Претседателот на ВМРО-ДПМНЕ, Христијан Мицкоски, заедно со потпретседателот Александар Николоски и секретарот за меѓународна соработка, Тимчо Муцунски, денеска оствари средба со комесарот за соседство и проширување на Европската Унија, Оливер Вархељи, на која разговараа за актуелната политичка, економска и здравствена состојба во Македонија.

Мицкоски на средбата се осврна и на извештајот и на документот што вчера Европската комисија го објави за Република Македонија изразувајќи загриженост за слабостите и злоупотребите на механизмите и институциите од страна на власта. Мицкоски укажа на слабостите и недоволното справување со корупцијата, која, како што рече, е распространета во сите области.

Претседателот на ВМРО-ДПМНЕ на средбата говореше и за злоупотребата од носењето закони по скартена постапка со европско знаменце, како и слабиот напредок во подобрување на квалитетот на воздухот и намалување на загаденоста.

„Опозицијата и во минатото укажуваше дека европското знаменце и брзите постапки беа злоупотребувани од мнозинството на власт во десетици наврати како за носење закони за фабрики за марихуана така и за закони за правосудството“, рече Мицкоски.

Во текот на средбата претседателот на ВМРО-ДПМНЕ рече дека власта не знае да се справи со Ковид-19 и поради нивната неспособност, бројoт на заразени и починати е на многу високо ниво. Имено, тој посочи дека во врска со пандемијата не се презема ништо како на здравствен така и на економски план.

Мицкоски потенцира дека криминалот и корупцијата се многу застапени и дека има селективно владеење на правото. Исто така, тој рече дека власта дели тендери на лица блиски до власта и за тоа никој не одговара.

На средбата беа разменети и мислења за актуелните случувања и состојби во регионот.

На средбата беше изразено задоволството да се изнајде најдобар начин за да се остварат приоритетите, кои ќе придонесат кон менување на пејзажот на регионот на полето на економијата и Македонија да стане ефективно подрачје во кое ќе се инвестира и ќе се подобрат условите за живеење на луѓето во поглед на јавното здравје, поврзаноста, достапноста на дигиталните алатки за кои и ЕУ е подготвена за нивно заедничко спроведување.

При средбата претседателот Мицоски посочи дека ВМРО-ДПМНЕ како политичка партија има јасни и конкретни политики, кои ќе ја изнесат Република Македонија на прав пат, како и ќе имаат влијание на членството во Европската Унија.