Македонија
Мицкоски: Економијата оди надолу, мерките се изборна измама
„Покрај серија прес-конференции на власта за тоа колку добро се живее и колку многу ѝ се помага на економијата, во реалноста имаме вистински хаос од проблеми, беспарица и тежок живот. Тоа што лошо се менаџира корона-кризата е голем проблем. Но, еднакво лошо дури и многу хаотично е во економијата“, изјави претседателот на ВМРО-ДПМНЕ, Христијан Мицкоски.
„Имаме три пакет-мерки и многу пластично може да се споредат ефектите од нив. Бенефити нема, сè полошо е во економијата, а најновиот пакет-мерки, освен за пиар, нема никаква корисна функција, односно може слободно да се каже дека претставува изборна измама. Имама која сега се вика трет пакет-мерки, а иста како онаа дека ќе имало просечна плата од 500 евра, чист воздух, ќе дошол живот, ќе имало реформи во судството и правосудството, правда за секого, ‘Фејсбук’ и ‘Гугл’ ќе дошле да инвестираат во Македонија итн.“, вели тој.
Според Мицкоски, единственото економско достигнување остварливо за Владата е дефицитот, и тоа е околу 200 милиони евра за 4 месеци. Секое домаќинство е задолжено со нови долгови, а граѓанинот исто како и бизнисот мака мачи да сврзе крај со крај.
„Не е ова мегдан за добивање политички поени, туку да се укаже дека вака повеќе не оди и дека економијата страда. А економијата оди надолу затоа што имаме опасна неспособност на Владата на Заев и Спасовски. Само датумите се нови, а исти се лагите, невистините и манипулациите. Во продолжение би сакал да се осврнам на неколку конкретни показатели врз основа на кои одлучивме на првата лидерска средба кај претседателот Пендаровски да се воведе вонредна состојба. На тој состанок постоеја две причини за да се воведе вонредната состојба, и тоа првата беше поради тоа што имаше потреба да бидат одложени веќе закажаните предвремени парламентарни избори, кои требаше да се одржат на 12 април и втората беше дека е потребно да се донесе пакет економски мерки што ќе бидат помош за граѓаните, но и помош за стопанството.
Што се случи? Се донесе уредба со сила на закон за одложување на изборите, која го нема легитимитетот од опозицијата и за тоа зборував во неколку наврати изминативе денови за време на моите изјави што ги давав во јавноста бидејќи ќе споменам уште еднаш – техничкиот министер во Министерството за внатрешни работи не ја гласаше таа уредба од причини веќе познати на јавноста, а кога сме кај сетот економски мерки, би сакал малку подетаљно да се осврнам на ефектот од нив. Денеска е точно 66. ден од воведувањето на вонредната состојба, нема да се задржам на уредбите со сила на законот, кои некому му донесоа лиценца за одгледување марихуана, нема да ги коментирам уредбите за брусење дијаманти или уредбите што требаше вонредно да извршат исплата на платите на поранешните вработени во специјалното јавно обвинителство. И нема да ги коментирам уште десетиците такви уредби, ќе се задржам само на оние што требаше, всушност, да бидат економска поддршка за граѓаните и за стопанството.
Во првиот сет мерки што ги донесоа ресорниот министер и Владата, две беа точките што беа клучни, и тоа 50 проценти субвенција на придонесите и втората е одложување на аконтацијата на данокот на добивка. За втората ќе повторам буџетски импликации нема, а за првата да има, и во продолжение ќе ја запознам јавноста колкава е искористеноста на таа мерка. Вториот сет мерки беше мерката 14.500 денари помош за компаниите или минимална плата помош за компаниите за април и мај и покрај тоа што ние како опозиција велевме – немојте да го оставате стопанството 2 месеца без никаква помош, ајде да го вклучиме и март бидејќи стопанството мора да остане живо затоа што само живо стопанство и реален сектор значат стабилна и загарантирана иднина за нашата држава и за нашите граѓани.
Но, каква е реалноста? Вкупно беа предвидени 60-ина милиони евра месечно помош во двата месеца, а тоа се месеците мај и јуни, т.е. во мај требаше да биде исплатена помошта за април, и за јуни треба да биде исплатена помошта за мај и со тоа да бидат опфатени вкупно 250 илјади граѓани“, вели Мицкоски.
Според него, вкупно во мај помош за април добиле 17.813 правни субјекти или компании или вкупно 110 илјади вработени, што е речиси два и пол пати помалку од тоа што беше предвидено со уредбата, а во вкупен износ се исплатени нешто повеќе од 1,5 милијарда денари или околу 25 милиони евра, што е малку повеќе од 2 пати помалку од она што претходно го најавуваше Владата.
„Економската поддршка за стопанството, која беше опфатена во првиот и вториот сет мерки, не само што не е исполнета и не само што не е испорачана како што била планирана и ветена пред стопанството и реалниот сектор, туку е од 2 до 2 и пол пати помала во споредба со она што беше ветувано. Сега, доколку вонредната состојба заврши на 30 мај и доколку претседателот Пендаровски не одлучи да ја продолжи, од тој момент престанува во сила уредбата во која е суспендиран членот 8 а од Изборниот законик, што значи дека помошта што треба стопанството да ја добие во јуни, а се однесува за мај, не може да ја добие доколку изборите се одржат во следните 60 дена почнувајќи од 31 мај и завршувајќи на 31 јули. Уште една лага што е испорачана од ресорниот министер, Заев и од Спасовски. Доаѓаме до најголемата лага, а тоа е т.н. трет сет мерки, кој четврти пат ни се најавува на четврта прес-конференција од страна на ресорниот министер. Овој трет сет мерки опфаќа три групи мерки што ги предвидела Владата. И тоа првиот е посветен на поттикнување на јавната потрошувачка и се однесува на помош кон граѓаните, вториот е исто така помош кон стопанството и третиот е помош кон земјоделството и земјоделците“, вели Мицкоски.
Осврнувајќи се на третиот пакет-мерки и ваучерите што ќе им бидат делени на граѓаните, Мицкоски вели дека сето тоа е со цел да биде едно ветување предизборно во обид за поткуп преку еднократна мерка, која, практично, а така веруваат во Владата, ќе обезбеди поддршка од страна на граѓаните што ќе бидат евентуални корисници на овие мерки по парламентарните избори.
„Зошто? Затоа што истото што важеше за вториот сет мерки, ќе важи и за третиот, односно веднаш по 30 мај доколку не биде продолжена вонредната состојба, а сите изгледи се такви дека нема можност за продолжување, членот 8 а од Изборниот законик стапува во сила и сите овие вонредни исплаќања на плати, социјална помош или други исплати и материјални надоместоци, кои не се редовни месечни примања, се кривично дело, што е казниво со закон и затворска казна од минимум 5 години. Ја користам ова пригода до сите оние што ќе се обидат на ваков начин, лажно и лицемерно да ветуваат, сите оние што ќе се обидат да поткупат, сите оние што ќе сторат кривично дело, дека ќе добијат кривична пријава“, вели тој.
Мицкоски ги повика Државната комисија за спречување корупција и судир на интереси и антикорупциска комисија да излезат со став за сето ова што изминативе денови четврти пат од ресорниот министер и од Владата ѝ беше соопштувано на македонската јавност, ѝ беше ветувано нешто што никогаш нема да се исполни.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Максим Димитриевски најави нова детска градинка за 400 деца и целосна изградба на улицата АВНОЈ
Градоначалникот на Куманово и кандидат за нов мандат – Максим Димитриевски најави нов голем капитален објект – изградба на детска градинка во населбата Зелен Рид. Со која ќе се излезе во пресрет на потребите на жителите на оваа населба, но и пошироко. На локација за која во минатото биле издвојувани големи износи на финансии како отштета за поранешните сопственици на земјиштето.
„Дојде време денес да се обезбедат средства со кои ќе се изгради нова детска градинка за повеќе од 400 деца. Исто така, целосно урбано ќе се среди целиот простор околу, со што дополнителнои ќе се придонесе за облагородување на изгледот на оваа населба“, нагласи Димитриевски.
Паралелно со ова, Димитриевски најави дека во план е и изградба и довршување на сите краци од улицата АВНОЈ, како и целосно поставување на фекална канализација, со што дефинитивно ќе се надмине деценискиот проблем за жителите што живеат во тој дел на Куманово. „За сите проекти се обезбедени средства од Владата и во следниот период општината ќе ги реализира целосно“, порача Максим Димитриевски.
Тој ги повика граѓаните да му ја дадат поддршката и во вториот круг за Куманово да продолжи да расте и да се развива.
Македонија
Мицкоски од Карпош повика на масовна излезеност и поддршка за Сотир Лукровски и Орце Ѓорѓиевски
Претседателот на ВМРО-ДПМНЕ, Христијан Мицкоски, се обрати на мини митингот во Карпош, во рамки на вториот круг од локалните избори закажани за 2 ноември 2025 година, под слоганот „Вистинскиот избор! Твојот човек! Твоето место! За твојата иднина!“.
Мицкоски од Карпош зборуваше како човек кој го поминал својот живот низ улиците во Карпош со карпошани и повика граѓаните на 2 ноември да гласаат за број 9 за крај на бетонизацијата, за развој и напредок.
„Денес сум овде како човек кој го поминал својот живот тука во овие улици тука низ Карпош, како карпошанец и како таков сакам да кажам неколку работи коишто сметам дека се важни да се кажат. На овие локални избори народот јасно и гласно кажа која партија ја има довербата. После првиот круг ВМРО-ДПМНЕ и коалицијата освоија 33 градоначалници плус кандидатите кои се во втор круг како првопласирани и 6 како второпласирани, тогаш доаѓаме до бројка од 59 општини. Во 58 општини коалицијата предводена од ВМРО-ДПМНЕ и има мнозинство во советите. Ако на тоа се додаде и огромната предност која ја има Орце во однос на неговиот противкандидат којшто вчера видовте како на медиум јавно избегна да каже дали ќе ги поддржи кандидатите во Брвеница и Кичево на ВМРО-ДПМНЕ, тоа треба да се запомни, ние знаеме, но добро е скопјани да запомнат со какви измамници имаат работа. Затоа што еднаш измамник цел живот измамник. Честа се стекнува на улица и таму се учат работи кои во училиште не можеш да ги научиш, а меѓу нив е и честа и таа се брани на улица, но овој човек не само што не ја има таа чест туку тој има од кого да учи од неговиот ментор претседателот на таа политичка партија за која одамна вие знаете за каков измамник станува збор, тие луѓе ја изгубија својата чест и ја немаат“ нагласи Мицкоски.
Мицкоски од Карпош повика на масовна излезеност и поддршка за број 9, за Сотир Лукровски и Орце Ѓорѓиевски за градоначалник на Скопје
„Советничката листа на ВМРО-ДПМНЕ и коалицијата за Град Скопје убедливо победи во однос на сите други советнички листи, што значи имаме вкупно 60 општини во кои ВМРО-ДПМНЕ победи на овие локални избори во првиот круг. Јас сум убеден дека и после вториот круг ќе имаме 59 градоначалници плус Градот Скопје“ истакна Мицкоски.
Мицкоски ги повика граѓаните на 2 ноември да гласаат за број 9 и Сотир Лукровски во Карпош, за развој и напредок.
Македонија
Мицкоски: Кога Јакимовски бараше поддршка го замолив да нема бетонизација, а потоа ми рече ‘морам од нешто да живеам’
Претседателот на ВМРО-ДПМНЕ, Христијан Мицкоски, од маалска средба во општина Карпош порача дека е време за промена и крај на, како што рече, годините на „бетонизација и приватни интереси“ во оваа општина.
Во своето обраќање, тој се осврна на односите со актуелниот градоначалник Стевчо Јакимовски, за кого рече дека „ја изневерил довербата на граѓаните и коалицијата“ уште по изборите во 2021 година.
Мицкоски се наврати на 2021 година, кога, како што рече, актуелниот градоначалник на Карпош, Стевчо Јакимовски, побарал помош и поддршка од ВМРО-ДПМНЕ по првиот круг од локалните избори.
„Тогаш дојде ненајавен, вознемирен и уплашен, во паника. Го примив, му реков да седне и да се смири, да разговараме. Ми велеше: ‘Те молам, поддржете ме, ако треба ќе клекнам, само да ме поддржите. Народот може да ме оправда, да ме обели’. Му реков – немој така, не личи, си човек во години, ќе разговараме, но имам едно барање – нема повеќе бетонизација во Карпош. Граѓаните се изморени од тоа“, раскажа Мицкоски.
Според него, Јакимовски ветил дека ќе го почитува тоа барање и добил поддршка од ВМРО-ДПМНЕ со што ја обезбедил градоначалничката функција.
„По изборите, кога отидов да му честитам, ми покажа маса преполна со детални урбанистички планови. Ми рече: ‘Бирај, кој е за тебе’. Го прашав што значи тоа, нели се договоривме дека нема да има нова бетонизација. А тој ми рече: ‘Морам од нешто да живеам’. Тогаш ми стана јасно дека не станува збор за ветувања, туку за интереси. Му се заблагодарив и му реков дека од мене нема да добие поддршка“, изјави Мицкоски.
Тој додаде дека по тој период Јакимовски започнал со лични напади, но и дека, како што рече, времето на „старите политички лица“ завршува.
„Карпош мора да ја врати својата енергија и изглед. Се работи за човек кој се наоѓа на црната листа на САД за криминал. Време е граѓаните да изберат чесност, а не интереси“, изјави Мицкоски, повикувајќи ги жителите на Карпош да го поддржат кандидатот на ВМРО-ДПМНЕ, Сотир Лукровски, во вториот круг на локалните избори на 2 ноември.

