Вчера околу 10.30 часот З.Г., инспектор во град Скопје, пријавил во СВР Скопје дека на ул.2бб во близина на дива депонија, при вршење на службени дејствија за вршење на надзор и подигање на мостри, дошле две лица и еден од нив (К.Д. -градоначалник на Шуто Оризари) почнал да ги навредува него и неговите колеги и да им се заканува и го попречувал земањето на мостри.

Се работи на расчистување на случајот.

Претседателот на Собранието, Африм Гаши, оствари средба со Анжеј Фрагнеш, специјален претставник на Република Словенија во Република Северна Македонија.

Претседателот Гаши ги нагласи одличните повеќедецениски билатерални односи меѓу двете држави и динамиката на средби на сите нивоа кои се најголема потврда за заемната желба за поблиско поврзување меѓу нашите две земји.

Во текот на средбата претседателот Гаши ги истакна заложбите на Словенија за прашањето на проширувањето да остане високо на агендата на ЕУ, како и поддршката што ја дава на нашата држава на патот кон ЕУ. Искуствата покажуваат дека процесот на проширување е единствената алатка за обезбедување просперитет, безбедност и стабилност на европскиот континент, и како таква треба да продолжи со уште поголем интензитет.

Фрагнеш му честита на претседателот Гаши за досегашната работа како претседател на Собранието и искажа подготвеност за натамошно интензивирање и продлабочување на комуникацијата и соработката на теми од заемен интерес.

Фрагнеш истакна дека од особено значење е процесот на отворање на преговарачките поглавја да отпочне што поскоро и земјата да се приклучи кон ЕУ, за што Словенија ќе дава постојана отворена и силна поддршка на Република Северна Македонија.

Соговорниците се осврнаа и на актуелните активности во Собранието, натамошното продлабочување на соработката меѓу двете држави на сите нивоа, со особен акцент на парламентарната дипломатија.

Членови на Пратеничката група на Собранието на Република Северна Македонија за соработка со Врховната рада остварија онлајн состанок со своите колеги од Украина, при што беа повторени заложбите за понатамошно јакнење на поддршката и на соработката меѓу двете земји, во пресрет на тригодишнината од почетокот на руската агресија.

Пратеничката Ивана Василевска, претседателка на ПГ за соработка со парламентот на Украина, истакна дека македонското Собрание е силно поврзано со украинскиот парламент, со желба за понатамошно динамизирање на соработката со несмален интензитет.

Василевска посочи дека во изминатите години сме сведоци на воени дејствија на европско тло и изрази уверување за средба во живо со украинските колеги во, како што рече, слободна Украина.

Копретседавачот на Групата за меѓупарламентарни односи со Република Северна Македонија во Врховната Рада на Украина, Валериј Зуб и во оваа прилика изрази благодарност за солидарност од македонска страна, посочувајќи дека тоа е од големо значење за украинскиот народ во соочувањето со инвазијата од Русија.

На онлајн состанокот се обрати и пратеничката Славјанка Петровска, посочувајќи дека верува во слобода и во демократија, како и во правото на секој народ да го одбере својот пат.

Потпретседателот на Собранието Јован Митрески, пак, истакна дека во македонското Собрание, и покрај промените на улогите по изборите минатата година, како и покрај разликите меѓу политичките сили за многу прашања, има мошне широк консензус во однос на поддршката на Украина наспрото руската агресија.