„Предлог буџетот за 2025-та година е буџет кој е домаќински и внимателно изработен, со силен фокус кон подобрување на економската состојба во државата. Овој предлог-буџет се темели на дисциплина, мерење на резултати, проверки, ефикасност, ефективност, стратешко планирање“ , истакна пратеничката од ВМРО-ДПМНЕ Бисера Златеска во своето излагање на денешната расправа за предлог-буџетот за 2025 година.

Златеска додаде дека нефункционалниот систем кој го оставила претходната влада е веќе минато и дека довербата којашто ја имаат од граѓаните нема да ја изневерат. Односно, искрено и чесно ќе следуваат позитивни промени во корист токму на граѓаните.

„Пропаднато здравство, нефункционални институции, лудо растечки цени на производи, безредие, непотизам, лаги, корупција, бркање на младите што подалеку од тука. Ова е мракот што не снајде. Мрак од кој ќе излеземе благодарение на искрена и чесна работа, и сето тоа поради нашата должност и обврска кон македонскиот народ кој својата доверба ја стави во наши раце. И преку нас, неговите избраници, токму тука се бори за подобар живот“, децидна е Златеска.

Напомена дека токму буџетот ќе ја има главната улога во исполнување на барањата на граѓаните. Дополнително, напомена дека ВМРО-ДПМНЕ нема да дозволи донесување на погрешни политики затоа што граѓаните најмалку не го заслужуваат истото.

„Во креирањето на сето ова, главна улога има буџетот на државата. Во состојбата во која се наоѓа, на нашата држава и треба помош, а ние сме тука да и ја пружиме. Ние не смееме да се расфрламе со погрешни зборови, ниту со погрешни дела, затоа што на Македонија и на македонскиот народ му е преку глава од грешки и лаги“, заклучи Златеска.

Денес во седиштето на Европскиот парламент во Брисел, претседателот на Собранието на Република Северна Македонија, Африм Гаши, се сретна со претседателката на Европскиот парламент, Роберта Мецола. На оваа функција Мецола беше реизбрана со големо мнозинство на гласови по конституирањето на новиот состав на Европскиот парламент во јуни оваа година.

Гаши се заблагодари за силната поддршка на европската перспектива на нашата земја која во континуитет ја дава Европскиот парламент и особено претседателката Мецола и изрази очекување таа да продолжи сѐ до полноправното членство на земјата во ЕУ.

Двајцата соговорници се согласија дека граѓаните на Република Северна Македонија очекуваат големи поместувања бидејќи беа направени навистина отстапки од наша страна кои доведоа до членство во НАТО, но не и до започнување на Меѓувладина конференција со ЕУ.

Претседателката Мецола најави посета на регионот на Западен Балкан за почетокот на следната година и се заложи и за конкретни активности на економски план, на градење на инфраструктурата, укинувањето на роамингот, но и поконкретни исчекори за РС Македонија преку Програмата за демократска поддршка, насочена првенствено за парламентот. Главни столбови на оваа Програма ќе бидат законодавството и транспарентноста, кои би се одвивале преку студиски посети и тренинзи за медијација, за што претседателот Гаши ја изрази својата поддршка и подготвеност да создаде потребни предуслови за нејзина реализација.

Двајцата претседатели се согласија за големиот бенефит на земјата и граѓаните за јасната визија која ЕУ ја има во процесот на евроинтергацијата, но и за јасните пораки кои треба ЕУ да ги испорача и застане зад нив, а земјата да го задржи фокусот кон евроинтегративниот пат со сочувано достоинство и задоволни граѓани, независно од нивното етничко потекло.

„Деновиве пред нас е еден од најважните документи, сериозен документ за којшто се разговара во Собрание. Документ којшто најдиректно, најсилно влијае врз животот на сите граѓани. Предлог буџетот за 2025 година којшто наполно е различен од сите досегашни буџети на претходната влада“ , истакна пратеникот на ВМРО-ДПМНЕ Пеце Милевски на денешната собраниска Комисија за финансирање и буџет.

Милевски посочи дека кај овој предлог буџет фокусот е насочен токму кон најсуштинските потреби на граѓаните и покрај уништената економија која ја затекнале како и отсуство на стратешко планирање.

„Јас сум задоволен што овој предлог буџет најпрво ги интегрира најсуштинските потреби на граѓаните, притоа соочен со седум годишен период на комплетно урнисана економија, изместени фискални политики, отсуство на развоен концепт, отсуство на стратешко планирање.
Резултатот од тоа го видовме сите, го почувствувавме на сопствен грб, го почувствуваа тоа сите граѓани на Македонија“ дополни Милевски.

Милевски додаде дека предлог-буџетот за 2025 година претставува концепт кој ќе донесе суштински промени во водењето на јавните финансии, а граѓаните ќе го почувствуваат економскиот развој и напомена дека отстапување нема да има.

„Овој предлог-буџет за 2025 година претставува како концепт суштинска промена во водењето на јавните финансии од досегашната седумгодишна практика.
Владата предводена од ВМРО-ДПМНЕ и Коалицијата вети пред граѓаните економски развој и подобри услови за живот и од тоа секојдневно потврдува дека нема отстапување.
Оттаму, концептот на овој предлог – буџет се темели првенствено на: фискална консолидација, на инвестиции и остварување забрзан економски раст“, заклучи Милевски.