Македонија
Најдобрата студентка на Факултетот за безбедност, Ивана Мукоска, ќе биде дел од МВР, посочи Спасовски
Министерот за внатрешни работи, Оливер Спасовски, се обрати пред новата генерација дипломци и магистранди на Факултетот за безбедност во Скопје при Универзитетот „Свети Климент Охридски“ во Битола.
Истакнувајќи дека образовниот процес без сомнение е најважниот стадиум во академското профилирање на младите, Спасовски рече дека секогаш кога има можност да се сретне со млади луѓе им вели да бидат непобитни.
„Бидете љубопитни, бидете поактивни и секогаш да тежнеете кон подобрување бидејќи интегритетот е суштински за професијата што сте ја избрале или ќе ја изберете. Полициската работа подразбира стручност во спроведување на законите, кои значат заштита на човековите права, а ние како институции сме подготвени да ви ја дадеме нужната поддршка за вашето интегрирање во општеството, во безбедносната заедница на државата. Како министер за внатрешни работ особено се гордеам што можам тука пред вас слободно да кажам дека создадовме институција во која претставува чест да се работи. И морам да кажам дека воопшто не беше прашање дали треба да се реформира МВР, туку мораше да се направи тоа, да се воведат европските вредности во институцијата за самото општество да почне да функционира по европски терк“, истакна министерот Спасовски.
Притоа тој се осврна на фактичката состојба во поглед на стратешката трансформација на МВР за активностите што се преземени во насока на обезбедување високи стандарди на полициско работење и секако висок социјален статус на вработените.
„Со набавени опрема и униформи, кои и до 15 години не биле претходно набавени, со 80 реконструирани полициски објекти, со градба на ИКТ Центар во Прилеп, со кој се промени информатичката инфраструктура на МВР, со изградба на најсовремената форензичка лабораторија на овие простори, со воспоставен систем на итен хеликоптерски транспорт со медицинска опрема и опрема за гаснење пожари во Одделот за воздухопловни единици. И, секако, со 35 % зголемени плати и исплатени сите бонус плати по преземањето на раководењето со Министерството. Ова е само мал сегмент од сработеното, кое го постигнавме со идентичен буџет како тој од претходните раководства на МВР. Тоа е така затоа што работиме по принципи – на стручност, одговорност, правичност, дисциплина и, пред сè, подготвеност и волја за промена“, истакна Спасовски. Притоа тој ја истакна отвореноста на МВР за континуирана соработка со Факултетот за безбедност.
„Така, драги дипломци, ова се и принципите што во изминатите години сте ги акумулирале како знаење, кое сега треба да го преточите во практична операционализација. И уште еднаш сакам да потенцирам дека ние како институција секогаш сме биле отворени за целосна и континурирана соработка со вашиот Факултет, пред сè, во име на заедничката цел што ја споделуваме – гарантирање на севкупната безбедност на граѓаните и државата“, рече министерот Спасовски упатувајќи честитки до дипломците и магистрандите за трудот и успехот посакувајќи им успеси на личен и професионален план.
Пред традиционалното фрлање на дипломските капи министерот Спасовски пред аудиториумот рече дека денеска има донесено одлука, прогласената најдобра студентка на Факултетот, Ивана Мукоска, да биде дел од МВР, во Одделот за Европската Унија и меѓународната соработка, за што постапката почнува веднаш.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.