Македонија
Мицкоски: Да не влегуваме во замката да бидеме вовлечени во предизборната кампања и реторика кај нашиот источен сосед

Претседателот на Владата на Република Северна Македонија, Христијан Мицкоски одговарајќи на новинарско прашање во врска со ставот на Бугарија дека изјавите за францускиот предлог за репрограмирањето значат оддалечување на државата од евроинтеграциите, изјави дека во периодот коишто следи државата ќе се соочи со два крупни предизвика, првиот е обид на структури внатре во државата да создадат нестабилност, немир, а вториот е од страна на нашиот источен сосед кој ќе се обиде да нѐ внесе во предизборната реторика.
„Прво сакам да потенцирам дека во периодот коишто следи како Влада и како држава ќе се соочиме со два крупни предизвика. Првиот е обид на структури внатре во државата да создадат нестабилност, немир. Тоа е една коалиција на луѓе коишто се манипулирани, но има и луѓе кои точно знаат што прават со криминално стекнати пари и за да го заштитат сето тоа свесни за одговорноста којашто следи тие ќе се обидат на секаков начин да внесат немир, да ја дестабилизираат би рекол, состојбата во Македонија, затоа што се свесни дека оваа Влада има амбиција и тргна би рекол многу жестоко во исправање на грешките коишто тие ги направија во минатото.
Но, исто така влегуваме и во жестока борба против криминалците и корумпираните политичари и поединци. И тука ќе нема исклучоци. И тие се ќе сторат, криминално стекнатиот капитал да го заштитат, на тој начин што ќе внесат немир ќе се обидат да ја дестабилизираат состојбата во државата. Тоа е едниот предизвик“, изјави Премиерот и додаде:
„Вториот предизвик е од страна на нашиот источен сосед. Тие ќе се обидат да нѐ внесат во предизборната реторика. Знаете, после многу перипетии таму се закажани изборите, седмите по ред избори во последните три години, на 29 октомври чинам дека беа, и тамошните политичари ќе сторат сѐ за да нѐ внесат во нивната предизборна реторика и на тој начин да предизвикаат реакција од наша страна со која што ќе се обидат да нѐ портретираат кај нашите пријатели во меѓународната заедница дека ние сме тие палавите, дека ние сме тие лошите, дека тие се добрите и дека на тој начин практично ние создаваме кавга, немир итн“.
Премиерот Мицкоски упати апел до македонските граѓани, до политичарите, до оние коишто и мислат добро на татковината и на граѓаните да не наседнуваат на овие провокации и потенцираше дека имаме стратешка цел, дека треба да се испорача тоа што го очекуваат граѓаните.
„Јас апелирам до македонските граѓани, до политичарите, до оние коишто и мислат добро на татковината и на граѓаните да не наседнуваме на овие провокации. Тоа ќе се случува. Ние си имаме наша стратешка цел, знаеме по кој пат треба да чекориме, знаеме што треба да направиме, знаеме што очекуваат граѓаните од нас и треба да го испорачаме тоа што тие го очекуваат од нас и за тоа ќе треба да работиме секој ден жестоко напорно и посветено и најбитно чесно. Овој фолклор, оваа естрада коишто ќе се обидуваат, овие центри на моќ, внатре во земјата, но и овие надвор коишто ќе се обидат да не внесат во оваа предизборна реторика треба да ги гледаме одозгора, тие не го заслужуваат нашето внимание. Граѓаните сакаат подобро да живеат, а за да живеат подобро треба да спроведеме структурни реформи и она кое што е многу важно да работиме на владеењето на правото, односно борба, жестока борба со криминалците во политиката, но и поединците криминалци коишто за жал изминативе години ги има многу“, подвлече Мицкоски.
Тој упати апел да не влегуваме во замката на интересите на поедини криминални структури внатре во земјата и да не бидеме вовлечени во предизборната кампања кај нашиот источен сосед.
„Така што од овде од Загреб, мојата порака е ве молам да се стремиме кон тоа што е наш интерес, да не влегуваме во замката на интересите на поедини криминални структури внатре во земјата и да не влегуваме во замката да бидеме вовлечени во предизборната кампања и реторика кај нашиот источен сосед“, изјави премиерот Мицкоски
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
Пожарот кај хотелот „Њу Стар“ локализиран, ЦУК бара итни мерки за дивата депонија во Визбегово

Пожарот кој избувна во близина на хотелот „Њу Стар“ во скопската населба Визбегово е локализиран, но на терен и понатаму дежураат две екипи на Територијалната противпожарна единица на Град Скопје.
Како што информира Центарот за управување со кризи (ЦУК), во денешната интервенција биле ангажирани вкупно седум противпожарни возила и 20 пожарникари. Пожарот зафатил површина од околу 5000 квадратни метри, при што биле опожарени жито, еден магацин со градежни материјали, како и дворот на хотелот.
„Денеска, при повторно разгорување, пожарот се прошири до хотелот „Њу Стар“, како и до околните куќи, со што директно беа загрозени животите на граѓаните“, стои во објавата на ЦУК на Фејсбук.
Оттаму апелираат до сите надлежни институции и локалните самоуправи итно да се вклучат со конкретни чекори и да се стави крај на проблемот со дивите депонии, кои, според нив, претставуваат сериозна опасност по животната средина и јавното здравје.
ЦУК информира дека директорот Мухамед Али денеска испратил ново барање до надлежните институции со цел итно преземање активности за конечно решавање на овој проблем.
„Проблемот со оваа дива депонија трае подолг временски период и претставува реална закана за здравјето, безбедноста и добробитта на граѓаните, како и сериозна оперативна оптовареност за БППЗ, која често е ангажирана на истата локација“, посочуваат од ЦУК.
Оттаму потсетуваат дека во текот на изминатата недела директорот Али повеќекратно испратил официјални барања за интервенција, но засега нема конкретен одговор од надлежните.
Македонија
Мицкоски ја доби тужбата против Славјанка Петровска за клевета

Граѓанскиот суд во Скопје донел правосилна пресуда во корист на премиерот Христијан Мицкоски, утврдувајќи дека пратеничката од СДСМ и поранешна министерка за одбрана, Славјанка Петровска, јавно ширела невистини и клевети против него.
Како што информира премиерот преку објава на социјалните мрежи, судот ѝ наложил на Петровска не само да се извини, туку и да ја објави пресудата во медиумите.
„Ова е уште една потврда дека на лагата ѝ се кратки нозете. Судот потврди дека поранешната министерка и актуелна пратеничка ширела лаги и клевети против мене. Вистината мора да излезе на виделина“, напиша Мицкоски.
Тој ја искористи приликава и за поширока критика на политичката култура на неговите опоненти.
„Очигледно, лажењето како синдром на политичката култура на СДСМ не престанува да биде нивен заштитен знак. Со оваа пресуда се потврдува не само дека лажат, туку и дека не се промениле. Продолжуваат да го потценуваат народот“, порача премиерот.
Според Мицкоски, оваа судска победа не е лична, туку борба за вистината и достоинството на секој човек кој се спротивставува на политичките манипулации.
„Ова не е моја лична битка, ова е битка за принципи, за вистината, за достоинството на секој поединец кој не дозволува неказнето да му се лепат лаги“, стои во неговата објава.
Тој додава дека продолжува да работи со посветеност и дека „лагите ќе паднат, а вистината победува“.
Скопје
Град Скопје: Обвинителството го отвори првиот случај за дивоградбите во Чаир

Основното јавно обвинителство ја започна постапката по првата пријава за фалсификати поврзани со градби во Општина Чаир, информираа денеска од Град Скопје.
Според соопштението од прес-службата, истрагата се однесува на сомневања за фалсификување на документи и незаконска легализација, а се поврзува со поранешниот градоначалник на општината, Висар Ганиу.
„Основното јавно обвинителство ја започна постапката по првата пријава со фалсификатите. Таму веќе се водат уште две постапки претходно започнати за Висар Ганиу, првата за фалсификување на целата архивска книга со броеви и барања за легализации, а втората за уште еден случај каде што незаконски се легализирале објекти со соучесник“, стои во соопштението.
Од Град Скопје испратија и повик до Основното јавно обвинителство за гонење на организиран криминал и корупција, со барање конечно да започне постапка против, како што велат, „организираната криминална банда“ во Чаир.
„Очекуваме и Основното јавно обвинителство за гонење на организиран криминал и корупција да се одважи и да почне да постапува против организираната криминална банда во општина Чаир, која овозможувала градење незаконски на небезбедни згради со црни пари од нелегални извори“, велат од Град Скопје.
Во реакцијата се посочува и дека некои од лицата кои се појавуваат како сопственици на овие објекти сега се милионери, а официјално се прикажани како градители на зградите уште од пред 5, 6, 10, па и 11 години.