регион. Веднаш по дојавата, екипата за само 15 минути стигна до местото на несреќата, изврши имобилизација на повредениот и започна комплексен транспорт по стрмен и тежок терен. Дополнителна отежнувачка околност беа и ноќните услови во кои се одвиваше целата акција.
По повеќе од еден час напорна интервенција, во 20:20 часот, повредениот беше безбедно спуштен до асфалтниот пат кај превојот Баба, каде беше предаден на екипа на Итната медицинска помош од Охрид. Од таму, тој веднаш беше пренесен во Специјалната болница за ортопедија и трауматологија „Св. Еразмо“, каде, за жал, му беа констатирани фрактури на пет пршлени во долниот дел на рбетот“, велат од Планинската спасителна служба.
Македонија
(Фото) Герасимовски: Со новата механизација го исчистивме сметот во Центар

Градоначалникот Горан Герасимовски, информира дека во текот на вчерашниот ден хигиеничарите од општината со новата механизација за чистење го собраа целиот смет од улиците во Центар.
„Целиот смет е собран од центарските улици. Нашите вредни хигиеничари вчера чистеа и во населбата Кале, а потоа со цистерна ги миеја улиците. Самите го исчистивме Центар, додека Град Скопје и ЈП „Комунална хигиена“ го преплавија цело Скопје со смет. Им благодарам на хигиеничарите што секојдневно се на терен, неуморно работејќи за наша почиста општина“, рече Герасимовски.
Македонија
Муцунски во Њујорк: Активна агенда со билатерални и мултилатерални средби

Шефот на македонската дипломатија, Тимчо Муцунски, во рамки на учеството на 80. Генерално собрание на Обединетите Нации во Њујорк, оствари низа билатерални средби и учествуваше на значајни мултилатерални настани.
Во одвоени средби со неговите колеги – министерот за надворешни работи на Кипар, Константинос Комбос, и министерот за надворешни работи на Султанат Оман, Сајид Албусаиди – беше потврдена заложбата за понатамошно унапредување на односите. Со министерот Комбос акцентот беше ставен на поддршката за европската интеграција и улогата на Кипар како земја-членка на ЕУ, која од јануари 2026 година ќе го преземе претседавањето со Унијата. Во разговорите со министерот Албусаиди, пак, фокусот беше насочен кон развој на билатералната соработка, особено во областа на трговијата и економијата.
Муцунски учествуваше и на Првиот биенален Самит за одржлива, инклузивна и отпорна глобална економија, каде ја нагласи улогата на Обединетите Нации во справувањето со глобалните предизвици и ја истакна посветеноста на државата кон спроведување на Целите за одржлив развој, усогласени со Националната стратегија за одржлив развој.
На покана на италијанскиот министер за надворешни работи, Антонио Тајани, министерот Муцунски присуствуваше и на работниот појадок со групата „Пријатели на Западен Балкан“, каде се разговараше за европската перспектива на регионот, стабилноста и регионалната соработка. Муцунски нагласи дека земјата останува цврст и конструктивен партнер на Европската Унија – посветена на реформите, владеењето на правото и економскиот раст, известува Министерството за надворешни работи.