Македонија
Митева: Изјавата од стратешките партнери е потврда дека корупцијата е во секоја пора на државата

САД издвоија речиси 500 милиони долари за добро владеење и владеење на правото, а гледаме епидемија на корупција во Македонија – ова е изјавата на стратешките партнери, која е потврда дека корупцијата е во секоја пора на општеството, во секој сектор. Парите се потрошени, а виновните и одговорните за тоа се на слобода, изјави на прес-конференција портпаролката на ВМРО-ДПМНЕ, Марија Митева.
„СДС и ДУИ се 7 години на власт. Оливер Спасовски е речиси 9 години министер за внатрешни работи, а Македонија од година на година сè повеќе заглавена во криминал и корупција. Довербата во судството е само 2 %, пониска не била никогаш.
Криминалот и корупцијата со СДС и ДУИ станаа начин на функционирање, кој може да се искорени, само со нивно искоренување од власт.
Оваа власт на СДС и ДУИ е прва во криминалот, тие се суштината на сите проблеми. Високото ниво на криминал и корупцијата го има во врвот на власта, но го има и кај сите други сегменти во општеството. Практично, не постои сектор во државата во кој нема корупција, дали е тоа здравство, дали е тоа образованието, дали е тоа судство, обвинителство или други сектори, секаде е присутна корупцијата.
Македонија е блокирана затоа што, наместо правда, владее криминалот, затоа што Обвинителството го штити и развива криминалот наместо да биде прв во борбата за спречување. Најголемиот феномен е што токму власта на СДС и ДУИ, која се прогласува за проевропска, си дозволи да не се покрене ниту една истрага за лавината корупциски активности. Институциите молчат, не постапуваат и не реагираат никако, само за да бидат во одбрана и служба на власта.
Но, решението е едно – директно справување со криминалот и корупцијата. Мора да се воспостави функционален систем на владеење на правото и да се воспостави функционална правна држава. Само така Македонија ќе биде вистински реформирана и напредна.
Прашање: Дали ќе има реакција за изјавата на Ковачевски што ја даде од Брисел, виновни сте дека ќе нема втора меѓувладина токму вие и друга политичка партија – Левицата?
Одговор: Токму пресот за криминал и корупција е доволен показател кој е единствениот виновни и ваквите обвинувања што доаѓаат се само причина да се прикрие поразот што го има Македонија, а за тоа директно виновни се СДС и ДУИ“, рече Митева.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Герасимовски: „Центарска симфонија” ги сплоти скопјани, Тарабунов и граѓаните пееја и танцуваа на најпознатите филмски евергрини

„Центарска симфонија” синоќа ги сплоти скопјани. Со македонска и светска филмска музика изведена од музичката ѕвезда Александар Тарабунов и камерниот оркестар, граѓаните уживаа во оваа културна манифестација којашто за првпат ја организираше Општина Центар.
Градоначалникот Горан Герасимовски упатува благодарност до сите центарци, но и жители на Градот Скопје кои вчера вечер дојдоа и уживаа во најпознатите мелодии од македонската и светската кинематографија како „Исправи се Делфина”, „Каде песно моја”, „До Балчак”, „Beautiful Maria of my Soul” и многу други. На „Центарска симфонија”, беше изведена и новата песна на Тарабунов „Заедно” со камерниот оркестар.
„Центар останува место за најубавите културни настани. Среќен сум што синоќа ‘Центарска симфонија’ ги сплоти скопјани на Плочникот кај Градски ѕид. Сите во еден глас ги пееа најубавите филмски мелодии, уживаа во добра музика и се забавуваа. Оваа манифестација е новина и останува традиција. Не застануваме тука, летово ќе имаме уште многу настани во делот на културата и за истите ќе бидете навремено информирани. Ви благодарам на сите коишто дојдовте и заеднички уживавме”, рече Герасимовски.
Македонија
Охридската полиција спаси четири лица заглавени во езерото откако силниот ветер им скрши дел од едрилицата

Четири лица беа спасени синоќа од водите на Охридското Езеро откако нивната едрилица останала без управување поради механичко оштетување. Брзата реакција на полициските службеници од Полициската станица за граничен надзор „Охридско езеро“ спречи трагедија.
Како што информира Министерството за внатрешни работи, на 28 јуни 2025 година, во 19:30 часот, било пријавено дека од пловен објект, кој се наоѓал на околу 2,5 километри од езерскиот брег спроти авто-кампот „Извиднички“, е упатен повик за помош.
„Наши полициски службеници веднаш излегоа на терен со службен глисер и ги лоцираа четирите лица на едрилица кои се наоѓаа во неволја. Сите четворица се успешно и безбедно извлечени и пренесени до станицата кај каналот Студенчишта“, соопштија од МВР.
Од полицијата појаснуваат дека поради силен ветар и бранови дошло до кршење на крмениот лист на едрилицата, по што лицето кое управувало со пловилото ја изгубило контролата.
„Благодарение на навремената интервенција, случајот заврши без повредени. Безбедно е извлечена и едрилицата“, додаваат од полицијата.
МВР уште еднаш апелира до сите граѓани и туристи да внимаваат при користење на пловни објекти и да ги следат временските услови, особено кога се работи за едрилици и објекти без моторен погон.
Македонија
ДУИ со остра реакција до Мицкоски: Сака да ни го избрише идентитетот со електронски попис

Демократската унија за интеграција (ДУИ) денеска жестоко реагираше на најавите од премиерот Христијан Мицкоски и Владата за спроведување на електронски попис во 2026 година, обвинувајќи дека станува збор за националистичка агенда со цел исклучување на Албанците од институциите и системот.
Во реакцијата, ДУИ потсетува дека уште во 2022 година, Мицкоски јавно ги оспори резултатите од пописот на населението, каде беше утврдено дека Албанците сочинуваат 29,5% од вкупната популација.
„Тој тогаш вети дека штом ќе дојде на власт ќе организира електронски попис за да ги ‘коригира’ резултатите. Тоа не беше техничка изјава, туку политичка порака – дел од серија ветувања со слоганот ‘да им се покаже местото на Албанците’“, стои во реакцијата на партијата.
ДУИ обвинува дека новата власт го спроведува овој план преку институциите кои ги има ставено под своја контрола.
„Уставниот суд, Јавното обвинителство и други тела активно работат во служба на оваа агенда – укинување на Балансерот, уривање на механизмите за заштита од мајоризација, исклучување на албанскиот јазик, систематско маргинализирање на Албанците во администрацијата, безбедносните служби и армијата“, наведуваат од партијата.
ДУИ не ја штеди ниту коалицијата Вреди, која според нив, со својата тишина и поддршка, ја легитимира политиката на ВМРО-ДПМНЕ.
„Уценети и заробени, тие создаваат лажна слика за мултиетничност на владата. Албанците не се наивни и никогаш нема да прифатат да бидат предмет на ‘дигитален инженеринг’, дури и ако во тој процес учествуваат Албанци од Вреди“, велат од ДУИ.
На крајот, од партијата испратија порака до граѓаните:
„Овие обиди нема да поминат. Ќе се спротивставиме со сите демократски средства, а Албанците ќе знаат да го заштитат својот глас, своето место и своето достоинство во оваа држава“.