Македонија
Мисајловски: Заеднички вложуваме во обука, едукација, тренинг и модернизација со нова современа опрема која е компатибилна согласно НАТО стандардите

Презентација на тактичко-техничките карактеристики на лесните оклопни возила JLTV и запознавање со активностите, мисиите и задачите на декларираната единица, вториот пешадиски баталјон, беше реализирана денеска во касарната „Јане Сандански“ во Штип пред премиерот Христијан Мицкоски, министерот за одбрана Владо Мисајловски, началникот на Генералштабот, генерал-потполковник Васко Ѓурчиновски, заменик министерката за одбрана Елфет Исмаили, генералите Мирче Ѓоргоски и Сашко Лафчиски и амбасадорката на САД, Анџела Агелер, во рамки на приемот на уште шест нови JLTV возила.
Мисајловски за време на денешната посета потенцира дека соработката со нашиот стратешки партнер добива на интензитет и дека од позиција, министер за одбрана ќе даде свој максимален придонес за унапредување на состојбите во Армијата, во развој на нејзините човечки капацитети и опрема, во соработка со Генералштабот, со сојузниците и со синдикатите во одбраната.
„Ние заедно со САД и останатите сојузници даваме максимален напор во тренинг, обука, едукација и се разбира модернизација со нова современа опрема која е компатибилна согласно НАТО стандардите и која е согласно Долгорочниот План за развој на одбранбени способности и Планот за опремување и модернизација на Армијата.“, посочи Мисајловски и додаде „Нашето Партнерство е силно и заеднички продолжуваме да придонесуваме во безбедноста и мирот“
Мисајловски рече дека во овој момент македонската Армија располага со 38 JLTV возила, а согласно договорот Влада со Влада до крајот на 2025 година треба да пристигнат преостанатите 58 возила, како и сите оклопни транспортери STRYKER, кои ќе бидат наменети за развој на Лесната пешадиска баталјонска група и Тимовите за специјални операции.
Премиерот Мицкоски упати благодарност до сите припадници на Армијата за нивниот придонес во зачувување на територијалниот суверенитетот и интегритет на нашата татковина и дека Владата се обврзува да ги овозможи сите неопходни услови за нивно беспрекорно извршување на задачите.
„Благодарност до македонските вооружени сили овдека кои што беа со нас и кои што на еден навистина инспиративен начин направија презентација на предизвиците кои што следат, и на тоа што треба ние како влада да направиме во периодот што следи да истите тие ги модернизираме и им овозможиме услови за современа Армија која што ќе одговори на предизвиците на новото време“, истакна Мицкоски и упати благодарност до САД, амбасадорката Агелер и сите вклучени лица од вооружение сили на САД кои помагаат во осовременувањето на македонската Армија.
На настанот се обрати и амбасадорката на САД Анџела Агелер која упати благодарност од страна на САД, претседателот, владата и амбасадата на САД до премиерот Мицкоски и министерот за одбрана Мисајловски за почитување на обврските кои што ги презема нашата земја кон Алијансата.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Добро е што ВМРО-ДПМНЕ не ги отфрла црвените линии

По објавената Резолуција со црвените линии, добро е што ниедна од партиите, ниту ВМРО-ДПМНЕ, не ги отфрла црвените линии ниту чекорите од планот кој го предложи СДСМ, велат од опозициската партија.
Во овој контекст, додаваат од СДСМ, уште еднаш нагласуваме дека самата Резолуција е во заеднички национален и државен интерес, ги содржи сите потребни одредници за заштита на македонскиот јазик, идентитет, историја и култура и предвидува јасни државни позиции и чекори во однос на евроинтегративниот пат.
„Што се однесува до коментарите на Мицкоски за „лажни и неточни историски факти“, јасно укажуваме дека такво нешто во Резолуцијата нема. Напротив, во неа се вградени прецизно, фактографски и историски, сите претходни резолуции и историски датуми во прогресот кон Европската унија, и нема ништо непрецизно. Порачуваме дебатата на оваа тема во иднина да продолжи конструктивно – на никој не му оди во прилог да се извртуваат тезите или да се укажува на неточности кои реално не постојат“, велат од СДСМ.
Од таму велат дека се отворени за сите конструктивни забелешки на партиите и сите политички чинители.
„Време е конечно да изградиме национален консензус во интерес на сите граѓани и да покажеме зрелост дека партиите може да соработуваат кога се во прашање повисоки цели и иднината на државата. Граѓаните од партиите очекуваат дијалог и соработка кога станува збор за нивната иднина. СДСМ е подготвен на тоа“, велат од СДСМ.
Македонија
Зошто уште не се фатени сите потпалувачи и нарачатели на пожарите, прашуваат од „Зелен хуман град“

По еден од најкацерогените месеци во Скопје, каде што речиси секој ден имавме нов пожар, тренд кој дури и уште продолжува, ние немаме никакво известување од МВР дека сите сторители и нарачатели се приведени. На сите ни е јасно дека вакво потпалување не е спонатно и несреќен случај. Зарем се исцрпени државните капацитети за лоцирање луѓе што директно убиваат скопјани со загаден воздух, прашуваат од Граѓанската иницијатива „Зелен хуман град“.
„Како вистински терористички напад, зошто не се пуштени сите капацитети на државата за лоцирање на сите одговорни за нападот врз нас скопјаните? Се апси спорадично и не се апсат нарачателите, туку (дел од) извршителите.
Може во моментот не осетивме премногу импакт врз нашето здравје, но за неколку години, кога ќе рипнат бројките на белодробни заболувања, карциноми, инфертилност и сите други сериозни здравствени нарушувања поради загадувањето, тогаш ќе се свестиме?
Некој денес да дојде и да ти удри тупаница, веднаш ќе очекуваш полицијата да го уапси. Е, па, така овие нелуѓе ни удираат тупаници нам и на сите наши најмили (читај деца, внуци, родители), чии модринки ќе ги чувствуваме до крајот на животот“.
Дополнително, од „Зелен хуман град“ прашуваат зошто не се сите сторители и нарачатели веднаш зад решетки.
И зошто, како што додаваат, од МВР сè уште не се преземени построги мерки за превенција на идни пожари.
Според нив, ова досега, како што велат, не беа инцидентни пожарчиња, туку смислен терористички напад врз скопјани и потенцираат дека мора да биде третиран како таков.
Македонија
Ниеден сектор не напредува, погрешните политики на власта ги плаќаат граѓаните, вели Филипче

Претседателот на СДСМ, Венко Филипче од струмичкиот регион истакна дека само СДСМ е тој кој ќе може да се спротивстави на ВМРО–ДПМНЕ.
„Само ние сме организирана структура, која што сега треба да ги научи грешките од лани, за да излезе на терен и да покаже сила, и енергија, и волја, дека сме ние тука и сме подготвени да се бориме” рече Филипче.
На средбите со граѓаните во Ново Село, Василево и Босилово, Филипче посочи дека во ниту еден сектор нема никакви резултати, што е показател за погрешните политики на ВМРО-ДПМНЕ.
„Една работа да најдеме, нема. Во земјоделството? Ништо. Ниту поддршка, ниту зголемени субвенции. Плачат лозари, плачат сточари, производителите на оризот, тутунарите. Во здравството да не зборам. Во образование? Ништо. Какви плати, ги лажат луѓето – ќе биде до година. Работниците? Ништо. Даваме предлог за платите? Ништо. Цените до плафон. Не можат луѓето да живеат повеќе. За европското прашање да не збориме, рече Филипче.
Во периодот на СДСМ, како што кажа, немаше ниту една лоша политика, мерките се креираа за граѓаните.
„Ние немаме лоша политика во ниту еден сектор. Зашто сакате ќе збориме? 300% социјална помош, платите ги зголемивме, дуплирана минималната платата. Во здравство, во образование во стопанството, со цените имавме контрола, кризите ги пребродивме. Ние бевме тука за луѓето, а Владата на ВМРО-ДПМНЕ не е за луѓето тука, не ги интересира“.