Македонија
Мицкоски: Единствена безбедносна закана за граѓаните е криминалната коалиција на СДСМ и ДУИ

Единствена безбедносна закана за државата и граѓаните претставува криминалната коалиција на СДСМ и ДУИ, а сè друго е манипулација и сеење страв помеѓу граѓаните, изјави претседателот на ВМРО-ДПМНЕ, Христијан Мицкоски, при денешната посета во Битола, одговарајќи на новинарско прашање во врска со изјавите на владини функционери дека ако сега не се реши прашањето со Бугарија ќе има можен безбедносен проблем за државата.
„Тоа го слушнав од еден соработник на Зоран Заев во владата, вицепремиер кој повторно се заканува со милитантни изјави дека ќе имало безбедносни проблеми. Сакам да ги успокојам граѓаните дека такви проблеми ќе нема. Единствена безбедносна закана за државата претставува криминалната коалиција помеѓу СДСМ и ДУИ, којашто, за жал, придонесе да 45 луѓе ја доживеат онаа стравотна несреќа, 14 луѓе живи да горат во модуларната болница во Тетово, повеќе од 7.000 луѓе да го загубат својот живот поради неспособноста во справувањето со ковид-пандемијата“, рече Мицкоски.
Мицкоски вели дека сето тоа ни се случува поради широко распространетата корупција, односно гнилиот систем и политичкото мочуриште кое е резултат на оваа нелегитимна, криминална коалиција СДСМ и ДУИ.
„Тоа е она што претставува сериозна безбедносна закана за граѓаните во Македонија. Сето останато не би сакал да верувам, преставува уште еден обид за манипулација и страв кај граѓаните од страна на овие политичари кои мислат дека живеат неколку децении во минатото наместо да живеат неколку децении во иднината“, нагласи Мицкоски.
Мицкоски потенцираше дека не би сакал да верува дека некој повторно сака да тргува на сметка на идентитетот на македонскиот народ и македонската држава за да може да заштити свои бизнис-интереси.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и потопло со мала до умерена облачност

Времето денеска ќе биде сончево и потопло со мала до умерена облачност. Ќе дува слаб до умерен ветер претежно од југозападен правец.
Минималната температура ќе биде во интервал од 6 до 17, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 13, а максималната ќе достигне до 33 степени.
Времето во наредните денови
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец. Во сабота попладне и во текот на ноќта кон недела ќе биде нестабилно со локален пороен дожд и грмежи. Ќе дува умерен до засилен југозападен ветер, а во недела ветерот ќе го смени правецот во северен. Потоа следува период на стабилно и потопло време.
Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.