Македонија
Мицкоски од Криволак: Продолжуваме со инвестирање на модерна опрема за Армијата

„Армијата е нешто што кај мене има посебна почит како припадник на истата 2003-2004 година во делот од македонската гарда, можев да научам многу работи коишто можеби за жал, дел од помладите генерации не можат да ги видат, кога не сте дел од Армијата, истакна премиерот Христијан Мицкоски од Криволак.
-Но, тоа е што е, таков е животот. Мене тој период од животот ме наведе таму и навистина поминав прекрасен период и стекнав пријателства коишто до денеска ги имам, така што уште еднашка македонските војници ја имаат мојата огромна почит и ќе се обидам како претседател на Владата заедно со останатите членови на Владата во соработка со нашиот стратешки партнер Соединетите Американски Држави и останатите земји членки на најголемата и најсилната во историска смисла Алијанса тоа е НАТО пактот да овозможиме што е можно подобри услови за војниците и за старешините да можат да се развиваат во една модерна современа Армија којашто ќе може да одговори на предизвиците коишто се потребни пред сѐ за да ја заштитат сопствената татковина, а потоа да одговорат и на предизвиците коишто заедно со сојузниците во рамките на НАТО Алијансата ќе ги имаме и надвор од оние предизвици кои што ги имаме- да ја заштитиме сопствената татковина“, рече Мицкоски и додаде:
„Денеска можевме да видиме една навистина динамична практична вежба со примена на современо вооружување, со примена на модерна опрема. Јас можам да кажам дека од она што успеав да гои видам можам да заклучам дека навистина капацитетите се на едно високо би рекол одлично ново. Често пати ме прашуваат дали сте задоволни или не сте задоволни. Можам да кажам дека сум презадоволен. Секогаш може да биде подобро Јас сум убеден дека следниот пат ќе биде уште подобро, следниот пат ќе биде уште подобро од претходниот итн. итн. ќе ги градиме капацитетите. Она коешто го очекуваат и граѓаните но и потребите коишто ги наметнува членството во најголемата и најсилната во историјата воена Алијанса, НАТО Алијансата. Како Влада ќе продолжиме да ве поддржуваме и мислам дека ни претстојат многу убави денови. Во делот на техничките капацитети министерот кажа доволно, во делот на финансиските капацитети министерот кажа во соработка со Министерството за финансии што се направивме во овој периодот и што беше она што го затекнавме. Но, бидете убедени дека поддршката за Армијата набавувањето на нова опрема, средства ќе продолжат и во годините коишто следат. За да бидеме навистина една модерна и динамична Армија којашто ќе одговара на НАТО стандардите. Уште еднаш благодарам на поканата и на Генерал штабот. Благодарам на началникот на Генерал штабот да бидам дел од овој прекрасен настан и секогаш кога ќе бидам поканет стојам на располагање, додава Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Муцунски во Париз ја реафирмира стратешката ориентација на државата кон членството во ЕУ

Во рамки на работната посета на Париз, министерот за надворешни работи и надворешна трговија, Тимчо Муцунски, оствари одделни средби со претседателката на Интерпарламентарната група за пријателство Франција – Западен Балкан, сенаторката Марта де Сидрак, и со советникот на францускиот претседател Емануел Макрон за Континентална Европа и Турција, Бертран Бишвалтер.
На средбата во францускиот Сенат беше истакнато значењето на парламентарната дипломатија во градењето на стабилни и севкупни односи меѓу двете земји. Се разговараше за европската перспектива на Северна Македонија и регионот, како и за можностите за унапредување на парламентарната соработка и продлабочување на политичките и економските врски. Посебен акцент беше ставен на доследната поддршка од француска страна за македонските евроинтеграции.
На средбата со советникот Бишвалтер беа отворени прашања од заеднички интерес, вклучително и актуелните геополитички предизвици во Европа, важноста на регионалната соработка, партнерството и придонесот на Република Северна Македонија во рамките на НАТО Алијансата, како и понатамошното јакнење на соработка во контекст на европската и регионалната стабилност.
Министерот Муцунски ја реафирмираше стратешката ориентација на државата кон членството во Европската Унија, како и континуираната посветеност на реформските процеси и на добрососедските односи. Воедно, беше потврдена значајната улога на Франција како силен поддржувач на европската перспектива на Северна Македонија и на регионот, со цврста определба оваа поддршка да продолжи со несмален интензитет и во наредниот период.
Македонија
ВМРО-ДПМНЕ: По трагедијата во Кочани целосно се забрани употреба на пиротехника во затворен простор

СДС брутално и очигледно ја злоупотребува трагедијата во Кочани, со очајнички обиди да фрлат песок во очите на јавноста и со нивните лаги да ја засенат вистината, реагираат од ВМРО-ДПМНЕ, на обвинувањата од потпретседателот на СДСМ, Методија Илиевски.
„За разлика од претходната власт сега има сеопфатна, темелна истрага за трагедијата во Кочани во која беа опфатени поранешни и сегашни функционери, од кои некои се во притвор, а тоа е доказ дека сега има одговорност и неселективност. Владата на ВМРО-ДПМНЕ за разлика од претходната власт, донесе серија законски, измени со кои тотално се забранува употреба на пиротехнички средства во затворен простор, со цел да нема импровизации кои во иднина би резултирале со несреќи“, велат од партијата.
Од ВМРО-ДПМНЕ додаваат дека санкциите за прекршување на оваа забрана драстично се зголемени, но исто така утврдена е и строга одговорност за нелегално присуство на малолетници по полноќ во угостителски објекти, со цел заштита на младата популација.
„Ова се ефикасни законски мерки со кои се воведува одговорност и ефективен надзор, мерки кои гарантираат заштита на јавноста во затворени простории. Оваа Влада демонстрира одговорност со максимална сериозност и законски механизми ја брани јавната безбедност, води транспарентна и структурирана одговорност кон сите виновници без исклучок“, велат од партијата.
Македонија
АХВ: Засилени мерки по појавата на ново жариште на чума кај малите преживари во Албанија

Агенцијата за храна и ветеринарство (АХВ) воведе мерки на засилен надзор на болеста чума кај малите преживари, особено во регионот на Западна Македонија, со цел спречување на внесување и ширење на болеста од соседна Албанија во земјава.
Засилена е контролата на движењето и транспортот на животни од видовите овци и кози по добиеното известување вчера вечер преку европскиот систем за пријава на болести (ADIS) на Светската организација за здравствена заштита на животните – WOAH, дека во Република Албанија во областа Дебар, во место Кастриот, на фарма со 200 кози има појава на ново жариште на болеста, по пријавата на првиот случај неодамна во областа Скадар.
АХВ донесе Решение за забрана за увоз и транзит на живи домашни и диви мали преживари, семе, јајце клетки и емброни од домашни и диви мали преживари, месо од домашни и диви мали праживари, производи и преработки од месо од домашни и диви мали преживари, млеко и производи од млеко од домашни и диви мали преживари, како и нуспроизводи од домашни и диви мали преживари во Република Северна Македонија од РепубликаАлбанија, со цел спречување на можноста за ширење на болеста.
Со оглед на новонастаната состојба, а заради намалување на ризикот од појава и проширување на болеста, АХВ ги извести ветеринарните друштва и официјалните ветеринари за спроведување на засилен надзор на одгледувалиштата со овци и кози и пријавување на секој сомнителен случај на болеста. На сила останува Решението за безбедносни мерки во однос на болеста чума кај мали преживари кое Агенцијата за храна и ветеринарство го донесе на 09.08.2024 година.
Агенцијата за храна и ветеринарство го извести Министерството за внатрешни работи за новонастанатата ситуација со појава на болеста во пограничниот регион со Македонија за преземање на засилени мерки за надзор и спречување на евентуален шверц со живи животни од видовите овци и кози од Албанија во нашата земја.