Македонија
Мисовски: Илинден е концептот кој обединува и гарантира заедничка и просперитетна иднина

Илинден е концептот кој обединува и гарантира заедничка и просперитетна иднина, изјави потпретседателот на Собранието, Горан Мисовски, кој ја претставуваше собраниската делегација на Мечкин камен во Крушево. Тој од негово име и од името на претседателот на Собранието, Талат Џафери, кој поради здравствени причини не беше во можност да се обрати денес, го честиташе Денот на Републиката. Рече дека денешното одбележување е невообичаено споредено со сите претходни прослави, поради состојбата со ковид-19, меѓутоа неопходно е почитувањето на препораките на Министерството за здравство и мерките преземени од Владата.
„Ќе го надминеме и ова, ќе ја победиме и пандемијата, со сите нејзини негативни последици. Ќе излеземе посилни, обединети и секако помудри и побогати за едно искуство, за една вредност која се чини секогаш ја запоставуваме, а тоа е здравјето и моралните вредности како што се солидарноста, хуманоста и пожртвуваноста, особено на нашите почитувани здравствени работници. Оттука, изразувам почит и благодарност за исклучителната професионалност, посветеност и несебичност што здравствените работници ја покажаа сиот овој изминат период“, изјави Мисовски.
Во обраќањето, Мисовски се осврна на ратификувањето на протоколот за членството во НАТО коментирајќи дека да се биде под чадорот на НАТО значи колективна безбедност, еден за сите – сите за еден, како семејство и заштитник.
„Нас животот не научил, ние секогаш сме биле мултиетничка, мултиконфесионална средина, во која секој си го наоѓал своето сино небо, своето топло сонце, својот душевен мир и парче леб за своето семејство и споделувал и добро и лошо со соседот, со блискиот и подалечниот. Дури повеќе во лоши мигови, затоа што, тагата долго време опстојувала на нашето поднебје. Се чини дека искористувањето на различностите беше инстантна и многу вирулентна почва за лесно подгревање на непријателствата и конфликтите. Меѓутоа, бевме мудри, се издигнавме над тие анахрони сфаќања и извлековме поука: цело е кога има сѐ! Цело е кога се сите среќни, задоволни, рамноправни граѓани, кога секој е правно заштитен и ги ужива истите права и слободи, подеднакво е конкурентен на пазарот на трудот, подеднакво е вреднуван за својот труд и придонес. Затоа што, ова е прекрасна и широкограда земја, во неа има место за секој добронамерник, за секој што ги надминал тесноградите и себични интереси и што ја гледа големата, заедничка слика во која постои взаемна почит и разбирање за поединостите кои не разликуваат, а кои всушност произведуваат најубав мозаик на човештвото“, истакна Мисовски.
Тој е уверен дека сите во земјата веруваат во европската перспектива на нашата земја и тежнееме кон тоа да ја исполниме и втората стратешка цел од независноста на државата, а тоа е да станеме дел од големото европско семејство. Во овој контекст, вели Мисовски, потребни ни се функционални и одговорни институции кои ќе можат да испорачаат видливи и ефективни резултати кои ќе бидат во линија со преговарачката рамка од Европската комисија, за да можеме да ги отвораме поглавјата за членство во Европската унија.
„Имајќи предвид дека неодамна имавме предвремени парламентарни избори и во очекување сме на одржувањето на конститутивната седница на Собранието, апелирам до сите политички чинители, без оглед дали се власт или опозиција, сите кои сме добиле одговорност да ја водиме државата доверена од граѓаните, со визија и мудрост да ја оправдаме нивната доверба и да ги исполниме ветувањата и заложбите дадени пред нив. Граѓаните со право очекуваат брз напредок и развој, безбедност и сигурност кои ќе овозможат својата иднина да ја гледаат и да ја градат дома, во нивните родни места, во нашата заедничка татковина“, додаде Мисовски во своето обраќање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Родителите на загинатите деца во „Пулс“ прашуваат до каде е постапката за полициските службеници за пожарот

Родителите на загинатите деца во пожарот во кочанската дискотека „Пулс“ на денешниот 16. Марш на ангелите пред зградата на Полициската станица во Кочани побараа одговор од ОЈО ГОК, кое ја води постапка за над 20 те полициски службеници од ОВР Кочани и СВР-Штип, до каде е истрагата за нив и формирање на обвинителен предлог.
-Сакаме да ги прашаме до каде е постапката на ОЈО ГОК или чекат одмори, да си одведат нивните деца на одмор, на вода, а ние на нашите деца врз гробовите да им фрламе вода за да ги освежеме. Блазе си им, нека им служи на чест, оти развлекуваат само, вели мајка на загинато момче.
На денешниот Марш на ангелите главната порака им беше „Слушнето го гласот на оние што повеќе не можат да зборуваат“. Родителите и семејствата на загинатите деца што учествуваа на протестниот марш се револтирани што нивниот настан денеска имаше убедливо најслаб одѕив. Револтирано им се „заблагодарија“ на поддршката на граѓаните и семејствата кои имаат настрадано деца, а денеска не учествуваа на маршот кој почна во 18.05 часот од Паркот на револуцијата, а заврши пред зградата на Судот и Обвинителството во Кочани.
Една од мајките пред зградата на Општина Кочани истакна дека на денешен ден се случи катастрофалниот земјотрес во Скопје, кој однесе голем број на човечки животи и направи материјални штета. Посочи дека на денешниот Марш на ангелите им одаваат почит на загинатите во земјотресот во Скопје во 1963 година, но истовреме се сеќаваат и на оние кои помогнале да се обнови градот Скопје.
Македонија
МВР во Охрид покажа вежба на спасување на вода и евакуација на патници од опожарен пловен објект

Со показна вежба на спасување на вода и евакуација на патници од опожарен пловен објект, како и со презентација на дел од опремата, возилата и другите материјално технички средства што ги користат полициските службеници при извршувањето на секојдневните задачи, попладнево во Охрид беше реализирана активноста на МВР насловена „До Вас, за Вас“.
Активноста е осмислена со цел приближување на полицијата до граѓаните, во рамки на концептот „Комјунити полисинг- Работа во заедницата“, подигнување на јавната свест за зголемена јавната безбедност во заедницата, спроведување едукативни и интерактивни активности со граѓаните поврзани со превенција и сузбивање на разните форми на криминал…
Министерот за внатрешни работи, Панче Тошковски, кој ги следеше активностите истакна дека со полициските службеници од повеќе оддели во рамки на МВР се презентираат активностите што ги преземаат, средствата што ги користи службата, начинот на спроведување на полициските активности и сите дејствија што се преземаат во рамки на редовното полициско работење.
– Еден од поводите за посетата на Охрид денеска е и заедничката соработка што ја имаме со српските полициски службеници во Охрид. Имаме четворица колеги од Србија кои во летниот период се заедно со нашите полицајци патролираат, си помагаат во рамки на сите дејствија што треба да бидат преземени, а се во делот на српските туристи. Ова е една убава прилика да поразговараме со нив за тоа како ги обавуваат нивните службени задачи тука, рече Тошковски.
Тој уште додаде дека македонската полиција е тука за граѓаните, да им обезбеди мирен престој во туристичките центри.
– Безбедносната сеостојба во Охрид е стабилна, а туристите можат да уживаат во преубавите туристички центри…Во рамки на летната сезона СВР – Охрид е потпомогната со полициски службеници од други центри. Така што и оваа година ќе бидеме подготвени да ги преземени сите дејствија и да одговориме на сите предизвици, рече тој.
Македонија
Шукова и Мојсова на пазарот во Тафталиџе: Ги слушнавме од прва рака проблемите на пазарџиите

Кандидатката за градоначалничка на Скопје од СДСМ, Каја Шукова, денес го посети пазарот во Тафталиџе заедно со Маја Мојосова, кандидатка за градоначалничка на општина Карпош.
„Денес бевме на пазарот во Тафталиџе заедно со Маја Мојосова, нашата кандидатка за Карпош. Ги слушнавме од прва рака проблемите на пазарџиите,“ изјави Шукова.
Таа посочи дека условите за работа се лоши, особено при екстремно високи температури.
„На вакви пеколни температури тешко се седи цел ден на тезга, немаат услови, но мораат да бидат таму. Работат напорно, чесно, и заслужуваат подобри услови за работа.“
Клучното барање кое било истакнато од страна на продавачите е јасно:
„Најчестото барање што го слушнавме беше едноставно – затворен пазар со нормални услови за работа.“
Во таа насока, Шукова истакна дека решението е веќе дел од нејзината програма.
„Во мојата програма имам конкретни проекти за затворање и модернизација на градските пазари. Пазарите ќе бидат живи, безбедни и функционални простори и за продавачите и за купувачите.“ – изјави Шукова.