Македонија
Мицкоски: Новото задолжување на Владата од 300 милиони евра е доказ дека Буџетот е во лоша состојба – моменталната дупка изнесува околу 550 милиони евра
Денес претседателот на ВМРО-ДПМНЕ, Христијан Мицкоски во текот на посетата на општина Ѓорче Петров ја коментираше информацијата дека вчера на владина седница поминала одлука за ново задолжување од 300 милиони евра. Според него, ова покажува дека Буџетот е во лоша состојба, и не е ликвиден како што власта убедува. Овие пари се за повеќе тендери во четири очи.
„Повеќе пари за тендери кои што ќе завршат во четири очи, ништо повеќе. Очигледно дека Буџетот, бидејќи велат дека е ликвиден, дека има наплата онаква каква што планирале, не е така. Тоа говори и овој податок, кој што и јас го слушнав дека на вчерашната седница на Владата е помината одлука за нови 300 милиони евра, задолжување со нова еврообврзница“, истакна Мицкоски.
Мицкоски рече дека се што ќе се каже од Владата треба да се зема со резерва. Бидејќи или е полувистина, или е шпекулација, или е лага.
„Зошто тогаш се случуваат овие работи, ако е стабилна состојбата? Ако го погледате податокот кој што го објавува министерството за финансии ќе забележите дека моменталната дупка во Буџетот е повеќе од 33 милијарди денари, некаде околу 550 милиони евра“, рече Мицкоски и дополни дека „200 милиони евра се за овие проектите Коридорот 8 и 10, кои што се платени на хартија, а за жал освен таблата, па сега ни таблата не стои. Ја извадиле таблата, само шипките стојат. Друго ништо не видоа граѓаните“, истакна лидерот на ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.