Македонија
Мицкоски живее надвор од реалноста, економијата тоне, граѓаните едвај врзуваат крај со крај, велат од СДСМ

Изјавите на Мицкоски, во кои тврди дека цените се намалени, дека инфлацијата е намалена и дека сме биле први во Европа, се во целосна спротивност со секојдневната реалност на македонските граѓани, велат од СДСМ.
Очигледно, според нив, Мицкоски живее надвор од реалноста.
„Додека Мицкоски зборува за „економски успеси“, граѓаните се соочуваат со постојано зголемување на цените на основните производи, платите стагнираат а стандардот опаѓа. Тоа е реалноста во Македонија. Поскапувањата од една страна и стагнирањето на платите од друга страна го отежнува животот на граѓаните кои се принудени да се откажат од основни потреби за да го преживеат месецот. Според проекциите на Светска банка, Македонија ќе биде на дното во регионот по економски раст, со проектирани само 2,7% раст на БДП оваа година“.
Ако се пресмета инфлацијата од 3%, додаваат од СДСМ, раст воопшто нема, односно економијата е во целосна стагнација.
Како што оценуваат, наместо да се фокусира на весели математики кои не ја одразуваат вистинската состојба, премиерот треба да се посвети на решавање на економските проблеми кои ги мачат граѓаните.
„Политиките на Мицкоски досега не донесоа подобрување на животниот стандард. Напротив, економската несигурност и социјалната неправда се зголемија“, истакнуваат од опозициската партија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
ВМРО-ДПМНЕ: Кандидати за советници во Струмица од СДСМ нападнале странски државјани

Владејачката ВМРО-ДПМНЕ обвини дека кандидати за советници на опозициската СДСМ во Струмица физички нападнале странски државјани. Според нивните наводи, станува збор за Христијан Ефтимов, претседател на младите во партијата и Илија Стојанов.
„Додека СДС и Венко Филипче зборуваат за европски вредности, нивни кандидати за советници крвнички тепаат странци во Струмица. СДС повторно го покажа своето вистинско лице – наместо програма, план и визија, нудат насилници и тепачи,“ наведуваат од ВМРО-ДПМНЕ.
Оттаму споменуваат и други случаи на насилно однесување на членови и функционери на СДСМ, поврзани со градоначалникот на Крива Паланка, Сашко Митовски, и советникот од Кочани, Аки Акимов.
„Сашко Митовски, градоначалникот на Крива Паланка, во слободно време во видно алкохолизирана состојба се однесувал како шериф и тепал припадник на МВР. Долга е низата на насилници од редовите на СДС. Таков случај е и советникот Аки Акимов од СДС кој делеше тупаници во Советот на Кочани и јавно се закануваше. Акимов може да се види во прегратките на Венко Филипче на фотографии, но Филипче не се огради ниту од овој случај на насилство“, велат од ВМРО-ДПМНЕ.
Бараат од лидерот на партијата, Венко Филипче, јавно да се огради од насилниците.
Македонија
Николоски: Изградбата на брзата пруга во Македонија ќе биде најзначаен инфраструктурен проект за цела Југоисточна Европа

Изградбата на брзата пруга во Македонија ќе биде најзначаен инфраструктурен проект за цела Југоисточна Европа, ќе донесе огромен економски бенефит и регионот и значително ќе го намали времето на патување од Скопје до Солун и до Атина, истакна заменик претседателот на Владата и министер за транспорт, Александар Николоски.
„Ние после долг временски период разговараме со Грција за поврзување, за економија, за бизнис, за она што го прави животот. Брзата пруга колку што е бенефит за Македонија, многу повеќе е од бенефит за Грција, особено што целосно ќе ги отвори пред се солунското и атинското пристаниште кон Централна Европа. Изградба на брза пруга на која што карго возовите ќе возат со 120км/ч, во само првата година откако ќе се изгради од сегашни 12 милиони евра колку што имаат приход двете железнички македонски претпријатија, ќе оди на 120 милиони. Истото ќе важи и за грчките пристаништа, што целосно ќе ја промени економијата во целиот овој регион”, рече Николоски.
Вицепремиерот информираше дека грчките власите се согласни, следната година почнат да градат двоколосечна пруга по примерот на Македонија од Солун до Гевгелија, а директорите на железничките претпријатија на двете земји веќе ги усогласуваат техничките детали.
„Тоа ќе значи дека од Скопје до Солун ќе се патува за 1 час и 20 минути, а до Атина за не повеќе од 4 часа и мислам дека тоа целосно ќе го смени начинот на живот на овој дел од Европа. Така што брзата пруга ќе стане најзначаен економски-инфраструктурен проект за цела Југоисточна Европа”, истакна заменик претседателот на Владата, Александар Николоски.
Македонија
За два дена над 200 прегледани лица во Трубарево, уште 8 упатени на Пулмологија

Министерството за здравство во соработка со Клиниката за пулмологија спроведе дводневен скрининг на жителите на Трубарево, со цел навремено откривање на евентуални заболувања на дишните патишта по големиот пожар во складиштето за електроника.
„Само во текот на вчерашниот ден биле прегледани над 100 лица на двата пункта во населбата, од кои осуммина се упатени на Клиниката за пулмологија поради хронични заболувања за кои подолго време не направиле контрола“, рече министерот Азир Алиу.
Скринингот опфати клинички преглед, мерење на пулс и сатурација, како и проценка на виталниот капацитет на пациентите.
„Овој скрининг имаше голем одѕив со над двесте прегледани пациенти во два дена и беше навистина добро прифатен од локалното население. Во следниот период продолжуваме да ја следиме состојбата во соработка со Клиниката за пулмологија и сите надлежни институции,“ изјави министерот.
Од тимовите на Клиниката за пулмологија информираат дека упатените пациенти имале симптоми како потешко дишење, сува кашлица и стегање во градите. Дополнително, биле детектирани и лица со висок крвен притисок, кои биле советувани да се обратат кај својот матичен лекар за натамошни испитувања.
На првиот ден од скринингот, 11 лица беа упатени на Клиника.