Македонија
Мицкоски: Ќе немаше акција, да не беше брифингот на ВМРО-ДПМНЕ

“Дај боже постојано вака да ги саботираме и да ги инспирираме да ги завршуваат акциите, но треба да почнат од себе”, вака одговори Христијан Мицкоски на прашањето дали со вчерашниот партиски брифинг ја саботирале истрагата која ја водела МВР, а неофицијално, трае веќе година и половина. Мицкоски смета дека ако тие не излезеле со информации за новинарите, тогаш акцијата никогаш немало да биде спроведена.
“Ако ја спроведувале акцијата година дена, тогаш требало да ја спроведат. Не да почнат од службеникот, службеничката која зема отисок од прст или фотографира, бидејќи нив им било така кажано од некои други структури во МВР. Не можете да ме убедувате дека службеникот кој фотографира знае кој е Јован Вукотиќ, а уште помалку знае кој е Георги Андонов. Или пак, Седат Пекер, уште помалку знае кој е Џадин Адемивски. И од такви стотици лица. Во оваа држава криминалот и мафијата имаат своја држава. Колку повеќе, иронично кажано саботираме, толку побргу правдата и правната држава ќе владеат. Да не беше брифингот на ВМРО-ДПМНЕ и да не излезевме како политичка партија, немаше да се разбудат од зимски сон”, рече Мицкоски.
Според него, на исти начин се работела и акцијата откако беа обезбедени прислушкуваните разговори и судии, за кои сторителите не се откриени.
“Исто и со случајот ‘Планина’ кој стана мала висорамнина? Кај што не убедуваа дека не знаеле што правеле, а во суштина се играле џамлии и луѓето ги вознемирувале. Криминалот е во врвот на власта. Колку побрзо расчистиме со овие луѓе толку побрзо ќе имаме правна држава. Се останато е растурање пердуви и приказни за мали деца”, додаде Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Очекуваме до милион и пол туристи во Македонија

Премиерот Христијан Мицкоски, одговарајќи на новинарско прашање во врска со забележаниот раст на туризмот во Македонија за 20 проценти, како и за тоа на што се должи растот и кои се очекувањата на Владата, изјави:
„Да, тоа е добар податок во првите четири месеци од оваа година. Добар податок во смисла на тоа дека повеќе од 20% имаме и туристи и ноќевања. Тоа значи повеќе пари, за граѓаните кои што нудат услуга на овие туристи. Тоа значи дека, ако просекот е некаде околу 800 евра, дека секој од нив оставил, надвор од аранжманот. Тоа се навистина стотици милиони евра коишто ќе останат тука, кај нас, во угостителството, во услужната дејност итн., итн.
Очекуваме засилување, уште поголемо. Обидот, да директно преговараме со туроператори е успешен, 40.000 туристи од Западна Европа, веќе престојуваат тука, во вкупен број зборувам. Тоа се некаде околу 160.000 ноќевања, надвор од сезона, кога зборуваме за Охрид, иако и во другиот дел на државата, цела година е сезоната.
За следната година очекуваме, надвор од сезона, половина милион ноќевања. Веќе разговараме со други туроператори и очекуваме повторно двоцифрен раст на туризмот. Влијае на бруто-домашниот производ, влијае на економскиот раст на државата.
Минатата година имавме 1.200.000 туристи. Оваа година очекуваме до милион и пол да дојдеме. Минатата година имавме 3,5 милиони ноќевања, а оваа година очекуваме до 4 милиони ноќевања минимум да дојдеме“, изјави премиерот Мицкоски.
Македонија
(Видео) Реализирани 11 проекти во Клиниката за детски болести во делот на инфраструктурата и набавка на модерна медицинска апаратура

Успешно се реализирани 11 значајни инфраструктурни и медицински проекти на Детската клиника, соопштија денес премиерот Христијан Мицкоски и министерот за здравство, Азир Алиу, истакнувајќи дека нивната цел е сите клиники да бидат инфраструктурно и технолошки опремени и со добар кадар.
Двајцата ја посетија Клиниката за детски болести, пришто Мицкоски изрази благодарност за оние што се грижат за овој објект, бидејќи тој треба да се грижи за здравјето на нашите најмлади, а тоа се децата.
Директорот на клиниката, Реџеп Мемеди информираше дека веќе се реализираат активности за зајакнување на кадарот, клучен предуслов за функционален и одржлив здравствен систем. Во тек е реализација на нови вработувања за доктори, административен кадар, медицински сестри, лаборанти и биолози. Исто така, е завршена е постапката за вработување четворица специјализанти, а наскоро ќе се објави и нов оглас за тројца лекари, за кои веќе се добиени согласности.
Во претстојниот период ќе бидат воведени три медицински процедури и ќе се отвораат нови кабинети за хемодијализа и ултразвучна цистографија на одделот за нефрологија, обезбеден е и апарат за стрес-тест на одделот за кардиологија.
На новинарско прашање, министерот Алиу информираше дека од денес има нова веб страница на Министерството за здравство, поставена е апликација за отворен кабинет, преку која граѓаните ќе имаат можност од наредната недела секој петок да се пријават од 10 до 15 часот и да закажат за 15-минутна средба со министерот.
Македонија
Институциите до работодавачите: Да се работи од далечина каде што е изводливо, работниците да не бидат надвор од 11 до 17 часот

Министерството за економија соопшти дека во согласност со усвоената Информација за спроведување на мерки од Фаза 3 на Акцискиот план за превенирање на последиците од топлотните бранови врз здравјето на населението (2025 – 2030), активно ги координира и имплементира препораките за заштита на работниците и подобрување на работните услови во летниот период.
Во услови на екстремни топлотни бранови, Министерството ги повикува сите работодавачи во јавниот и приватниот сектор да ги применуваат следните мерки:
-Одложување на работните активности во најтоплите часови од денот, од 11 до 17 часот, особено за работници кои се изложени на директна топлина;
-Воспоставување можности за работа од далечина, флексибилно или двократно работно време каде што е изводливо;
-Обезбедување на соодветни микроклиматски услови во работните простории, со температура до 25°C, освен каде што природата на работниот процес тоа не го дозволува;
-Ослободување од работни обврски на бремени жени и лица над 60 години, доколку не се обезбедени соодветни услови за работа, со исклучок на вработените во критична инфраструктура (здравство, полиција, армија, транспорт, енергетика, јавни комунални претпријатија).
Министерството за економија и труд ќе продолжи да ги следи и координира активностите за заштита на здравјето и безбедноста при работа, во соработка со Министерството за здравство и останатите релевантни институции.
Овие мерки, како што се додава, имаат за цел да ги намалат ризиците од топлотен стрес и други здравствени последици за вработените, како дел од националниот одговор на предизвиците од климатските промени и екстремните временски услови.
Министерството ја повикува јавноста и бизнис секторот на соработка и одговорност во спроведувањето на препораките за заштита на работниците и обезбедување безбедни и здрави работни услови.