Македонија
Мицкоски во Валандово: Нема човек кој денес вели дека живее подобро

Претседателот на ВМРО-ДПМНЕ, Христијан Мицкоски, денеска оствари средба со членовите и симпатизерите од Општинскиот комитет на ВМРО-ДПМНЕ Валандово.
Тој најпрвин истакна дека секој еден граѓанин е добредојден да се придружи кон програмата на партијата што се подготвува, при што во неа ќе бидат вметнати сите потреби на граѓаните бидејќи, како што рече тој, граѓаните го заслужуваат најдоброто.
„Граѓаните знаат дека ВМРО-ДПМНЕ е секогаш на нивна страна. Граѓаните знаат дека ВМРО-ДПМНЕ работи во нивен интерес и се грижи за нивните потреби. Граѓаните знаат дека ние сме единствената опција во моментот во Република Македонија која може да понуди чесна, искрена и принципиелна политика“, изјави Мицкоски.
За моментната ситуација што се случува на економски план Мицкоски потенцира дека е катастрофална и загрижувачка за сите граѓаните. Мицкоски додаде дека од секојдневната комуникација со граѓаните, од каде што добива информации, досега никој не му кажал дека сега се живее подобро и поквалитетно.
„СДСМ вели дека дошол живот за сите, но реалноста е многу подруга. Имав средба со младите, ми соопштуваат – претседателе, чекаме да завршиме факултет и да си одиме од оваа држава, немаме иднина во нашата Македонија, оваа власт не ни понуди никаква опција, нема ниту една мерка за нас младите. И ова мора да се спречи. Наш главен приоритет ќе бидат младите за кои ќе се залагаме да се создадат услови да не ја напуштат Македонија бидејќи тие се иднината на оваа држава“, кажа Мицкоски.
Тој рече дека очигледно од канцелариите на Владата изгледа розова сликата за животот надвор, но помеѓу работливиот народ на Македонија реалноста е сосема поинаква.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево со мала локална облачност, максималната температура до 21 степен

Сончево со мала до умерена локална облачност. Ќе дува слаб до умерен, наместа долж Повардарието повремено засилен ветер од северен правец. Минималната температура ќе биде во интервал од 4 до 10, а максималната ќе достигне од 14 до 21 степен.
Во Скопје, сончево со мала до умерена облачност. Ќе дува слаб до умерен, во делови од котлината повремено засилен ветер од северен правец. Минималната температура ќе се спушти до 8, а максималната ќе достигне до 20 степени.
Времето во наредните денови
До почетокот на следната седмица ќе преовладува стабилно, сончево и релативно топло време со локална појава на облачност во текот на денот. Ќе дува слаб до умерен, а во сабота долж Повардарието повремено засилен северен ветер.
Македонија
Делови од Гази Баба и Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
– во периодот од 08:30 до 13:30 часот, корисниците од улица Благоја, улица Маџари, Пекара КИС МИ Стефковски и улица Ордан Поп Јорданов (општина Гази Баба)
– во периодот од 09:00 до 10:00 часот, локалите во трговскиот центар до пазарот (општина Ѓорче Петров)
Македонија
Сиљановска-Давкова на средба со претставници на „Habitat for Humanity International“ и на „Хабитат Македонија“

Претседателката Гордана Сиљановска – Давкова денеска разговараше со претставници од САД на глобалната мрежа „Habitat for Humanity International“, како и со националниот директор на „Хабитат Македонија“, Зоран Костов и со претседателот на Управниот одбор, Драган Малиновски.
Таа, најпрво им ја честиташе дваесетгодишнината од основањето, посакувајќи им понатамошен успех во реализацијата на благородната идеја за градење свет во којшто секој ќе може да го оствари правото на пристојно живеење.
За неа, импресивна и инспиративна е нивната несебична заложба и неуморна работа насочена кон подигање на квалитетот на домувањето на сиромашните луѓе, неможна без волонтирање, застапување и подигање на јавната свест за поголема солидарност во развојот на заедницата.
„Ние, како и многу други држави мора да вложиме особен напор во унапредувањето на квалитетот на живеењето, секаде и за сите, ставајќи крај на супстандардните услови во некои средини, недостојни за живот“, смета претседателката.
„Претставниците на „Habitat for Humanity International“, со љубов и страст зборуваа за своите ангажмани во справувањето со енергетската сиромаштија и гарантирањето стандарди во нејзиното користење ширум светот, потенцирајќи дека се трогнати од добрината, благодарноста и активноста на македонските граѓани. Тие ја истакнаа незаменливата улога на невладините организации, како кредибилни партнери на овој план и укажаа на неопходноста од постојана и интензивна владино-невладина соработка во функција на остварување подобри резултати“, соопштија од Кабинетот на претседателката.
Македонските претставници ја презентираа својата досегашна работа, насочена кон овозможување инклузивен и одржлив развој на сиромашните средини, како ромските, но и други, со финансиска помош на ЕУ.
Тие ги посочија активните проекти во повеќе од 30 општини, како и пионерските партнерства со институциите за микрофинанисирање.
Соговорниците се согласија за нужноста од стратешки пристап кон домувањето за да се намали, па и спречи егзодусот на најквалификуваниот кадар, како неспорен и докажан промотор на иновации и главен носител на развојот во сите средини.