Македонија
Мисајловски: Има многу хиени коишто пробуваат да го каснат лавот, но знаете, лавот секогаш победува на крај
Денеска сакам да кажам неколку зборови за една прекрасна дама, нашата нова претседателка, дама што се бореше кога беше најтешко и дама која застана и тука пред вас пред 5 години, но и постојано кога имаше неправда. Таа жена сега повторно е со нас и за неколку недели од сега ќе биде претседателка на Република Македонија, Гордана Силјановска Давкова, истакна потпретседателот на ВМРО-ДПМНЕ, Владо Мисајловски на денешниот митинг во Ѓорче Петров.
Тој исто така додаде дека на овие избори од една страна е Стево Пендаровски кој што ги менува ставовите во истиот ден во зависност како што ќе му кажат од Речица или Бихаќка, а од друга страна е професорката која се бори за правда и ја сака Македонија.
„Од една страна го имате Стево Пендаровски, човек којшто од сабајле кажува едно, а попладне кажува, можеби нешто друго, зависи што ќе му кажат од штабот тоа да каже. Знаете кој штаб или оној во Речица или на Бихаќка. Бира, зависи дали е вторник или среда. Но од другата страна имаме жена што ќе се бори за правдата, жена што ја сака Македонија и жена што секогаш ќе биде со народот“, потенцираше Мисајловски.
Тој упати и порака до, како што рече, идната претседателка на Република Македонија, Гордана Силјановска Давкова никогаш да не ги заборава луѓето кои даваат поддршка за посветла иднина.
„Јас сакам да упатам и до професорката еден апел. Професорке никогаш не ги заборавајте овие луѓе. Никогаш не ги заборавајте бидејќи доаѓаат за вас, доаѓаат за ВМРО-ДПМНЕ, доаѓаат за посветла иднина. И секогаш кога ќе бидете во кабинетот, запамтете, да одѕвонува како ѕвоно дека овие луѓе дошле за вас и ќе останат секогаш со Вас и покрај Вас“, истакна Мисајловски и додаде:
„Денеска сакам да завршам со една убава теза и еден убав момент. Сите заедно да се сплотиме и да направиме историја во Ѓорче Петров. Има многу хиени коишто пробуваат да го каснат лавот, но знаете, лавот секогаш победува на крај. Да се сплотиме и да направиме заедничка историја и да си ја вратиме Република Македонија за да биде горда, за да биде единствена, за да биде сплотена и да почне времето на промени“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Подрачјето на Велес ќе биде зафатено од поројни врнежи, грмежи и засилен ветер
ЦУК информира, според известувањето на УХМР, дека подрачјето на Велес ќе биде зафатено од пообилни поројни врнежи со грмежи и засилен ветер.
Правец на движење на оваа нестабилна маса се предвидув дека е кон исток и североисток, додаваат од ЦУК.
Македонија
Министерството за животна средина отстапи движни ствари на повеќе општини, за потребите на училиштата вклучени во ГЛОБЕ програмата
Владата, на предлог на Министерството за животна средина и просторно планирање, донесе одлука со којашто движни ствари во сопственост на министертството, се даваат на трајно на повеќе општини во државата, за потребите на повеќе основни училишта и тоа во Гевгелија, Неготино, Валандово, Битола, Прилеп, Тетово, Куманово, Пробиштип, Ранковце, Велес, како и на училишта во скопските општини: Центар и Карпош.
Целта е спроведување на ГЛОБЕ програмата во Република Северна Македонија, а Министерството за животна средина и просторно планирање, како што е посочено, е носител на активностите на ГЛОБЕ програмата и со владина одлука е задолжено да обезбеди хемикалии и инструменти за вршење на мерењата и да ги пренесе на користење на вклучените училишта во програмата.
Станува збор за движни ствари што ќе им бидат од полза на училиштата во спроведувањето на проектот, а коишто, по пат на јавна набавка ги обезбедило ресорното министерство.
Македонија
Одлука за учество на Армијата во НАТО операцијата „КФОР“ во Косово
Владата, на предлог на Министерството за одбрана, донесе Одлука за определување на бројот на кандидати кои се запишуваат на Воената академија „Генерал Михаило Апостолски“- Скопје, во студиската учебна 2024/2025 година, чие образование се финансира од Буџетот на Република Северна Македонија.
Со одлуката е определено, во студиската учебна 2024/2025 година да се запишат 44-ца студенти/питомци како редовни студенти, од кои 25-мина студенти/питомци за потребите на Министерството за одбрана – Армијата на Република Северна Македонија; како и тројца студенти/питомци за потребите на Војската на Црна Гора; шестмина студенти/питомци за потребите на вооружените сили на Босна и Херцеговина; петмина студенти за потребите на управување со кризи и петмина студенти за потребите на заштита и спасување.
Согласно Законот за Воената академија, како што е образложено од ресорното министерство, на Академијата можат да студираат и припадници на вооружените сили на странски држави и странски државјани.
Владата, на предлог на Министерството за одбрана, донесе и Одлука за испраќање припадници на Армијата на Република Северна Македонија за учество во НАТО операцијата „КФОР“ во Република Косово.