Македонија
Мицкоски до Јорданов: Акт на нецивилизираност е што казнувате цела држава поради ваши историски фрустрации

„Го прочитав европратеникот Александар Јорданов и неговото гледање на моите позиции и ставови, неговите навреди кон Македонија и фалсификувањето на историјата и негирањето на македонската нација. Секако, ова тврдење доаѓа по ползувањето на дипломатските придобивки, кој како амбасадор на Бугарија ги уживаше во Скопје и Македонија, при што луѓето што го познаваат знаат да речат дека честопати со исклучителна љубов и почит говорел за нашето гостопримство. Тогаш за разлика од сега не му сметаше дека зема плата поради неговиот престој во Република Македонија, каде што постои македонски народ“, објави став лидерот на опозициската ВМРО-ДПМНЕ, Христијан Мицкоски, на „Фејсбук“.
Тој својот коментар го насочи по изнесените ставови на поранешниот бугарски амбасадор во земјата, кој имаше објава на „Фејсбук“, која изобилува со навреди и пцости за Македонците квалификувајќи ги како „црвени ѓубриња“, „титовисти“, „србомански измет“ и „одродени Бугари“
„Тоа што сте член на Европскиот парламент не ви го дава правото на непочитување кон Македонија и постојаните фалсификати, историски и политички за кои говорите и ги произведувате. Кога говорите за Гоце Делчев, можам само да ѝ благодарам на мудроста на вашите претходници и на бугарските политичари, кои ја почитуваа желбата на големиот македонски херој и ги предадоа моштите во единственото слободно парче македонска почва, денешна Република Македонија. Тоа беше акт на бугарската почит кон македонскиот херој Делчев. Но, за жал, не пропуштате ниту миг да го изгнасите и нивниот чекор на пријателство и нашето природно право слободно да се повикуваме и да го славиме неговото дело“, напиша Мицкоски.
Првиот човек на опозициската партија на Јорданов му порача:
„Никој не ви го оспорува правото да го почитувате Гоце Делчев доколку сакате. Но, почитувајте го во целост и она што вистински бил. Македонец, кој се борел за слободна Македонија“.
Мицкоски прашува:
„Цивилизирано ли е што еден европратеник како вас има навреди кон соседната држава со речник што е недостоен и исполнет со патолошко и компулсивно лажење. Тоа што сте член на Европскиот парламент не ве прави поголем Европеец од нас Македонците, кои отсекогаш тежнееле и биле дел од заедничката прозападна идеја, туку ја зголемува вашата одговорност да се придржувате до цивилизираното однесување, кое отсуствува во вашето дејствување“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Разрешен директорот на Клиниката за неврологија, проф. д-р Игор Кузмановски

Министерството за здравство информира дека министерот Азир Алиу денес донесе решение за разрешување на директорот на ЈЗУ Универзитетска клиника за неврологија, проф. д-р Игор Кузмановски.
„Во најкраток рок ќе биде именуван нов директор согласно законските процедури. Работата на Клиниката продолжува непречено“, известува Министерството за здравство.
Македонија
Завршена регионалната програма за сертификација на службени кучиња за мириси на производи

Во рамки на проектот „Поддршка на националните власти на државата во намалувањето на ризикот од пролиферација и злоупотреба на мало и лесно оружје“, успешно беше завршен процесот на Регионалната програма за сертификација на службени кучиња за мириси на производи – значаен чекор во зајакнување на регионалната безбедност и борбата против транснационалниот криминал.
На свеченоста по повод завршувањето на обуката, директорот на Бирото за јавна безбедност при Министерството за внатрешни работи, Александар Јанев, им додели дипломи на учесниците, нагласувајќи дека оваа програма претставува симболично, но и суштинско градење на мостови помеѓу институциите од целиот регион.
„Со шест модуларни обуки и создавање тимови подготвени да бидат на првата линија во борбата против криминалот, Регионалниот К9 центар се етаблира како водечка точка за обука и сертификација. Заедно вложуваме во безбедноста, стабилноста и иднината на регионот,“ истакна директорот Јанев.
Проектот е реализиран со поддршка на ОБСЕ, ФРОНТЕКС и донаторите, чија соработка и ангажман беа клучни за успешната имплементација на програмата.
Со ваквите активности, Министерството за внатрешни работи и Бирото за јавна безбедност ја потврдуваат својата посветеност на континуираното унапредување на капацитетите за справување со организиран и транснационален криминал, како и зајакнување на регионалната безбедносна соработка.
Македонија
Времето утре: променливо облачно со сончеви периоди

Времето утре ќе биде променливо облачно со сончеви периоди. Ќе дува слаб до умерен, а вдолж Повардарието и во источните делови засилен северен ветер. Во североисточните подрачја ќе има услови за локален слаб дожд. Минималната температура ќе биде во интервал од 4 до 12, а максималната ќе достигне од 11 до 21 степен.
Во Скопје, променливо облачно со сончеви периоди. Ќе дува умерен, повремено засилен северен ветер. Минималната температура ќе се спушти до 11, а максималната ќе достигне до 19 степени.
Времето во наредните денови
До вторник времето ќе биде претежно стабилно со дневни температури малку под просекот за овој период од годината. Кон средината на следната седмица под влијание на влажна и посвежа воздушна маса ќе има услови за локални врнежи од дожд и опаѓање на дневната температура за неколку степени.