Македонија
Мицкоски: Нема ниту еден скандал или сомневање за нашите градоначалници, таква ќе биде и идната влада

Лидерот на ВМРО – ДПМНЕ од Кавадарци денес, одговарајќи на новинарско прашање дали е задоволен од работата на градоначалниците, се пофали дека вмровските градоначалници немаат скандали или сомневања за корупција. Како пример го посочи градоначалникот Митко Јанчев.
„Морам да признам дека сум исклучително задоволен, еден нов пристап, една генерација на политичари кои што работат храбро, мотивирано, чесно. Тоа е многу важно. Повеќе од година и половина помина гледате нема ниту едно сомневање за каков било коруптивен скандал иако станува збор за мнозинството општини или ако гледаме по број на жители во тие општини тоа е повеќе од 80% од вкупниот број жители во Македонија. Тоа се генерално најголемите општини. Нема ниту еден скандал или основано сомневање за корупција, што самото по себе кажува дека на овој начин храбро посветено чесно одговорно ќе работи ВМРО-ДПМНЕ како идна влада во Македонија. Можам да кажам дека пример во овој дел од нашата држава за таков тип на работење е градоначалникот Митко Јанчев овдека во Кавадарци“, рече Мицкоски.
Мицкоски и Јанчев денес во Кавадарци направија увид во градежните работи за пробивање на улицата Лазо Асијата за која кавадарчани чекале 30 години.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Општина Аеродром од 29 септември почнува голема есенска акција за бесплатно собирање кабаст отпад

Општина Аеродром од 29 септември почнува голема есенска акција за бесплатно собирање кабаст отпад на целата територија на општината што ќе трае до средината на ноември.
Како што наведуваат од Општината, во соработка со ЈП за комунални дејности на Општина Аеродром, на повеќе локации ќе бидат поставени големи контејнери во кои граѓаните ќе можат да го оставаат својот стар и дотраен мебел.
Акцијата ќе почне од населба Мичурин каде што в понеделник и во вторник, 29 и 30 септември, садовите ќе бидат поставени на улица „Анастас Митрев“ зад паркот до трансформаторот и на улица „Венјамин Мачуковски“ до трансформаторот кај Железничка станица. Потоа, в среда и во четврток, 1 и 2 октомври, жителите на Острово, својот кабаст отпад ќе можат да го оставаат на улица „Владимир Комаров“ бр. 9, како и на „Владимир Комаров“ број 16 зад ТЦ „Скопјанка“.
Кабастиот отпад е планирано да се собира речиси до средината на ноември, а жителите за сите локации и датуми можат да се информираат на страницата на општината aerodrom.gov.mk, каде што е објавен планот со точните датуми и локации.
Македонија
Сообраќајот на државните патишта се одвива непречено, по наместа влажни коловози

Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Денеска претежно облачно и посвежо, со повремени врнежи од дожд

Времето денеска претежно облачно и посвежо, со повремени врнежи од дожд. Локално врнежите ќе бидат поројни и пообилни со услови за појава на ретки грмежи. Ќе дува слаб до умерен јужен ветер. Минималната температура ќе биде во интервал од 9 до 18, а максималната ќе достигне од 14 до 22 степени.
Во Скопје, променливо облачно со повремени врнежи од дожд. Ќе дува слаб до умерен јужен ветер. Минималната температура ќе се спушти до 17, а максималната ќе достигне до 21 степени
Под влијание на циклонска активност до понеделник времето ќе биде променливо облачно и посвежо со повремени врнежи од дожд. Локално врнежите ќе бидат поројни и пообилни (над 20 l/m²). Потоа во следните два дена времето ќе биде претежно стабилно. Дневната температура во текот на прогнозираниот период ќе биде за 8 до 10 степени пониска во однос на претходниот.