Македонија
Мицкоски: Ветија и излажаа дека просечната плата ќе биде 500 евра

Претседателот на ВМРО-ДПМНЕ, Христијан Мицкоски денеска оствари средба со членовите и симпатизерите на Општинскиот комитет на ВМРО-ДПМНЕ – Тетово. Тој пред присутните истакна дека оваа ненародна влада на чело со Заев мора да замине час поскоро, а како причина за тоа ги наведе сите предизборни лаги и празни ветувања.
Мицкоски посочи дека капиталните инцестиции се на катастрофално ниско ниво. „Денес излегоа податоците за капиталните инвестиции. За 4 месеци владата има два ипол пати помалку капитални инвестиции од она што го сторила претходната влада истиот тој период лани. Значи го полнат буџетот со парите на граѓаните, но не го трошат за капитални инвестиции што ќе значи раст на стопанството, туку за други непродуктивни трошења. А како го полнат? Собрале 23 милиони евра повеќе врз основа на акциза, а таа е акциза е онаа што ја покачија на почетокот на годината. Значи директно од џебот на граѓаните преку поскапување на горивото, одат во буџетот, кој гледаме како непродуктивно го трошат. Тоа е истата акциза за која ВМРО-ДПМНЕ бараше да се укине, а власта го одби предлогот“, истакна Мицкоски.
Тој додаде дека данокот на добивка се полни со инвестиции направени од претходната влада. „Втората ставка по која што исто така ќе се пофалат е дека собрале повеќе средства во основ на данок на добивка, ама забораваат да кажат дека тие 25 милиони повеќе што ги собрале споредбено со минатата година се токму оние средства кои што „Џонсон Мети“ ги уплати во буџетот како данок на добивка. Откако некој претходно успеа да го убеди Џонсон Мети да дојде во Македонија, да инвестира, да вработува и да стопанисува десет години и откако му заврши повластениот период да не плаќа данок на добивка, ова е првата година кога Џонсон Мети плати данок на добивка. И тие средства сега се уплатени во Буџетот“, рече Мицкоски.
Тој додаде дека „оваа криминална власт не само што не работи, туку и прави штета на граѓаните’.
„Картелот на власт не само што ја носи државата кон економски пропаст и банкрот, туку нема реализирано ниту еден проект, ниту пак има најава за започнување на некој проект. Ние ја викаме Влада за еднократна употреба или Влада само за едно прашање, тоа е суштината. Ќе речат на крајот од нашиот мандат просечната плата ќе биде 500 евра. Ама забораваат да кажат дека издале документ кој се вика фискална стратегија каде што предвидуваат во 2018 година просечната номинална плата ќе расте за 4%, а во 2019 и 2020 ќе растат 4,4% соодветниот период. Или ако ја видиме просечната плата во 2017 која што изнесува 23.850 денари, со овие покачувања кои што економијата ќе ги генерира на крајот од 2020 година, под услов да немаме предвремени парламентарни избори, просечната плата ќе биде околу 27 илјади денари. Повторно кажаа и повторно излажаа, а ветуваа 500 евра плата. Имаме влада која што лаже“, истакна Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.