Македонија
Мисајловски: Ќе бидеме насекаде низ Македонија за да покажеме дека СДСМ ништо не работи
Потпретседателот на ВМРО-ДПМНЕ, Владо Мисајловски денеска се обрати и од Штип, од каде порача дека опозициската партија ќе биде насекаде низ Македонија за да го продолжи серијалот и да им покаже на граѓаните дека СДСМ ништо не работи. Претходно, тој беше во посета на Свети Николе.
„Почнуваме еден серијал каде што сакаме да им покажеме на граѓаните дека се она што го вети СДСМ излажа. Денеска имавме можност да бидеме во Свети Николе, а сега дојдовме тука и во Штип да ги слушнеме граѓаните, да ги слушнеме нивните проблеми, но и да слушнеме што се она ветено, а не е остварено. Тука во Штип исто така може да видиме дека иако се фалат со многу проекти нема ништо. Капиталните инвестиции во Република Македонија се на едно минимално ниво“, оцени Мисајловски.
Тој додаде дека додека ВМРО-ДПМНЕ биле на власт оставиле голем проект, говорејќи за автопатот од Скопје до Штип, но актуелната власт не се заложила околу проектот.
„Иако беше ветувано дека ќе биде завршен на почетокот на оваа година, па потоа и до средината на оваа година, но веќе на крајот на оваа година може да видиме дека се уште не е пуштен. Тие се навикнати да играат чочеци, но изгледа оваа година нема да има ништо. Очекуваме дека следната година ќе го пуштат во употреба модерниот автопат од Скопје до Штип. Бидејќи тој проект е за Скопје, односно за Штип. Овој проект е еден од најважните и најдобрите на ВМРО-ДПМНЕ“, рече Мисајловски.
Додаде дека ВМРО-ДПМНЕ го започнале и проектот експресен пат од Штип, Радовиш до Кочани, но сега слабо се работи или ништо не се работи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Бесплатни уролошки прегледи денес во амбулантата на Специјализираната болница за геријатриска и палијативна медицина
По повод Месецот на машкото здравје – Мовембер, во амбулантата на Специјализираната болница за геријатриска и палијативна медицина „13 Ноември” – Скопје денеска со почеток во 10 часот ќе се вршат бесплатни уролошки прегледи, како и ехо прегледи на бубрези и простата.
Целта е подигнување на свесноста за значењето на навремената грижа за машкото здравје. Ова е одлична можност за навремена проверка, превенција и грижа за здравјето, информира болницата „13 Ноември” – Скопје.
Уролошки прегледи ќе врши Дарко Марковски, уролог од ГОБ „8-ми Септември“, а ехо на бубрези и простата докторките Марика Филипова и Марија Сековска – специјалисти интернисти во Специјализирана болница за геријатриска и палијативна медицина „13 Ноември“ .
Македонија
Поради сообраќајка се пренасочува сообраќајот на магистралниот пат Куманово-Крива Паланка
Сообраќајот на магистралниот пат Куманово-Крива Паланка од 9:15 часот се одвива со наизменично пропуштање на возилата, информира АМСМ.
Петходно од АМСМ соопштија дека поради случена сообраќајна незгода од 8:30 часот во целосен прекин е сообраќајот на магистралниот пат Куманово-Крива Паланка.
Македонија
Студено утро, во Маврово снег и температури под нулата
Најмногу дожд 40 литри на квадратен метар во изминатите 24 часа наврна во Демир Капија, по што следат Радовиш и Пожар со 37, Гевгелија со 35 и Штип со 28. Деветнаесет литри на квадратен метар наврнаа во Струмица, 16 во Виница, 15 во Куманово, 13 во Кавадарци и Крива Паланка, 12 во Попова Шапка, 11 во Претор, 10 во Маврови Анови и Скопје-Петровец, 8 во Берово, 7 во Лазарополе, 6 во Велес, 5 во Пожаране, 4 во Битола, Тетово, Крушево и Прилеп и по еден во Скопје – Зајчев Рид и Тополчани.
Утринава најстудено беше во Маврови Анови, Лазарополе и Пожар каде е измерена температура од -1 степен Целзиусов, во Пожаране и Крушево, 1 во Крива Паланка, 2 во Претор, Охрид, Тополчани, Куманово и Виница, 3 во Тетово, Штип, Прилеп, Берово и Скопје – Зајчев Рид, 4 во Битола, Велес, Кавадарци, Струмица, Демир Капија и Скопје-Петровец, а најтопло беше во Гевгелија каде се измерени 5 степени Целзиусови.
Времето денеска ќе биде променливо облачно со сончеви периоди. На планините и на повисоките места ќе провејува слаб снег. Ќе дува слаб до умерен ветер од северозападен правец. Максималната температура ќе биде во интервал од 5 до 11 степени Целзиусови.
И во Скопје ќе биде променливо облачно со сончеви периоди. Ќе дува умерен северен ветер. Максималната температура ќе достигне до 8 степени Цезлиусови.

