Македонија
Мицкоски од Пехчево: Во ЕУ се влегува со работи, а не со криминални тендери и со багерите и камионите на бате
Претседателот на ВМРО-ДПМНЕ, Христијан Мицкоски оствари средба со граѓани во Пехчево каде говореше за актуелната политичка и економска состојба како и за штетноста на договорот со Грција, соопшти ВМРО-ДПМНЕ.
Мицкоски на граѓаните на Пехчево им ги посочи последиците од капитулантскиот и штетен договор кој владата на СДСМ го потпиша со соседна Грција. Мицкоски пред граѓаните на Пехчево потенцираше дека со договорот се губат три крупни работи што значат укинување на македонската нација, на македонската држава под името која сега ја знаеме и создавање на некој нов хибрид.
Мицкоски истакна дека договорот значи загуба на институционалниот идентитет што впрочем претставува дел од националниот идентитет на Македонците.
„Најпрвин го губиме институционалниот идентитет, тоа значи дека нашата Академија на Науките и Уметностите повеќе нема да биде Македонска, потоа нема да имаме Македонска Армија, а нема да имаме ни Македонска Полиција., ниту Македонска Опера и балет и сето тоа ќе биде поврзано со новата државата а тоа ќе биде Северна Македонија. Го губиме институционалниот идентитет кој што всушност претставува дел од нашиот национален идентитет“, вели Мицкоски
Членот 8 пак, вели тој, ќе биде погубен за интеграцијата на Македонија во ЕУ, а Македонија ќе ја снајде судбината на интеграцијата во ЕУ на Турција, односно приказна која никогаш нема да заврши.
„Во Членот 8 од договорот стои дека Македонија и Грција ќе формираат мешовита комисија и замислете таа комисија ќе преговара за нашата историја, археологија и образование. Секогаш кога ние во рамките на таа комисија ќе одлучиме да ги браниме националните интереси и достоинството тогаш тие од грчката страна ќе речат НЕ во рамки на ЕУ така што ќе застана преговорите и ние ќе бидеме блокирани тоа значи дека никој не ни ја гранатира иднината која што ни ја прикажуваат преку овие скапо платени реклами во медиумите. Немаме гаранција и покрај тоа што ќе дозволиме национално и државно понижување“ истакна Мицкоски.
Тој забележа дека со капитулантскиот договор не се отвораат магично вратите за влез на Македонија во ЕУ, тоа според него се само шарени лаги со кои се манипулираат граѓаните со цел да се избегне дебатата за капитулантскиот договор. Претседателот на ВМРО-ДПМНЕ вели дека за влез на Македонија во ЕУ треба да се работи и не може да се влезе преку капитулација, односно на начинот на кој што Заев сака тоа да го направи.
„Сите овие шарени лаги кои што ни ги прикажуваат по медиумите дека со овој договор малтене влегуваме во Европа не е точно, за да влеземе во Европа треба да имаме знаење, за да влеземе во Европа треба да имаме проекти и многу работа. Во ЕУ не се влегува со криминални тендери, во ЕУ не се влегува со багерите и камионите на бате. Во ЕУ не се влага со криминални иновации, во ЕУ не се влегува со расипано здравство. Во Европа треба да знаете како да влезете, односно во Европа треба да работите за да влезете, а не на начинот на кој што Зоран Заев тоа сака да го направи“ додаде Мицкоски.
За крај претседателот на ВМРО-ДПМНЕ ги повика симпатизерите и членовите на партијата да бидат подготвени за исклучително жестоки притисоци, уцени и закани, бидејќи ова е битка за Македонија.
„Секој кога се мотивирал да придружи на ВМРО-ДПМНЕ, секој бил подготвен да кога ќе дојде денот да се бранат националните интереси да застане на патот на одбраната на тие национални интереси, да даде се од себе колку е во негова моќ да ги одбрани за да можеме да си го задржиме ова парче земја која што некој ни ја оставил, за која што предците наши ги положиле своите животи во минатото. Затоа треба секој од нас да биде подготвен дека периодот кој што следува за ВМРО-ДПМНЕ и секој оној кој што себе си се идентификува како дел од ВМРО-ДПМНЕ, да биде подготвен на исклучително жесток притисок, уцени закани кои што претстојат, затоа што ова е битката за Македонија, ние сме на вистинската страна“ порача Мицкоски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Центар, Сопиште и Бутел
Од ЕВН Македонија АД известуваат дека денеска без електрична енергија ќе останат:
· во периодот од 07:30 до 15:00 часот, корисниците на блокот на згради од булеварот Партизански Одреди бр.17 кон улица Максим Горки, општина Центар.
· во периодот од 07:45 до 15:30 часот, корисниците на селата Јаболци, Ново Брезница, Патишка Река, Држилово, Малчиште, Црн Врв, Елово, Осинчани, Карст с.Јаболци Викендици Држилово, Сателитски Центар, Ново Брезница, Рудпроект, Јаболци, Патишка Река, општина Сопиште.
· во периодот од 08:30 до 10:30 часот, корисниците на улицата Тале Христов, Поликлиника ВФВ и Објектите околу ВРВ Поликлиник, општина Бутел.
· во периодот од 09:00 до 12:00 часот, дел од корисниците на улицата Елисие Поповски – Марко бр.21,47 и други корисници во непосредна близина, општина Центар.
Македонија
Делови од Центар и Аеродром денеска без вода
Од ЈП Водовод и Канализација известуваат дека денеска:
– поради изведување на водоводен приклучок ф-80 мм на улицата Франклин Рузвелт бб, прекинато водоснабдување ќе имаат корисниците на дел од истата улица, односно потегот од Орце Николов до Благој Давков, општина Центар.
Водоснабдувањето ќе биде прекинато од 10:00 часот до завршување со работните активности.
– поради промена на вентил во шахта ф-2“ на улицата Венијамин Мачуковски бб, прекинато водоснабдување ќе имаат корисниците од истата улица, општина Аеродром.
Водоснабдувањето ќе биде прекинато од 09:00 часот до завршување со работните активности.
Македонија
Утрото претежно ведро и студено, преку денот сончево со мала до умерена облачност
Утрото претежно ведро и студено, преку денот сончево со мала до умерена облачност. Ќе дува слаб ветер од јужен правец.
Минималната температура ќе биде во интервал од -4 до 4, а максималната ќе достигне од 15 до 20 степени.
Во Скопје, сончево со мала до умерена облачност. Ќе дува слаб ветер од југоисточен правец. Минималната температура ќе се спушти до 2, а максималната ќе достигне до 16 степени.
Времето во наредните денови
Следува период на стабилно и суво време. Претпладне по одделни котлини ќе има услови за појава на магла или ниска облачност. Поради разведрувањето утринската температура наместа ќе се спушти под нулата, а дневната ќе бележи тенденција на благ пораст.

