Македонија
Мицкоски: Има неформална коалиција СДС-ДУИ-Левица, тие гласаа точки за бетонизација и бизниси во Скопје и Карпош
Вистината, порано или подоцна излегува на виделина за оние политички партии кои што со евтин популизам, преку статуси на социјалните медиуми се обидуваат да го привлечат вниманието на луѓето кои што со право се разочарани од политиката и така злоупотребувајќи ги чуствата на луѓето, мислат дека ќе добијат некој поен повеќе и ќе си обезбедат, ете пратеничка плата, советнички паушал и така натаму, вели претседателот на ВМРО-ДПМНЕ, Христијан Мицкоски одговарајќи на новинарски прашања од Штип во врска со неформалната коалиција на СДСМ-ДУИ-Левица.
Таквата коалиција, вели Мицкоски, е се поочигледна во локалната власта каде што советниците на овие партии во општинските совети гласаат разно разни одлуку, како таа носењето на ДУП-от во Карпош со кој се овозможува бетонизација и изградба на десетици високо катници.
„Во текот на вчерашниот и завчерашниот ден можевте да бидете сведоци на една непринципиелна коалиција, а тоа е коалицијата на политичката партија Левица, политичката партија ГРОМ и СДСМ каде што, да речеме, во општина Карпош заеднички си изгласаа Детален урбанистички план каде што ќе се градат десетици згради без да има услови за тоа да се направи, каде што не се предвидени градинки, училишта и така натаму. Тие кои што до вчера пишуваа статуси против урбанизацијата, сега заедно со принцовите на бетонот во Скопје ќе градат десетици урбани станбени блокови“, истакна Мицкоски.
Таквата коалиција, додаде Мицкоски, може да се види и во Советот на Град Скопје каде што пред неколку дена советниците на СДСМ, ДУИ и Левица ги изгласаа програмите за работа на претпријатијата и институциите под надлежност на градот за заеднички да прават бизниси.
„Пред неколку дена, коалицијата Левица-СДСМ и ДУИ во Советот на Град Скопје ги изгласа заеднички програмите на работа на претпријатијата и инстируциите кои што се под ингиренции на Град Скопје, нормално, за да можат заеднички да прават бизнис. Ете така функционира, за жал, таа политичка партија која што во јавноста се обидува да се претстави себеси како опозициска. Но, таа е опозициска на ВМРО-ДПМНЕ, а таму каде што во советите треба да го поддржи ВМРО-ДПМНЕ заедно со многу инсинуации, со многу опструкции работи против волјата на народот, односно против ВМРО-ДПМНЕ“, рече Мицкоски.
Затоа, пораката на претседателот на ВМРО-ДПМНЕ до граѓаните е да се обединат околку нивната коалиција.
„Ве молам, да не дозволиме да ни се повторат овие, веќе шеста година се навршува во јуни, да можеме да го сопреме ова уназадување, овој пад на нашата татковина, а потоа да ја развиеме онака како што и прилега. Затоа да не подлегнуваме на евтин популизам преку социјалните медиуми, а во суштина се гласаат станбени блокови за дебели провизии и за дебели бизниси од страна на определени политички партии“, посочи Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски на терен: Сите патишта се проодни, снегот редовно се чисти од Македонија пат
Сите патишта во државата се проодни благодарение на макотрпната работа на луѓето од Македонија пат, кои даваат се’ од себе да се справат со обилните врнежи од снег кои ја зафатија државата, изјави денеска заменик претседателот на Владата и министер за транспорт, Александар Николоски, кој ги посети пунктовите на Македонија пат на планинските превои “Стража” и “Пресека”.
– Денеска сум на терен во увид на активностите на Македонија пат, можам да кажам дека состојбата е добра, сите патишта во државата се проодни. Би сакал да им се заблагодарам на овие прекрасни луѓе од Македонија пат, кои што даваат се’ од себе, за сите патишта да се проодни и чисти. Тука сме на увид на планинскиот превој “Стража”, претходно бев во увид на патниот превој “Пресека”, и ќе продолжам на уште неколку места, рече Николоски.
Тој упати благодарност до работниците на Македонија пат и упати апел до сите граѓани кои имаат потреба да патуваат, да возат внимателно, да ја прилагодат брзината според условите на патиштата и без исклучок да поседуваат зимска опрема.
– Би сакал да се заблагодарам на сите работници, на сите оние кои што помагаат, да ги замолам сите кои што патуваат, да ги почитуваат прописите и правилата, да користат зимски гуми, секаде каде што е потребно ланци и сета дополнителна опрема и да ја прилагодат брзината. Ние ќе направиме патиштата секаде да се проодни и да не се почувствува или минимално да се почувствува ова невреме кое што ја зафаќа Македонија, апелираше вицепремиерот Николоски.
Македонија
УХМР: Најголема опасност од излевања и заезерувања има во југозападните и западните делови на земјата
Од утринава зголемување на водостоите има во југозападниот дел на земјата, односно на река Коселска, река Сатеска, река Ресенска и на останатите помали реки и суводолици во регионот каде се можни локални излевања на реките и појави на заезерување на водата. Во Охридско-Преспанскиот регион се очекува реакција на помалите реки и суводолиците, а исто така и во Струшкиот регион каде се можни локални излевања и појави на заезерување во Струшкото Поле заради интеракција на подземните и површинските води, информираат од Управата за хидрометеоролошки работи.
„Исто така, утринава е висок водостојот на река Вардар во горниот дел од сливот и можни се локални излевања на реката во тој дел (во Гостиварскиот регион), а можни се појави на заезерување на водата во Полошката Котлина.
Значително е висок водостојот на река Црна во долниот дел од течението и можни се локални излевања на реката и појави на заезерување на водата во Пелагониската Котлина, а исто така и во делови од Битолско-Прилепскиот регион. Во горниот дел од сливот нема позначително зголемување на водостојот но можни се заезерувања во Демир Хисарскиот регион.
Останува висок водостојот на река Треска и таму се можни локални излевања и заезерувања во целиот слив на реката, вклучително и Кичевскиот регион.
Генерално, најголема опасност од излевања и заезерувања има во југозападните делови и западните делови на земјата каде и во текот на денот некаде до 18:00 часот врнежите ќе бидат од дожд и снег и на повисоките места, додека на пониските ќе бидат само од дожд. Во попладневните часови, некаде после 18:00 часот се очекува продор на северен ветер и северно струење на воздухот што ќе придонесе за заладување на времето и врнежите насекаде ќе преминуваат во вид на снег. До тој временски преод останува опасноста од локални излевања и заезерувања на водата пред се во југозападните, западните и северозападните делови на земјата.
Предупредуваме на вниателно движење покрај реките и суводолиците во текот на денешниот ден“, се наведува во соопштението на УХМР.
Македонија
Денеска гласаат болните и затворениците пред повторните избори за градоначалници во четири општини
Денес се спроведува гласањето на болните или немоќни лица и лицата кои се на издржување на казна затвор за повторните избори за градоначалници на општините Гостивар, Маврово и Ростуше, Врапчиште и Центар Жупа, информира Државната изборна комисија.
„Вкупно 249 болни или немоќни лица можат да го остварат своето право на глас на овие избори. Од нив, 146 лица се пријавени за гласање во Гостивар, 32 болни или немоќни лица имаат право да гласаат во Врапчиште, 69 лица може да гласаат за градоначалник на општина Маврово и Ростуше и 2 лица може да гласаат за градоначалник на општина Центар Жупа. Со почеток во 7:00 часот во 7 казнено поправни установи, своето право на глас можат да го остварат 94 лица кои се на издржување казна затвор или притвор“, велат од ДИК.
Оттаму додаваат дека гласањeто досега се одвива непречено и без проблеми.

